កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានថ្លែងអះអាងថា ចំពោះស្ថានភាពការរីករាលដាលនៃជំងឺកូវីដ១៩ ដែលជាជំងឺដ៏កាចសាហាវមួយ ជាកង្វល់ និងការព្រួយបារម្ភ របស់ប្រជាជនលើពិភពលោក ក៏ដូចជាប្រជាជនកម្ពុជាដែរ ត្រូវបានប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន ដោយបានដាក់ចេញនូវផែនការ យុទ្ធសាស្ត្រ ប្រយុទ្ធប្រឆាំងនឹងវីរុសកូរ៉ូណា ក្នុងក្របខ័ណ្ឌទូទាំងប្រទេស ទទួលបានលទ្ធផលជាទីមោទនៈ ដោយយេីងអាចទប់ទល់ស្ថានការណ៍រីករាលដាលនៃជំងឺកូវីដ១៩បាន និងមិនបានធ្វេីឲ្យប្រជាពលរដ្ឋកម្ពុជាណាម្នាក់ ស្លាប់ដោយសារជំងឺដ៏កាចសាហាវនេះឡើយ។ 
ការថ្លែងយ៉ាងដូច្នេះក្នុងពិធីជួបសំណេះសំណាលផ្តល់ការលើកទឹកចិត្តដល់ថ្នាក់ដឹកនាំ និងមន្ត្រីសុខាភិបាល នៃមន្ទីរពេទ្យខេត្តកំពង់ចាម នាព្រឹកថ្ងៃទី២៨ ខែមេសា ឆ្នាំ២០២០ ក្រោមវត្តមានឯកឧត្ដម ព្រុំ សុខា រដ្ឋមន្ត្រីក្រសួងមុខងារសាធារណៈ និងឯកឧត្តម ខ្លូត ផន ប្រធានក្រុមប្រឹក្សាខេត្ត ព្រមទាំងមានការចូលរួមពីថ្នាក់ដឹកនាំ មន្ត្រីរាជការជាច្រើនរូបផងដែរ។
បន្ទាប់ពីថ្លែងការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីសុខាភិបាល ដែលបានបំពេញភារកិច្ចជួរមុខនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលេីកឡើងថា ពាក់ព័ន្ធនឹងការឆ្លងរីករាលដាលនៃជំងឺកូវីដ១៩នេះ រដ្ឋបាលខេត្តកំពង់ចាម បានរៀបចំកន្លែងសម្រាប់ចត្តាឡីស័ក ចំនួន៣កន្លែង សរុប១៧៩បន្ទប់ ស្មើនឹង៧៥៦គ្រែ កន្លងមកអ្នកជំងឺកូវីដ១៩ មានចំនួន១៦នាក់ ដែលបានព្យាបាលនៅក្នុងមន្ទីរពេទ្យខេត្តកំពង់ចាម ក្នុងនោះមាន ជនជាតិអាមេរិក ២នាក់ ជនជាតិអង់គ្លេស ៥នាក់ ជនជាតិម៉ាឡេស៊ី ៨នាក់ ជនជាតិខ្មែរ ១នាក់ បានឆ្លងនៅក្នុងប្រទេស គឺជាអ្នកធ្វើការផ្ទាល់ និងស្នាក់នៅជាមួយជនជាតិម៉ាឡេស៊ី ដែលមានជំងឺកូវីដ១៩ ។
ក្រោយពីទទួលបានការព្យាបាលយ៉ាងយកចិត្តទុកដាក់ ពីសំណាក់ក្រុមគ្រូពេទ្យរបស់យេីង អ្នកជំងឺទាំងអស់បានជាសះស្បើយ ហើយត្រឡប់ទៅកាន់គេហដ្ឋាន និងប្រទេសរបស់គេវិញអស់ហើយ ។ 
ឯកឧត្តមអភិបាលខេត្ត បានបន្តថា បន្ទាប់ពីបានបំពេញភារកិច្ចជួរមុខតាមកាលកំណត់ យេីងបានធ្វើចត្តាឡីស័កដល់មន្ត្រីទាំងអស់ ចំនួន១៤ថ្ងៃ ដោយដាក់ឲ្យសម្រាកដាច់ដោយឡែក ក្នុងអាគារដែលមានស្រាប់ ប្រកបដោយសុខសុវត្ថិភាព ដេីម្បីស្រាវជ្រាវរកមេរោគកូវីដ១៩ ជាលទ្ធផលអវិជ្ជមានផងដែរ ។ 
ឯកឧត្តមអភិបាលខេត្ត បានបន្តទៀតថា បច្ចុប្បន្ននេះគណៈកម្មាធិការខេត្តប្រយុទ្ធនឹងជំងឺកូវីដ១៩ ថ្នាក់ដឹកនាំមន្ទីរពេទ្យខេត្តមានកិច្ចការមួយទៀត គឺរៀបចំក្រុមការងារចម្រុះសម្រាប់ធ្វើការស្រាវជ្រាវរកមេរោគ កូវីដ១៩ ចំពោះការវិលត្រឡប់មកមាតុភូមិវិញ របស់បងប្អូន កម្មករដែលបានធ្វើការនៅបរទេស និងកម្មករ កម្មការិនីរោងចក្រ ដោយមាន ចំនួនដ៏ច្រើនយេីងបានធ្វើការស្រាវជ្រាវរកមេរោគកូវីដ-១៩នេះ ដោយបង្កើតកន្លែងស្គ្រីន២កន្លែង គឺមួយនៅមន្ទីរពេទ្យខេត្តកំពង់ចាម ដែលមានស្រាប់ និងមួយកន្លែងទៀតនៅសណ្ឋាគារមេគង្គ ។ 
រហូតមកដល់ថ្ងៃទី២៧ខែមេសានេះ ការស្រាវជ្រាវរកមេរោគកូវីដ-១៩ លេីបងប្អូនកម្មករ រោងចក្រ និងពលករ មកពីបរទេស បានចំនួន ៧៥៥ នាក់ ។ រីឯការយកសំណាកបាន ៥៥០សំណាក តែយើងពុំបានរកឃើញនូវករណីថ្មីនោះទេ ។ ដោយឡែកចំពោះពលករ ពលការិនី ដែលបានអនុវត្តចត្តាឡីស័ក ដោយស្នាក់នៅដាច់ដោយឡែក រយៈពេល ១៤ថ្ងៃ មកទល់នឹងថ្ងៃនេះមានចំនួន ២,៩២៦នាក់ បានសមាហរណកម្មទៅក្នុងសហគមន៍ និងគ្រួសារវិញនៅសល់ចំនួន ១១០នាក់ កំពុងបន្តអនុវត្តន៍ ៕
