បទល្មើស​នេសាទ​នៅតែ​បន្ត​កើតឡើង​យ៉ាង​ពេញបន្ទុក​មិន​ដូច​អ្វីដែល​ប្រធាន​រដ្ឋបាល​ជលផល​បង្ហា​ញ​ស្នាដៃ​ក្នុងការ​បង្ក្រាប​នោះទេ​

0

​កាលពី​ថ្ងៃទី​៣០ ខែមករា ឆ្នាំ​២០១៤ សារព័ត៌មាន​បាន​ចុះផ្សាយ​អត្ថបទ​មួយ​ដែលមាន​ចំណងជើង​ថា “​បទល្មើស​នេសាទ​កើតឡើង​យ៉ាង​ពេញបន្ទុក សមត្ថកិច្ច​មិន​ចាត់វិធានការ​បង្ក្រាប​ឱ្យបាន​ទាន់ពេលវេលា​”​។ ខ្លឹមសារ​នៃ​អត្ថបទ​នេះ​គឺជា​ព័ត៌មាន​ដែល​ប្រមូលបាន​ពី​

សេចក្តីរាយការណ៍​របស់​ប្រជាពលរដ្ឋ​រស់នៅ​តាម​បណ្តា​ខេត្ត​នានា ជាប់​តំបន់​បឹង​ទន្លេសាប ព្រមទាំង​បណ្តា​ខេត្ត​មួយចំនួនទៀត ដូចជា​ខេត្តកណ្តាល ខេត្តកំពង់ចាម និង​ខេត្តព្រៃវែង​ជាដើម​។ ក្រោយ​ពេលដែល​សារព័ត៌មាន​មនសិការ​ខ្មែរ ចុះផ្សាយ​អត្ថបទ​នេះ​រួចមក លោក ណៅ ធួ​ក ប្រធាន​រដ្ឋបាល​ជលផល​បានធ្វើ​លិខិត​បំភ្លឺ​មួយ​ចុះ​ថ្ងៃទី​០៥ ខែកុម្ភៈ ឆ្នាំ​២០១៤ ដោយបាន​បញ្ជាក់​ពី​ស្នាដៃ​របស់​មន្ត្រីជលផល ក៏ដូចជា​សមត្ថកិច្ច​ពា​ក់​ព័ន្ធ​ដែល​បាន​បង្ក្រាប​បទល្មើស​នេសាទ​ដោយ​យកចិត្តទុកដាក់​។​

​ទាក់ទង​ទៅនឹង​បញ្ហា​ខាងលើនេះ សារព័ត៌មាន​មនសិការ​ខ្មែរ​សូមបញ្ជាក់ថា ខ្លឹមសារ​អត្ថបទ​ដែល​បាន​ចុះផ្សាយ​គឺជា​ប្រភពព័ត៌មាន​ចេញមក​ពី​ប្រជាពលរដ្ឋ​ដែល​បានឃើញ​ការពិត​ទាក់ទង​ទៅនឹង​បទល្មើស​នេសាទ​ក្នុង​តំបន់​ដែល​ពួកគាត់​កំពុង​រស់នៅ​បច្ចុប្បន្ន​។ មិនមែន​មានតែ​សារព័ត៌ មាន​មនសិការ​ខ្មែរ​ទេ ដែល​ចុះផ្សាយ​ជុំវិញ​បទល្មើស​នេសាទ​កើតឡើង​នៅក្នុង​ខេត្តកំពង់ឆ្នាំង ពោធិ៍សាត់ បាត់ដំបង សៀមរាប កណ្តាល និង​ព្រៃវែង​ជាដើម គឺ​សារព័ត៌មាន​នានា ព្រមទាំង​វិទ្យុ​បរទេស​ផងដែរ បាន​ផ្សព្វផ្សាយ​ជា​បន្តបន្ទាប់​។

