ហ្ស៊េរុយសាឡឹម៖ សោកនាដកម្មបង្កឲ្យមានមនុស្សស្លាប់ និងរបួស រួមទាំងកុមារផងបានកើនឡើងដោយសារការផ្លោងគ្រាប់ដាក់គ្នា និងការវាយប្រហារគ្នាតាមអាកាសរវាងពួកអ៊ីស្រាអែល និងប៉ាឡេស្ទីនមិនមានការថមថយនោះឡើយ។ ពេលនេះបើទោះបីជាមានជនស៊ីវិល ស្លាប់
ជាច្រើននាក់ នៅតំបន់ហ្គាសាស្ទ្រីពក៏ដោយ ក៏នាយករដ្ឋមន្ត្រីអ៊ីស្រាអែល លោក ប៊ិនចាមីន នីតាន់ យ៉ាហ៊ូ និយាយថា នឹងពង្រីកប្រតិបត្តិការយោធា វាយប្រហាររបស់ខ្លួន ប្រឆាំងក្រុមហាម៉ាសដដែល។ វេបសាយបរទេសចេញផ្សាយនៅថ្ងៃពុធ ទី១៦ ខែកក្កដា ឆ្នាំ២០១៤ ដោយផ្អែកតាមការលើកឡើង របស់លោក នីតាន់យ៉ាហ៊ូ ក្នុង សន្និសីទសារព័ត៌មានកាលពីល្ងាចថ្ងៃអង្គារថា « ប្រសិនបើក្រុមហាម៉ាស និងក្រុមជីហាដ អ៊ីស្លាម មិនព្រមអនុវត្តបទឈប់បាញ់គ្នានោះទេ យើងនឹងបន្តការវាយប្រហារទៅលើពួកគេ បន្តទៀត»។
សូមបញ្ជាក់ផងដែរថា បើតាមតុល្យការអ្នកស្លាប់នៃជនប៉ាឡេស្ទីនគិតមកដល់ថ្ងៃអង្គារ ទី១៥ ខែកក្កដា ឆ្នាំ២០១៤ ដោយសារការវាយលុករបស់អ៊ីស្រាអែលលើជ្រោយហ្គាហ្សាកាន់តែមានកម្រិតខ្ពស់ បណ្តាលឱ្យមនុស្សស្លាប់សរុប១៩៦នាក់ និងរបួស១.៤៨៩នាក់ រយៈពេល៧ថ្ងៃកន្លងទៅនេះ។ ដោយក្នុងចំណោមនោះមានស្ត្រី កុមារ មនុស្សចាស់ និងជនពិការផងដែរ ហើយការវាយប្រហារនេះក៏បានបណ្តាលឲ្យប៉ាឡេស្ទីន និងអន្តរជាតិមានកំហឹងយ៉ាងខ្លាំង ខណៈប្រជាជននៅទូទាំងពិភពលោក បានបង្ហាញការប្រឆាំងនឹងការវាយប្រហារនេះផងដែរ៕
