កំពង់ចាម: កូនឈើប្រណិតចំនួន១០០០ដេីម ត្រូវបានអាជ្ញាធរខេត្តកំពង់ចាម បានដាំនៅអមសងខាងផ្លូវថ្មី ខណៈដែលស្ពានឆ្លងកាត់ស្រុកស្ទឹងត្រង់-ក្រូចឆ្មារ កំពុងសាងសង់សម្រេចបានប្រមាណជា៩០% ដែលជាចំណងដៃដ៏ថ្លៃថ្លា
របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា។ ការដាំកូនឈើនេះត្រូវបានធ្វេីឡើងនាព្រឹកថ្ងៃទី១១ ខែតុលា ឆ្នាំ២០២០ ក្រោមវត្តមានឯកឧត្ដម អ៊ុន ចាន់ដា អភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត រួមជាមួយថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត អាជ្ញាធរមូលដ្ឋាន សិស្សានុសិស្ស និងបងប្អូនប្រជាពលរដ្ឋជាច្រើនរូបផងដែរ។
ថ្លែងក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងថា ការដាំដើមឈើនៅថ្ងៃនេះ មានគោលបំណង រួមគ្នាក្នុងអភិរក្សធនធានធម្មជាតិដែលកំពុងតែរិចរិល និងចូលរួមក្នុងការកាត់បន្ថយការបម្រែបម្រួលអាកាសធាតុ ហើយក៏ជាការលើកកម្ពស់សោភ័ណភាពបរិស្ថានបៃតងនៅក្នុងទីប្រជុំជនទៀតផង។ 
ឯកឧត្តមអភិបាលខេត្ត បានបន្តថា សមិទ្ធិផលជាប្រវត្តិសាស្ត្រ “ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ” គឺជាចំណងដៃដ៏ថ្លៃថ្លារបស់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះប្រជាពលរដ្ឋក្នុងស្រុកស្ទឹងត្រង់ ជាស្ពានដ៏ល្អប្រណិត ដែលបម្រើដល់សេដ្ឋកិច្ចជាតិ ក៏ដូចជាសេដ្ឋកិច្ចក្នុងខេត្តកំពង់ចាម។ 
ជាមួយគ្នានោះ ឯកឧត្តមអភិបាលខេត្ត ក៏បានសង្កត់ធ្ងន់ថា ការដាំដើមឈើនាពេលនេះ ជាការបណ្ដុះនូវគំនិតយុវជន ប្រជាពលរដ្ឋទាំងអស់ ឲ្យស្រឡាញ់ថែរក្សា និងបន្តការដាំដុះដើមឈើក្នុងសហគមន៍ ដូច្នេះសូមឲ្យបងប្អូនប្រជាពលរដ្ឋ ជាពិសេសអាជ្ញាធរមូលដ្ឋាន ចូលរួមការពារថែរក្សាទុកជាមរតកសម្រាប់ឲ្យកូនចៅជំនាន់ក្រោយផងដែរ។
គួរបញ្ជាក់ថា៖ ដើម្បីចូលរួមលើកកម្ពស់សោភ័ណភាព នៅបណ្តោយផ្លូវថ្មី ឲ្យសាកសមជាទីប្រជុំជន និងជាទីមនោរម្យប្រកបដោយបរិយាកាស បរិស្ថានស្អាតសម្រាប់បងប្អូនដែលរស់នៅតំបន់ និងអ្នកធ្វើដំណើរឆ្លងកាត់តំបន់នោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានរៀបចំដើមឈើជាប្រភេទឈើប្រណិត ចំនួន៨០០ដើម ដាំនៅបណ្តោយផ្លូវថ្មីចាប់ពីគល់ស្ពាន ដល់រង្វង់មូលថ្មី និងចំនួន ២០០ដើម នៅតាមដងផ្លូវតាមមាត់ទន្លេក្នុងទីប្រជុំជនស្រុកស្ទឹងត្រង់ ដេីម្បីប្រែក្លាយជាតំបន់នោះឲ្យមានបរិស្ថានបៃតង និងសោភ័ណភាពស្រស់បំព្រងផងដែរ ៕