ប្រសិនបើ​លោក​ប្រធាន​រដ្ឋបាល​ជលផល​ចង់ដឹង​ការពិត​កាន់តែច្បាស់​ជុំវិញ​បញ្ហា​នេះ គួរតែ​ពិនិត្យមើល​ទៅលើ​ការផ្សព្វផ្សាយ​របស់​វិទ្យុ​បរទេស​ផ្សា យ​ជា​ភាសា​ខ្មែរ​និង​សារព័ត៌មាន​ក្នុងស្រុក​មួយចំនួន​ផងដែរ ព្រោះ​បច្ចុប្បន្ន​បទល្មើស​នេសាទ​ពុំមាន​ការថយចុះ​នោះទេ​។ តាម​សេចក្តីរាយការណ៍​ពី​ប្រជាពលរដ្ឋ​រស់នៅក្នុង​ស្រុក​កំពង់លែង ខេត្តកំពង់ឆ្នាំង និង​ស្រុក​ឯក​ភ្នំ ខេត្តបាត់ដំបង​ជាដើម បានបញ្ជាក់​យ៉ាងច្បាស់​ថា ពួកគាត់​មិនអាច​ចូលទៅ​នេសាទ​ជា​លក្ខណៈ​គ្រួសារ​ក្នុង​អតីត​ដែន​ឡូត៍​ដែល​រដ្ឋាភិបាល​បាន​ដកហូត​ពី​ម្ចាស់​ឡូត៍​នេសាទ​នោះឡើយ​។​

​ក្នុង​លិខិត​បំភ្លឺ​របស់លោក ណៅ ធួ​ក ប្រធាន​រដ្ឋបាល​ជលផល​លេខ ២១៦ ជ​ផ ចុះ​ថ្ងៃទី​០៥ ខែកុម្ភៈ ឆ្នាំ​២០១៤ បានបញ្ជាក់​ពី​ស្នាដៃ​របស់​សមត្ថកិច្ច​ក្នុងការ​បង្ក្រាប​បទល្មើស​នេសាទ​ប្រកបដោយ​ប្រសិទ្ធភាព​នាពេល​កន្លងមក​។ ជាក់ស្តែង​ពាក់ព័ន្ធ​នឹង​តំបន់​កំពង់ហ្លួង ស្រុក​ក្រគរ លោក​ណៅ ធួ​ក បាន​បញ្ជាក់ថា “​ចំពោះ​តំបន់​កំពង់ហ្លួង ស្រុក​ក្រគរ ខេត្តពោធិ៍សាត់ ប្រជា​នេសាទ​មាន​សិទ្ធិ​ធ្វើ​នេសាទ​ដោយ​សេរី ដោយ​ប្រើប្រាស់​ឧបករណ៍​នេសាទ​ជាល​ក្ខ ណៈ​គ្រួសារ​ដូច​មានចែង​ក្នុង​ប្រកា​សលេខ​៤៥៨ ប្រក​.​កសក ចុះ​ថ្ងៃទី​២២ ខែតុលា ឆ្នាំ​២០១២​។

ក្នុងករណី​ធ្វើ​នេសាទ​ដោយ​ប្រើប្រាស់​ឧបករណ៍​នេសាទ​ផ្ទុយ​នឹង​ការកំណត់​ក្នុង​ប្រកាស​នេះ អ្នកប្រព្រឹត្ត​ត្រូវ​ចាត់ទុកថា ជនល្មើស​ហើយ​ត្រូវ​ទទួលខុសត្រូវ​តាមច្បាប់​ស្តីពី​ជលផល​។ ជាក់ស្តែង​ក្នុង​ឆ្នាំ​២០១៣ កន្លងមក​លទ្ធ​ផលប​ង្ក្រា​ប​បទល្មើស​ជលផល​មាន​ចំនួន​៣៨២៦​ករណី ប្រៀបធៀប​ឆ្នាំមុន​ថយចុះ​១៤៨១​ករណី ក្នុងនោះ​បញ្ជូន​សំណុំរឿង​ទៅ​តុលាការ​ចំនួន​៩៦​ករណី បញ្ជូន​ជនសង្ស័យ​ចំនួន​១៤១​នាក់ ជាប់ពន្ធនាគារ​៥៤​នាក់ និង​រឹបអូស​និង​បាន​បំផ្លាញចោល​វត្ថុតាង​បទល្មើស​ជលផល​ជាអាទិ៍ របាំង​ស្បៃ​មុង និង​សាច់​អួន ១០០០០០០​ម៉ែត្រ អួន​ហ៊ុម​ចំនួន​១១៩​វង់ មង​ពាក់​ប្រវែង​៣៤៧០០០​ម៉ែត្រ របាំង​ព្រួល​ប្រវែង​៩៣០០​ម៉ែត្រ ឧបករណ៍​ឆក់​ត្រី​១២៤៤​គ្រឿង​និង​ឧបករណ៍​សម្ភារៈ​មួយចំនួនទៀត ព្រមទាំង​លែង​កូន​ត្រី​ចម្រុះ​ចំនួន​៤០០ ០០០​ក្បាល​និង​៩២ ៦២៤​គីឡូក្រាម​ចូលទៅក្នុង​បឹង​ធម្មជាតិ​វិញ​ផងដែរ​”​។​

