ខេត្តកំពង់ធំ ល្បីកក្រើកពេញស្រុកស្ទោង ខណៈពេលដែល បុរសជើងខ្លាំងតែលើប្រពន្ឋខ្លួនឯង ដោយវ៉ៃប្រពន្ឋម្តងហើយម្តងទៀត ស្ទើរតែស្លាប់ រហូតដល់បាក់ជើង ហើមមុខហើមមាត់ ស្រ្តីរងគ្រោះរត់មកពឹង ប៉ូលិសប៉ុស្តិ៍ រត់ពឹងអធិការស្រុកស្ទោង តែអាជ្ញាធរដែលជាម៉ែ ជាឪ ពុំមានដំណោះស្រាយ បណ្តោយឲ្យជនដៃដល់ជាប្តី វ៉ៃដំច្រំធាក់តាមអំពើចិត្ត។
ជាក់ស្ដែងបុរសជាប្តី ដែលត្រូវបានគេដឹងថា ល្បីជើងខ្លាំងខាងប្រើអំពើហឹង្សាទៅប្រពន្ធដែលជាជនរងគ្រោះ បានធ្វើសកម្មភាព វ៉ៃធាក់បណ្តាលឲ្យ ប្រពន្ធរបួសស្ទើរសុះសាច់ ជាំមុខជាំមាត់ និងតាមរាងកាយ ត្រូវបានលោកវរសេនីយ៍ត្រី ឃុន ភារ: មេបញ្ជាការកងរាជអាវុធហត្ថស្រុកស្ទោង រួមទាំងមន្ត្រីក្រោមឨវាទ ចាប់ឃាត់ខ្លួន បុរសជាប្តីឈ្មោះ.ត្រេង ឡូញ (ហៅស្វិត) ភេទប្រុស អាយុ37ឆ្នាំ រស់នៅភូមិកំពង់ក្តី, ឃុំកំពង់ចិនត្បូង, ស្រុកស្ទោង, ខេត្តកំពង់ធំ កាលពីវេលាម៉ោង 16:00នាទី ថ្ងៃទី08 ខែ08 ឆ្នាំ2020 ដោយមានការសម្របសម្រួលនីតិវិធីពីលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ។
យោងតាមសេចក្តីរៀបរាប់របស់ជនរងគ្រោះជាប្រពន្ឋ ឈ្មោះ កែ ឌីណា ភេទស្រី អាយុ37ឆ្នាំ រស់នៅភូមិកំពង់ក្តី, ឃុំកំពង់ចិនត្បូង, ស្រុកស្ទោង ខេត្តកំពង់ធំ បានឲ្យដឹងថា ខ្លួនរងទុក្ខវេទនាជាខ្លំាង ដោយសារប្តីរបស់នាងឈ្មោះ ត្រេង ឡូញ (ហៅស្វិត) តែងតែប្រើអំពើហិង្សាមកលើរូបនាង ជាបន្តបន្ទាប់ ដោយការវ៉ៃដាំច្រំធាក់ រហូតបាក់ជើងម្តងមកហើយ តែនាងតែងតែលាក់បាំងនឹងម្តាយ និងបងប្អូន ដោយមិនចង់ឲ្យគេដឹងទេ ដោយសារប្តីរូបនេះ នាងជាអ្នកសម្រេចចិត្តយកដោយខ្លួនឯង។
ប្អូនស្រី កែ ឌីណា បានបន្តថា ប្តីរបស់នាងបានវ៉ៃធ្វើបាបសរុបទាំងពេលនេះ 6ដងហើយ ហើយកន្លងមកប្អូនបាន ទៅដាក់ពាក្យប្តឹងទៅប៉ុស្ត៍រដ្ឋបាលកំពង់ចិនត្បូង តែមេប៉ុស្ត៍ថា មិនហ៊ានដោះស្រាយ ហើយធ្លាប់ប្តឹងនៅសាលាស្រុកស្ទោង ក៏មន្រ្តីស្រុកមិន ហ៊ានដោះស្រាយ ហើយថែមទាំងជម្រុញឲ្យនាងទៅដាក់ពាក្យនៅតុលាការ តែនាងបានត្រឹមតែក្តីអស់ សង្ឃឹមដោយសារតែ ពេលមានទុក្ខ រត់ពឹងអាជ្ញាធរ ដល់អាជា្ញធរមិនដោះតើឲ្យនាងទៅពឹងនណា?…។
ទើបតែពេលនេះ ក្រោមការ ដឹកនាំរបស់លោកស៊ិន វិរ: ព្រះរាជអាជ្ញា អយ្យការអមសាលាដំបូង ខេត្តកំពង់ធំ បានបញ្ជាឲ្យ កម្លាំងកងរាជអាវុធហត្ថខេត្តស្រុកស្ទោង ដែលសម្របសម្រួលដោយ លោក សាយ វាសនា ចាប់ឃាត់ខ្លួន នាំជនដៃដល់
មកចាត់ការតាមនីតិវិធីច្បាប់
តាមពាក្យបណ្តឹងហិង្សាដោយចេតនាប្រព្រឹត្តដោយសហព័ទ្ធ ឬអនិតិសង្វាសជន។ដោយប៊ុនរដ្ឋា
