ខេត្តកំពង់ធំ៖ ខ្នងផ្ទះទី១៥៦ និងខ្នងផ្ទះទី១៥៧ ដែលជាអំណោយដ៏ថ្លៃថ្លារបស់សម្ដេចតេជោហ៊ុន សែន ប្រធានសមាគមអតីតយុទ្ធជនកម្ពុជា ដែលបានសាងសង់ដោយ គណៈកម្មាធិការសមាគមអតីតយុទ្ធជន កម្ពុជា ខេត្តកំពង់ធំ និងត្រូវបានប្រគល់ជូន គ្រួសារអតីតយុទ្ធជនពិការ និងគ្រួសារអតីតយុទ្ធជនពលី រស់នៅឃុំគគីរធំ និងឃុំចើងដើង ស្រុកបារាយណ៍ ខេត្តកំពង់ធំ ព្រឹកថ្ងៃទី០៣ ខែមិថុនា ឆ្នាំ២០២០ ។
ឯកឧត្ដម ឧត្ដមសេនីយ៍ទោសោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ បានអញ្ជើញជាអធិបតីភាព ក្នុងពិធីប្រគល់ផ្ទះថ្មីជូនដល់ គ្រួសារអតីតយុទ្ធជនទាំង២គ្រួសារ គឺតាមរយះ ឯកឧត្តម នាយ ឧត្ដមសេនីយ៍គន់ គីម ទេសរដ្ឋមន្រ្តី អគ្គលេខាធិការសមាគមអតីតយុទ្ធជនកម្ពុជា ក្នុងពិធីនេះ មានការចូលរួម ពីអាជ្ញាធរដែនដី កងកម្លាំង ប្រដាប់អាវុធទាំងបី ចូលរួមផងដែរ ។
ឯកឧត្តម ឧត្ដមសេនីយ៍ទោសោម ស៊ុន បានថ្លែងអំណរគុណ ដ៍ជ្រាលជ្រៅជាទីបំផុត ចំពោះបងប្អូនអតីត យុទ្ធជនយើង ដែលបានលះបង់សាច់ស្រស់ ឈាមស្រស់ ដើម្បីបុព្វហេតុជាតិ និងប្រជាជន ក្នុងសម័យ សង្គ្រាមកន្លងមក ដើម្បីរួមចំណែកជាមួយសម្តេចតេជោហ៊ុន សែន ក្នុងការអនុវត្តន៍ គោលនយោបាយឈ្នះ ឈ្នះ ធ្វើឲ្យប្រទេសជាតិ យើងមានសុខសន្តិភាពពេញលេញ និងការអភិវឌ្ឍន៍រីកចម្រើនដូចសព្វថ្ងៃនេះ ។
ផ្ទះថ្មីដែលប្រគល់ ជូនគ្រួសារអតីតយុទ្ធជនមានទំហំ៤ម៉ែត្រ x ៦ម៉ែត្រ សាងសង់ខ្ពស់ផុតពីដី សសរបេតុង ឆ្អឹងដែកជញ្ជាំងនិងដំបូលប្រក់ស័ង្កសីកិនភ្លី រនាបក្រាលក្តារ ជណ្ដើរកាច់ គ្រួសារទី១ លោក ឌឹត អ៊ឹម អាយុ៥៦ឆ្នាំអតីត យុទ្ធជនពិការ មានសមាជិកក្នុងបន្ទុក ៥ នាក់ រស់នៅភូមិទូកពីរ ឃុំគគីរធំ ស្រុកបារាយណ៍ ខេត្តកំពង់ធំ ទី២ លោកយាយ គា សាំ អាយុ៧៥ ឆ្នំា ជាគ្រួសារអតីតយុទ្ឋជនពលី មានសមាជិកក្នុងបន្ទុកគ្រួសារ ចំនួន បី នាក់ រស់នៅភូមិពណ្ណរាយណ៍ ឃុំចើងដើង ស្រុកបារាយណ៍ ខេត្តកំពង់ធំ ។
ក្រុមការងារគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ បានជួយឧបត្ថម្ភ អំណោយរបស់ ឯកឧត្តម ឧត្ដមសេនីយ៍ឯក ហ៊ុន ម៉ាណែត ក្នុងមួយគ្រួសារទទួលបានអង្ករ៥០ គ.ក មីចំនួន២កេស ទឹកត្រី ទឹកស៊ីអ៊ីវ២យួរ និងសម្ភារៈប្រើប្រាស់ផ្ទះបាយ រួមទាំងថវិកាមួយចំនួនផងដែរ ។
ឯកឧត្តម ឧត្ដមសេនីយ៍ទោ សោម ស៊ុន ក៍បានផ្សព្វផ្សាយសេចក្តីណែនាំ របស់ក្រសួងសុខាភិបាល ស្តីពី វិធានការ ការពារទប់ស្កាត់ ការឆ្លងរីករាលដាលមេរោគកូវីដ១៩ COVID-19 ជូនប្រជាពលរដ្ឋ ដែលបាន ចូលរួមក្នុងកម្មវិធី ដើម្បីឲ្យបងប្អូន បន្តការប្រុងប្រយ័ត្នខ្ពស់ កុំឲ្យមានការឆ្លងរោគ កូវីដ១៩ COVID-19 ក្នុងក្រុម គ្រួសារ ក៏ដូចជាសហគមន៍យើង ។
ដោយ ប៊ុន រដ្ឋា