​លិខិត​បំភ្លឺ​របស់លោក ណៅ​ធួ​ក ក៏បាន​បង្ហាញ​ផងដែរ​អំពី​ករណី សមត្ថកិច្ច​ជលផល​គ្រប់​ជាន់ថ្នាក់​សហការ​ជាមួយ​កម្លាំងប្រដាប់អាវុធ បង្ក្រាប​បទល្មើស​នេសាទ​នៅ​តំបន់​ព្រែក​ទាល់ និង​បាក់​ព្រា ក្នុងភូមិ​សាស្ត្រ​ស្រុក​ឯក​ភ្នំ ខេត្តបាត់ដំបង​។ ជាក់ស្តែង​កាលពី​ថ្ងៃទី​២១ ដល់​ថ្ងៃទី​២២ ខែមករា ឆ្នាំ​២០១៤ កន្លងមក​ថ្នាក់ដឹកនាំ​រដ្ឋបាល​ជល​ផល​បាន​ដឹកនាំ​កម្លាំង​ចុះបង្ក្រាប​បទល្មើស​នេសាទ​ក្នុង​តំបន់​នោះ ដោយ​បង្ក្រាប​និង​រឹបអូស​វត្ថុតាង​បទល្មើស​យ៉ាងច្រើន​។ ទាក់ទង​នឹង​តំបន់​កំពង់​ឃ្លាំង កំពង់​ភ្លុក និង​តំបន់​ចុង​ឃ្នៀ​ស ក្នុង​ខេត្តសៀមរាប ក៏​នៅក្នុង​លិខិត​បំភ្លឺ​របស់លោក ណៅ ធួ​ក បានបញ្ជាក់​អំពី​សិទ្ធិ​នេសាទ​របស់​ប្រជាពលរដ្ឋ​និង​ការបង្ក្រាប​បទល្មើស​ប្រកបដោយ​ប្រសិទ្ធភាព​ផងដែរ​។

ចំណែក​នៅក្នុង​ខេត្តព្រៃវែង និង​ខេត្តកណ្តាល ក៏​លោក ណៅ ធួ​ក បានបញ្ជាក់​អំពី​ស្នាដៃ​របស់​សមត្ថកិច្ច​និង​មន្ត្រីជលផល​នៅក្នុង​ការបង្ក្រាប​បទល្មើស​ស្របទៅតាម​ស្ថានភាព​ជាក់ស្តែង​។​ ​បើតាម​លិខិត​បំភ្លឺ​របស់លោក ណៅ ធួ​ក ចុះ​ថ្ងៃទី​០៥ ខែកុម្ភៈ ឆ្នាំ​២០១៤ សឹង​ថា​ពុំមាន​បទល្មើស​កើតឡើង​នៅ​តំបន់​បឹង​ទន្លេសាប​ជាពិសេស​នៅក្នុង​អតីត​ដែន​ឡូត៍​ធំៗ ដែល​រដ្ឋាភិបាល​បាន​ដកហូត​ពី​ដង្ខៅ​ឡូត៍​ទុកឱ្យ​ប្រជាពលរដ្ឋ​នេសាទ​ជា​លក្ខណៈ​គ្រួសារ និង​អភិរក្ស​ពូជ​ត្រី​នោះឡើយ​។

ប៉ុន្តែ​បើតាម​សេចក្តីរាយការណ៍​ពី​ប្រជាពលរដ្ឋនៅក្នុង​ស្រុក​កំពង់លែង និង​ស្រុក​ជល​គិរី ព្រមទាំង​តំបន់​ផ្សេងៗ​ទៀត​ក្នុង​ខេត្តកំពង់ឆ្នាំង ពោធិ៍សាត់ បាត់ដំបង និង​សៀមរាប​ជាដើម បាន​បញ្ជាក់ថា​ពួកគាត់​មិនអាច​ចូលទៅ​នេសាទ​ជា​លក្ខណៈ​គ្រួសារ​នៅ​អតីត​ដែន​ឡូត៍​ទាំង​នោះទេ ហើយ​អ្វីដែល​មនសិការ​ខ្មែរ​បាន​ចុះផ្សាយ​គឺ​ផ្អែក​តាម​សេចក្តីរាយការណ៍​របស់​ប្រជាពលរដ្ឋ​ក្នុង​មូលដ្ឋាន​តែម្តង​៕​