ព្រះវិហារ:ក្រោយពីសារព័ត៌មាន ខេមរា ធ្វើការចុះផ្សាយ តាមគេហទំព័រព័ត៌មាន ខេមរា ដែលមានចំណងជើង(ប្រជាពលរដ្ឋកំពុងតែមើលក្រុមការងារចំរុះសមត្ថកិច្ចជំនាញខេត្តព្រះវិហារបានចុះទៅលេងឆាកល្ខោនដើម្បីធ្វើរបាយការណ៍ភូត ភរ កុហក់ បំភាន់ភ្នែករដ្ឋមន្ត្រីទៀតហើយ)កាលពីថ្ងៃទីថ្ងៃទី១៦ ខែវិច្ឆិកា ឆ្នាំ២០២០កន្លងមកនេះ។
នៅក្នុងអត្តន័យខ្លឹមសារ សំដៅលើក្រុមហ៊ុនម៉ាឃលឡូជីស្ទីក (ខេមបូឌា) ដែលទទួលសិទ្ធិក្នុងការកាត់ប្រមូលផលអនុផលព្រៃឈើនៅលើដីសមប្បទានសង្គមកិច្ចស្ថិតនៅក្នុងភូមិបង្កន ឃុំរៀបរយ ស្រុករវាង ខេត្តព្រះវិហារ ក្នុងអត្តន័យខ្លឹមសារ ដោយបានសង្កត់ធ្ងន់លើការកាត់ព្រៃឈើ នៅក្នុងតំបន់អភិរក្សជម្រកសត្វព្រៃព្រៃឡង់ និងបានរិះគន់ដល់ សមត្ថកិច្ចជំនាញរដ្ឋបាលព្រៃឈើ។
ដោយឡែកអត្ថន័យដែលបានចុះ ផ្សាយ ក្នុងនាមខ្ញុំបាទជាថ្នាក់ដឹកនាំ នៃអង្គភាពខេមរា មានការសោកស្តាយយ៉ាងខ្លាំង ចំពោះការចុះផ្សាយដែលធ្វើឲ្យប៉ះពាល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំនៃក្រសួងកសិកម្មរុក្ខាប្រម៉ាញ់និងនេសាទ និងសមត្ថកិច្ចជំនាញ រដ្ឋបាលព្រៃឈើ ដោយសារតែពុំបាន ចុះទៅពិនិត្យមើលផ្ទាល់ និងស្រាវជ្រាវពីសកម្មភាពការ ប្រមូលផល អនុផលព្រៃឈើដោយស្របច្បាប់របស់ក្រុមហ៊ុនម៉ាឃលឡូជីស្ទីក (ខេមបូឌា) និងពុំបានសិក្សាពីទំហំផ្ទៃដី ដែលក្រុមហ៊ុនមានសិទ្ធិ ប្រមូលផលលើផ្ទៃដី សម្បទានសេដ្ឋកិច្ចឲ្យបានជាក់លាក់។ 
ក្រោយពីបានចូលរួមប្រជុំជាមួយនិង ឯកឧត្តម រដ្ឋលេខាធិការក្រសួងកសិកម្មរុក្ខាប្រមាញ់និងនេសាទ និង ឯកឧត្តមប្រធានរដ្ឋបាលព្រៃឈើ អភិបាលរងខេត្តកំពង់ធំ ព្រះរាជអាជ្ញារងអយ្យការសាលាដំបូងខេត្តកំពង់ធំ បញ្ជាក់ជូន នៅក្នុងអង្គប្រជុំ.ទើបខ្ញុំបានជ្រាបថា ការពិតការប្រមូលផល ព្រៃឈើលើដី សម្បទានសេដ្ឋកិច្ច គឺមានការរៀបចំគណកម្មការ ចុះត្រួត ពិនិត្យបានត្រឹមត្រូវច្បាស់លាស់ និងមានស្លាកសញ្ញាសម្រាប់ បំពាក់នៅលើបុគ្គលិកក្រុមហ៊ុន និងមធ្យោបាយដឹកជញ្ជូន សម្រាប់សម្គាល់ដើម្បីចៀសវាងមានការក្លែងបន្លំ ក្នុងនោះក្រុមហ៊ុនមានសិទ្ធកាត់ព្រៃតែនៅក្នុង រង្វង់ដែលមានទទួលសិទ្ធតែប៉ុណ្ណោះ ដោយមិនបានយកឈើពីព្រៃឡង់ ដូចប្រភពព័ត៌មានដែលទទួលបាននោះទេ។
ខ្ញុំបាទសូមបញ្ជាក់ផងដែរថា ការចុះផ្សាយនេះ គឺទទួលព័ត៌មាន បានពីភ្នាក់ងារ និងប្រភពដោយមិនច្បាស់ការណ៍ ទើបធ្វើឲ្យមានការចុះផ្សាយ ធ្វើឲ្យប៉ះពាល់កិត្តិយសរបស់ ថ្នាក់ដឹកនាំ និងសមត្ថកិច្ចជំនាញរដ្ឋបាលព្រៃឈើ និងសូមគោរពអគុណ ចំពោះការណែនាំ ចង្អុលបង្ហាញរបស់ ឯកឧត្តមរដ្ឋមន្ត្រី ឯកឧត្តមរដ្ឋលេខាធិការ និងឯកឧត្តមអភិបាលខេត្តកំពង់ធំ ខ្ញុំបាទនិងពង្រឹងគុណភាព ក្នុងវិស័យព័ត៌មាន នៃអង្គភាពខេមរា អោយមានគុណភាព និងសុវត្តិភាពដល់សង្គម ៕
ដោយប៊ុន រដ្ឋា
