កំពង់ចាម: ថ្លែងនៅក្នុងពិធីទទួល ម៉ាស ចំនួន ១.០០០ និងអាវការពារសម្រាប់ពេទ្យ ចំនួន ១.០០០ផងនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណយ៉ាងជ្រាលជ្រៅបំផុត ចំពោះ ក្រុមហ៊ុន មេតថេក ខេមបូឌា លីមីតធីត ដែលបានយកចិត្តទុកដាក់ ក្នុងការបង្ការទប់ស្កាត់ជម្ងឺ កូវីត-១៩ នេះជាការឆ្លើយតបទៅនឹងស្ថានភាព បច្ចុប្បន្ន ដែលអាជ្ញាធរខេត្តកំពង់ចាម បាននឹងកំពុងធ្វើការងារយ៉ាងសកម្ម ក្នុងការការពារ និងទប់ស្កាត់ការរីករាលដាល នៃជម្ងឺ កូវីត ១៩ ដូច្នេះតាមរយៈម៉ាសទាំង ១.០០០ម៉ាស់ និងអាវការពារ សម្រាប់ពេទ្យចំនួន ១.០០០នេះ រដ្ឋបាលខេត្តកំពង់ចាម នឹងចាត់ចែងទៅតាមតម្រូវការជាក់ស្ដែង ក្នុងការត្រៀមលក្ខណៈសម្បត្តិ ដើម្បី បង្ការការពារការរីករាលដាល នៃជម្ងឺ កូវីដ ១៩ នៅក្នុងខេត្តកំពង់ចាម ក៏ដូចជា នៅក្នុងព្រះរាជាណាចក្រកម្ពុជា ផងដែរ។
ដោយឡែក នាព្រឹកថ្ងៃទី១៩ ខែមិនា ឆ្នាំ២០២០នេះ.ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វើការជួបប្រជុំជាមួយអ្នកតំណាងបងប្អូនខ្មែរដែលកាន់សាសនាឥស្លាម ដើម្បីកុំអោយមានការរើសអើង ដោយឯកឧត្ដមអភិបាលខេត្តបានលើកឡើងថា មកដល់ម៉ោងនេះ យើងឃើញមានជនបំពុលសង្គម ដើម្បីប្រយោជន៍បុង្គល និងបក្សពួក ដែលបានយកប្រធានបទCovid-19 ធ្វើជានយោបាយ ដើម្បីបំបែកបំបាក់ផ្ទៃក្នុងរបស់បងប្អូនយើង ដូច្នេះសូមឲ្យបងប្អូនកុំជឿតាមការញុះញង់របស់ជនអគតិទាំងឡាយនោះ ហើយបេីមានបញ្ហាអីត្រូវទំនាក់ទំនងព័ត៌មានមកថ្នាក់ដឹកនាំរដ្ឋ ឬថ្នាក់ដឹកនាំក្នុងជួរសាសនា និងជាពិសេសយើងត្រូវតាមដានជាប្រចាំ នូវសន្និសីទសារព័ត៌មានរបស់ក្រសួងសុខាភិបាល ដែលបានចេញសេចក្តីជូនដំណឹងជាប្រចាំ ព្រោះព័ត៌មានដែលផ្សាយចេញពីក្រសួងសុខាភិបាលទើបជាព័ត៌មានពិត។ ជាមួយគ្នានោះ រដ្ឋាភិបាលបានសម្រេចបង្កើតគណៈកម្មការទប់ស្កាត់ជម្ងឺCovid-19 ដោយមានសមាសភាពសម្តេចតេជោ ហ៊ុន សែន និងសម្ដេចក្រឡាហោម ជាប្រមុខដឹកនាំ ហើយរដ្ឋាភិបាលក៏បានសម្រេចលើកពេលកម្មវិធីជួបជុំធំៗទាំងអស់ ព្រមទាំងបិទក្លិបសប្បាយដ្ឋាននានា ដើម្បីធានាបាននូវសុខសុវត្ថិភាពរបស់បងប្អូនប្រជាពលរដ្ឋផងដែរ។
គួរកត់សម្គាល់ផងដែរថា នាពេលថ្មី កន្លងទៅនេះ រដ្ឋបាលខេត្តកំពង់ចាម ក៏បានចេញសេចក្ដីណែនាំ លេខ ០០៥/២០ ចុះថ្ងៃទី១០ មីនា ឆ្នាំ២០២០ ដែលជាវិធានការចាំបាច់មួយចំនួន ដើម្បី ឲ្យលោកអភិបាល នៃគណៈភិបាលក្រុង ស្រុក លោក លោកស្រី ប្រធានមន្ទីរ អង្គភាពជុំវិញខេត្ត មេឃុំ ចៅសង្កាត់ ប្រធានគ្រឹះស្ថានសាធារណៈ និងឯកជន ម្ចាស់រោងចក្រ សហគ្រាស ក្រុមហ៊ុន កសិដ្ឋាន សណ្ឋាគារ ផ្ទះសំណាក់ ភោជនីយដ្ឋាន ក្លឹបកំសាន្តនានា នៅក្នុងខេត្តកំពង់ចាម ដើម្បី រួមគ្នាបង្ការជម្ងឺ Covid-19 នេះផងដែរ ៕