កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានថ្លែងក្រេីនរំលឹកដល់មន្ត្រីពាក់ព័ន្ធ ឲ្យបន្តការផ្សព្វផ្សាយតាមការណែនាំរបស់ក្រសួងសុខាភិបាល និង
អង្គការសុខភាពពិភពលោក(WHO) និងបន្តការផ្សព្វផ្សាយ ដោយការចាក់ផ្សាយតាមឃោសនស័ព្ទ និងឧបករណ៍បំពងសំឡេងទៅដល់គ្រប់ទីកន្លែង បេីទោះបីជាជំងឺជំងឺកូវីដ១៩នៅកម្ពុជាមានការស្ងប់ស្ងាត់ក៏ដោយ ព្រមទាំងបន្តការគ្រប់គ្រងលេីពលករមកពីក្រៅប្រទេស ដូចជាប្រទេសថៃ ឬប្រទេសកូរ៉េជាដើម និងបន្តពិនិត្យលេីជីវភាពរស់នៅរបស់បងប្អូនប្រជាពលរដ្ឋក្រីក្រ ដើម្បីធ្វើការជួយសង្គ្រោះឲ្យទាន់ពេលវេលាផងដែរ។
ការថ្លែងយ៉ាងដូច្នេះក្នុងកិច្ចប្រជុំបូកសរុបការងារបង្ការទប់ស្កាត់ការឆ្លងរីករាលដាលនៃជំងឺកូវីដ១៩ នៅក្នុងខេត្តកំពង់ចាម នាព្រឹកថ្ងៃទី២៨ ខែឧសភា ឆ្នាំ២០២០ ក្រោមវត្តមានឯកឧត្ដម ខ្លូត ផន ប្រធានក្រុមប្រឹក្សាខេត្ត ដោយមានការចូលរួមពីអភិបាលរងខេត្ត ថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត និងអភិបាលក្រុង-ស្រុកទាំង១០ផងដែរ។
