ខេត្តបាត់ដំបង ៖ រថយន្តធុនធ្ងន់ដែលជារថយន្តបង្ក ហើយក៏ជារថយន្តរបស់លោកឧកញ៉ាមួយរូប បាននិងកំពុងជម្រុញអោយសមត្ថកិច្ចចរាចរណ៍ផ្លូវគោកខេត្តបាត់ដំបង បញ្ជូនសំណុំរឿងទៅតុលាការ វាផ្ទុយពីគោលការណ៍របស់សមត្ថកិច្ចជំនាញ បន្ទាប់ពីរថយន្តរបស់លោកឧកញ៉ារូបនោះ បានបើករេទៅបុកនឹងរថយន្តតូច ដែលបង្កអោយខ្ទេចខ្ទីរថយន្តតូចយ៉ាងដំណំ និងធ្វើអោយភាគីរថយន្តតូចរងរបួសចំនួន ៣ នាក់ ។
គួររំលឹកដែរថា ករណីគ្រោះថ្នាក់ចរាចរណ៍នេះ បានកើតឡើងកាលពីថ្ងៃទី ២៩ ខែ មិថុនា ឆ្នាំ ២០២០ វេលាម៉ោង ៩ និង ១៥ នាទី ព្រឹក លើកំណាត់ផ្លូវជាតិលេខ ៥៦ ត្រង់ចំណុចផ្លូវកោង ក្នុងភូមិសំណាញ់ ឃុំភ្នំសំពៅ
ស្រុកបាណន់ ខេត្តបាត់ដំបង រវាងរថយន្តធុនធ្ងន់ម៉ាក ហុីយ៉ាន់ដាយ ដឹកដី គ្មានស្លាកលេខ របស់ក្រុមហ៊ុនលោកឧកញ៉ា នឹម ម៉េង ជាមួយនិងរថយន្តម៉ាកព្រូស ព៌ណទឹកប្រាក់ ពាក់ស្លាកលេខ បាត់ដំបង 2B-8483 ក្នុង
ទិសដៅច្រាស់គ្នា ។
ប្រភពនៅកន្លែងកើតហេតុ ក៏ដូចជាភាគីរថយន្តព្រូស ដែលជារថយន្តរងគ្រោះ បានបញ្ជាក់ថា នៅមុនពេល
កើតហេតុ គឺរថយន្តតូចបានបើកបរនៅលើផ្លូវជាតិលេខ ៥៧ នេះ ក្នុងទិសដៅពីប៉ៃលិន ទៅបាត់ដំបង លុះ
មកដល់ត្រង់ចំណុចកើតហេតុខាងលើ ក៏ស្រាប់តែរថយន្តធុនធ្ងន់ខាងលើ បានបើកបរមកពីមុខ ( ច្រាស់ទិសគ្នា )
បានរេមកឆ្វេង ហើយបាន បុកទាំងកម្រោលតែម្តង រួចក៏ជ្រុលចូលទៅក្នុងព្រៃក្បែផ្លូវ បណ្តាលអោយក្បាលរថយន្តធុនតូចត្រូវខ្ទេចទាំងស្រុង នៅពេលនោះដែរអ្នកបើកបររយន្តតូចឈ្មោះ នឿន នឿត ភេទប្រុស អាយុ ៣០ ឆ្នាំ រស់នៅភូមិនំក្រៀប សង្កាត់ព្រែកព្រះស្តេច ក្រុងបាត់ដំបង បានរងរបួសបន្តិចបន្ទួច ដោយឡែក
ស្ត្រីដែលជាភរិយា បានរងរបួសធ្ងន់ ដោយក្រុមគ្រូពេទ្យបានអះអាងថា មានការស្រាំឆ្អឹងជំនីខាងឆ្វេងចំនួន ២លើកដៃមិនទាន់រួចឡើយ និងកូនតូចម្នាក់អាយុ ១០ ខែ មានការប៉ះទង្គិចត្រង់ក្បាល ដែលភ្លាមៗធ្វើអោយ
កុមារនេះមានការក្អួតចង្អោរផង ។
ភ្លាមៗនោះដែរ សមត្ថកិច្ចចរាចរណ៍ក៏បានទៅដល់ដើម្បីធ្វើការវាស់វែង និងនា រថយន្តទាំងពីរគ្រឿង ទៅកាន់ការិយាល័យចរាចរណ៍ផ្លូវគោកខេត្ត នៅពេលនោះទើបដឹងថា អ្នកបើកបររថយន្តធុនធ្ងន់របស់ក្រុមហ៊ុនលោក
