ខេត្តកំពង់ធំ,: ឯកឧត្តម សុខ លូ អភិបាលខេត្តកំពង់ធំ បានអញ្ជើញជាអធិបតីភាព ក្នុងពិធីអបអរសាទរ ទិវាទេសចរណ៍ពិភពលោកស្អាត ក្រោមប្រធានបទទេសចរណ៍ និងការអភិវឌ្ឍជនបទ ដោយការចូលរួមពីលោកម៉ាក ប៊ុនហុង អភិបាលក្រុងស្ទឹងសែន លោក សេង អាន ប្រធានមន្ទីរទេសចរណ៍ខេត្តកំពង់ធំ និងមន្ទីរជុំវិញខេត្ត រួមទាំងកងកម្លាំងប្រដាប់អាវុធទាំង៣ប្រភេទ រួមគ្នាសំអាតបរិស្ថាន ក្នុងបរិវេណក្រុងស្ទឹងសែន នៅព្រឹកថ្ងៃទី ១៤ ខែតុលាឆ្នាំ ២០២០។ 
ឯកឧត្តមសុខ លូ អភិបាលខេត្ត កំពង់ធំ បានអានសារសម្តេចតេជោ ហ៊ុន សែន អង្គការសុខភាព ពិភពលោក និងភាគីពាក់ព័ន្ធផ្សេងៗ បានទប់ស្កាត់ការរីករាលដាលនៃជំងឺកូវីដ-១៩ COVID-19 ប្រកបដោយប្រសិទ្ធភាពខ្ពស់ គ្មានការឆ្លងរីករាលដាលនៅក្នុងសហគមន៍ គ្មានករណីស្លាប់ មានតែករណីវិជ្ជមាននាំចូលតិចតួចដែលបានទទួលការត្រួតពិនិត្យ ព្យាបាលថែទាំ ដោយគ្រូពេទ្យជំនាញកម្ពុជា គ្រូពេទ្យស្ម័គ្រចិត្ត ក៏ដូចជាអាជ្ញាធរពាក់ព័ន្ធប្រកបដោយភាពហ្មត់ចត់ ក្នុងនោះកម្ពុជា ក៏បានដាក់ចេញនូវវិធាននានា ដើម្បីជួយសង្គ្រោះអាជីវកម្ម បុគ្គលិកបម្រើការងារ ព្រមទាំងប្រជាពលរដ្ឋក្រីក្រ រងផលប៉ះពាល់ដោយជំងឺកូវិដ -១៩ COVID-19 ផងដែរ
ក្នុងករណីនេះ ខ្ញុំព្រះករុណា ពិតជាមានសោកស្តាយក្រៃលែងចំពោះ ការខាតបង់នានារបស់ប្រជាពលរដ្ឋទូទាំងពិភពលោក ដែលបង្កឡើងដោយសារការរីករាលដាលនៃជំងឺកូវិដ-១៩ COVID-19 ខ្ញុំព្រះករុណា សូមអរគុណ និងកោតសរសើរដល់ប្រជាពលរដ្ឋទាំងអស់ដែលបាន សហការចូលរួមអនុវត្តដោយយកចិត្តទុកដាក់អនុវត្តតាមវិធានការសុវត្ថិភាព និងសុខភាពដែលបានដាក់ចេញដោយក្រសួងសុខាភិបាល។
ឯកឧត្តម សុខ លូ អភិបាលខេត្ត កំពង់ធំ បានមានប្រសាសន៍ នៅខេត្តកំពង់ធំមានទីតាំងទេសចរណ៍ជាច្រើនកន្លែង.ដូចជារមណីយដ្ឋានទេសចរណ៍ធម្មជាតិ រមណីយដ្ឋានវប្បធម៌ប្រវត្តិសាស្ត្រ និងរមណីយដ្ឋានកែច្នៃ ខណៈនេះអាជ្ញាធរខេត្តកំពង់ធំកំពុងតែយកចិត្តទុកដាក់គ្រោងនឹងរៀបចំបង្កើតកន្លែងទេសចរណ៍ថ្មីៗ 
ដើម្បីទាក់ទាញភ្ញៀវទេសចរណ៍ក្នុងស្រុកនិងក្រៅស្រុក មកកំសាន្ត បង្កើនប្រាក់ចំណូលរបស់ប្រជាពលរដ្ឋ ជាពិសេស រមណីយដ្ឋានប្រាសាទសំបូរព្រៃគុក ដែលបានដាក់ចូលជា សម្បត្តិបេតិកភណ្ឌពិភពលោក និងកំពុងតែ ដើរតួនាទីសំខាន់ លើឆាកអន្តរជាតិ ហើយសង្ឃឹមថា និងមានភ្ញៀវ ទេសចរណ៍ជាតិ និងអន្តរជាតិមកកំសាន្តជាច្រើននៅពេលខាងមុខនេះមិនខាន នៅពេលស្ថានភាពជំងឺកូវិដ១៩ COVID-19 ត្រូវបានបញ្ចប់។
ក្នុងឱកាសនេះផងដែរ ឯកឧត្តមសុខលូ.បានអំពាវឲ្យកងកម្លាំងនិងមន្ទីរពាក់ព័ន្ឋ រួមទាំងបងប្អូនប្រជាពលរដ្ឋ.ទាំងអស់ត្រៀមជួយសង្រ្គោះនិងជួយអន្តរាគមន៍ ឲ្យបានទាន់ពេលវេលា ដើម្បីរំដោះបងប្អូនប្រជាពលរដ្ឋដែលប្រឈមនិងទឹកជំនន់ និងជនងាយរងគ្រោះ នៅពេលដែលកំណើនទឹកជំនន់ឈានដល់ចំនុចប្រកាសអាសន្ន និងសូមអោយបងប្អូនប្រជាពលរដ្ឋទាំងអស់ ថែរក្សាសុខភាព អនាម័យ ហូបស្អាត ផឹកស្អាត រស់នៅស្អាត ការពារសត្វពាហនៈ គោ ក្របីជ្រូកមាន់ទា ឲ្យមានសុវត្ថិភាពចៀសវាងខូចខាតបាត់បង់ ក្នុងកាលៈទេសៈមានទឹកជំនន់នេះ៕
ដោយប៊ុនរដ្ឋា
.
