កំពង់ចាម: ដេីម្បីចូលរួមជាមួយរាជរដ្ឋាភិបាល ក្នុងការបង្ការទប់ស្កាត់ការរីករាលដាលនៃជំងឺកូវីដ១៩ ដែលពិភពលោកកំពុងតែមានការព្រួយបារម្ភនោះ នាព្រឹកថ្ងៃទី២១ ខែមេសា ឆ្នាំ
២០២០នេះ លោកស្រី ស៊ុន ចន្ថា មេឃុំកោះសូទិន និងលោក ហ៊ាប សេរីវុធ ស្ថាបនិកអង្គការមូលនិធិគាំពារកុមារ បានដឹកនាំមន្ត្រីពាក់ព័ន្ធ និងដោយមានការចូលរួមពីសហភាពសហព័ន្ធយុវជនកម្ពុជា បាននាំយកសាប៊ូ និងខិត្តប័ណ្ណ ចែកជូនបងប្អូនប្រជាពលរដ្ឋ ទៅដល់ខ្នងផ្ទះ ប្រមាណជាង២០០០គ្រូសារ នៅក្នុងឃុំកោះសូទិន ស្រុកកោះសូទិន ខេត្តកំពង់ចាម ក្នុងគោលបំណងចូលរួមប្រយុទ្ធប្រឆាំងនឹងការឆ្លងរាតត្បាតនៃវីរុសកូរ៉ូណាដ៏កាចសាហាវនេះ។
លោកស្រី ស៊ុន ចន្ថា មេឃុំកោះសូទិន បានឲ្យដឹងថា ក្នុងការបេីកយុទ្ធនាការផ្សព្វផ្សាយសារអប់រំអំពីវិធានការការពារទប់ស្កាត់ការឆ្លងរីករាលដាលនៃជំងឺកូវីដ១៩នេះ ដោយមានការចូលរួមចំណែកពីអង្គការមូលនិធិគាំពារកុមារ ដែលបានឧបត្ថម្ភជាសាប៊ូ ជាង២០០០ដុំ សម្រាប់ចែកជូនបងប្អូនប្រជាពលរដ្ឋ ទៅតាមខ្នងផ្ទះ ដេីម្បីឲ្យមានការយល់ដឹងបន្ថែមពីការធ្វើអនាម័យជាប្រចាំ ជៀសវាងការឆ្លងជំងឺផ្សេងៗ ជាពិសេសគឺជំងឺកូវីដ១៩នេះតែម្ដង ដែលជាជំងឺដ៏កាចសាហាវ ធ្វើឲ្យពិភពលោកមានការឧបត្តម្ភផងដែរ។
ក្នុងយុទ្ធនាការនេះដែរ ក្រុមការងារក៏បានធ្វេីការផ្សព្វផ្សាយ អំពីការចូលរួមបង្ការទប់ស្កាត់ការរីករាលដាលនៃជំងឺកូវីដ១៩ ដោយផ្តើមចេញពីការថែរក្សាអនាម័យផ្ទាល់ខ្លួន ក្នុងគ្រួសារ ក៏ដូចជានៅក្នុងសហគមន៍ទាំងមូល ពោលគឺត្រូវជៀសវាងការជួបជុំគ្នាក្នុងពិធីធំៗ និងត្រូវពាក់ម៉ាស់នៅទីប្រជុំជន ព្រមទាំងលាងសម្អាតដៃដោយសាប៊ូ អាល់កុល ឬជែលសម្លាប់មេរោគ និងវាស់ស្ទង់កម្ដៅជារៀងរាល់ថ្ងៃ ស្របតាមការណែនាំ របស់ក្រសួងសុខាភិបាលផងដែរ ៕