ឧកញ៉ា នឹម ម៉េង មានឈ្មោះ មាស សាលឿន ភេទប្រុស អាយុ ៣៣ ឆ្នាំ រស់នៅភូមិភ្នំសំពៅកើត ឃុំភ្នំសំពៅស្រុកបាណន់ ខេត្តបាត់ដំបង ។
ព័ត៌មានដែល កម្ពុជាថ្មី ទទួលបានពីមន្ត្រីចរាចរណ៍ គឺបានលើកឡើងថា សមត្ថកិច្ចបានកោះហៅអោយភាគីទាំងសងខាងចូលខ្លួនមកកាន់ការិយាល័យ ដើម្បីរកដំណោះស្រាយ ដោយភាគីរងគ្រោះបានសំណូមពរនូវទឹកប្រាក់ចំនួន ៥ ០០០ ដុល្លារ ប៉ុន្តែត្រូវបានដំណាងរថយន្តបង្កស្តីអោយទំងសម្តីអសុរសថា បើកបររវល់តែសន្ទនាគ្នា បានជាមិនមើលខាងមុខ គួរតែបើកគេចចេញនៅពេលដែលឃើញរថយន្តធំរេមកចំ តែនេះមិនព្រមគេច ។
សម្តីដ៏លីលានេះ បានធ្វើអោយមជ្ឈដ្ឋានមួយចំនួន ពិសេសមន្ត្រីចរាចរណ៍មានអារម្មណ៍មិនពេញចិត្តទាល់តែសោះ ព្រោះអ្នកណាដែលអាចមានទ្រង់ញាណដឹងថា រថយន្តធំនឹងរេមកបុក ហើយអ្នកណាដែលអាចបើកគេចទាន់ នៅពេលដែលរថយន្តធំនោះរេមកចំទៅហើយនោះ គឺមានតែខ្មោច ព្រាយ បិសាច និង អសុរកាយ ប៉ុណ្ណោះ ដែលអាចហោះហើរគេចចេញពីមុខរថយន្តធំបាន ឬមួយក៏ដំណងដែលចូលខ្លួនមកដោះស្រាយ ធ្លាប់ក្លាយជាពពួកខាងលើ បានជាមានមាត់ចេះតែនិយាយ ?
ទីបំផុត ការរកដំណោះស្រាយមួយលើកជា ពីរលើក នៅតែភាគីបង្កមិនព្រមចូលខ្លួន ដោយគេមិនដឹងថាលោកឧកញ៉ារូបនោះ សំអាងទៅលើអ្វី បានជាមិនគិតអំពីផ្លូវច្បាប់បន្តិចសោះ ហើយបច្ចុប្បន្នខ្លួនជាអ្នកខុស
បែរជាប្រឹង ជម្រុញអោយសមត្ថកិច្ចចរាចរណ៍ បញ្ជូនសំណុំរឿងទៅតុលាការ ទៅវិញ ឬមួយក៏នៅតុលាការសុទ្ធតែជាខ្សែ វល្លិ៍ របស់លោកឧកញ៉ា ? បានជាមិនព្រមសម្របសម្រួលអោយចប់ត្រឹមការិយាល័យ ?
បើទោះបីជាបច្ចុប្បន្នភាគីរងគ្រោះមិនទាន់បានទទួលសំណង ១ រៀល ហើយកំពុងសម្រាកព្យាបាលខ្លួនក៏ដោយក៏ប្រភពជាច្រើនកំពុងរង់ចាំមើលថា តើច្បាប់អាចរកយុត្តិធ៌មជូនដល់ជនរងគ្រោះបានដែរឬទេ ? លោក ចាន់
សុធី នាយការិយាល័យ ចរាចរណ៍ផ្លូវគោកបានបញ្ជាក់ប្រាប់ កម្ពុជាថ្មី ថា រឿងនេះលោកដាច់ខាតត្រូវតែបញ្ជូនសំណុំរឿងទៅកាន់តុលាការ ព្រោះនៅការិយាល័យភាគីបង្កមិនព្រមចូលខ្លួនទាល់តែសោះ ដូច្នេះលោក
ប្រគល់នាទីទៅអោយតុលាការជាអ្នកវិន្និច្ឆ័យតាមផ្លូវច្បាប់ទៅចុះ ៕ សោ និយមរ័ត្ន
