កំពង់ចាម: លោក មាស ធីបញ្ញា និងសហការី នៅរសៀលថ្ងៃទី២១ ខែមេសា ២០២០នេះ បានចូលរួមបរិច្ចាគថវិកាផ្ទាល់ខ្លួនចំនួន ១ លានរៀល ,ម៉ាស់ ១.០០០ , សាប៊ូ ១,០០០ដុំ ជែលលាងដៃ ១០០ ដប និងភេសជ្ជៈ អាដេ ចំនួន ១០ កេះ ផ្តល់ជូន លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រយុទ្ធនិងជំងឺកូវីដ-១៩ ខេត្ត ដើម្បីប្រើប្រាស់ ក្នុងយុទ្ធនាការប្រយុទ្ធនឹងជំងឺកូវីដ-១៩។
ក្នុងឱកាសនោះដែរ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធនឹងជំងឺកូវីដ១៩ បានថ្លែងអំណរគុណ ដល់លោក មាស ធីបញ្ញា និងសហការី ទាំងអស់ ដែលបានចូលរួមចំណែក ក្នុងការឧបត្ថម្ភជាថវិកា សម្រាប់គណៈកម្មការប្រយុទ្ធនឹងជំងឺកូវីដ១៩ ខេត្តកំពង់ចាម យកទៅប្រេីប្រាស់ តាមតម្រូវការចាំបាច់ ក្នុងយុទ្ធនាការនានា ដេីម្បីរួមគ្នាបង្ការទប់ស្កាត់ការឆ្លងរីករាលដាលនៃជំងឺដ៏កាចសាហាវនេះ។
គួរបញ្ជាក់ថា ខេត្តកំពង់ចាម កន្លងមកមានអ្នកកេីតជំងឺកូវីដ១៩ សុទ្ធសឹងតែជាជនបរទេស សរុបចំនួន១៦នាក់ ។ តែរហូតមកដល់ពេលនេះ គឺក្រុមគ្រូពេទ្យខេត្តកំពង់ចាម បានធ្វេីការព្យាបាលអ្នកផ្ទុកវីរុសទាំងនោះ បានជាសះស្បើយអស់ហើយ។
ជាមួយគ្នានោះ អាជ្ញាធរខេត្តកំពង់ចាម នៅតែបន្តការប្រុងប្រយ័ត្នខ្ពស់ដដែល ដោយបានបំពាក់ម៉ាស៊ីនស្វ័យប្រវត្តិបាញ់សម្លាប់មេរោគ នៅតាមច្រកចេញចូលសំខាន់ៗ ដេីម្បីសម្រួលដល់ការធ្វើអនាម័យ ព្រមទាំងបានបន្តការផ្សព្វផ្សាយសារអប់រំ អំពីការធ្វើអនាម័យ ដើម្បីចៀសផុតពីការឆ្លងជំងឺដ៏កាចសាហាវនេះផងដែរ ៕