ខេត្តកំពង់ធំ៖ ដូនចាស់ជរាគ្មានទីពឹង រស់នៅសែនលំបាកវេទនា ក្នុងជីវភាពក្រក្សត់ គ្មានមុខរបរ ចាប់អាជីពដើររើសសំបកដប និងអេតចាយតាមគំនរសំរាម សម្រាប់ចិញ្ចឹមជិវិតប្រចាំថ្ងៃជាមួយនិងកូនចិញ្ចឹមម្នាក់ ដែលមាន ជម្ងឺប្រចាំកាយមិនអាចប្រកបមុខរបរអ្វីបាន ក្រោយពីបានទទួលដំណឹងពីលោក ប៊ុន រិទ្ធី អ្នកសារព័ត៌មាន ក្រោមការយកចិត្តទុកដាក់ ពីសំណាក់ហ៊ី ប៊ុនថាន អាជ្ញាធរឃុំ បានសំណូមពរឲ្យ ឯកឧត្តម មេបញ្ជាការតំបន់ប្រតិបត្តិការសឹករងកំពង់ធំ ដែលតែងតែជួយឧបត្ថម្ភជូនដល់ អតីតយុទ្ធជន និងប្រជាពលរដ្ឋ ដែលមានជីវភាពលំបាកខ្វះខាតសុំឲ្យជួយឧបត្ថម្ភដូនចាស់ជរា។
ឧត្តមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បន្ទាប់ពីបានជ្រាប់ពីទុក្ខលំបាករបស់ ដូនចាស់ជរាគ្មានទីពឹង ក៏បានដឹកនំាក្រុមការងារ ដោយមានអាជ្ញាធរចូលរួម បាននាំយកអំណោយ ឯកឧត្តមហ៊ុនម៉ាណែត មេបញ្ជាការកងទ័ពជើងគោក មកផ្តល់ជូនលោកយាយថោង ស៊ី អាយុ៨៤ឆ្នាំ ជាស្ត្រីម៉េម៉ាយ រស់នៅភូមិបល្ល័ង្គ ឃុំបល្ល័ង្គ ស្រុកបារាយណ៍ខេត្តកំពង់ធំ នៅថ្ងៃទី១៧ ខែធ្នូ ឆ្នាំ២០២០។
លោកយាយថោង ស៊ី បានបើកភ្នែកព្រិច ប្រកបដោយក្តុកក្តួលក្នុងចិត្ត បានបញ្ចេញសំលេងខ្សាវៗ រៀបរាប់ពីជីវិតដ៏កំសត់របស់លោកយាយថា ក្រោយពីស្វាមីស្លាប់ចោល គ្មានកូនចៅនឹងគេ បច្ចុប្បន្នរស់នៅក្រោមដំបូលខ្ទមកំសត់ ជាមួយនឹងកូនចិញ្ចឹមម្នាក់ដែលមានជម្ងឺហើយជួយខ្លួនឯងមិនបានផង ជារៀងរាល់ថ្ងៃ តែងតែដើរជ្រើសរើសសំបកអេតចាយតែគេបានបោះបង់ចោលនៅតាមគំនរសម្រាម ដើម្បីលក់បានប្រាក់បន្តិចបន្តួច សម្រាប់ទិញបាយហូប និងសម្រាប់ធ្វើបុណ្យសន្សំកុសលទៅជាតិខាងមុខ ដើម្បីកុំឲ្យជួបនូវភាពលំបាកវេទនាដូចជាតិនេះ ។
ឧត្តមសេនីយ៍ទោសោម ស៊ុន បានសម្តែងនូវក្តីអាណិតអាសូ លោកយាយចាស់ជារា ដែលបានកើតមកនៅក្នុង ពិភពលោកដ៏ធំល្វឹងល្បើយ បែរជាត្រូវទទួលទណ្ទកម្មព្រហ្មលិខិតស្ទើរមួយជីវិតទៅវិញ និងសុំឲ្យខិតខំថែរក្សាសុខភាព ពិសេសការពារការឆ្លងមេរោគកូវីដ១៩ ក្នុងឳកាសនេះ ឯកឧត្តម មេបញ្ជាការ ក៏បានចែករំលែកនូវស្បៀងអាហារសម្បុរសជន ពីឯកឧត្តមហ៊ុនម៉ាណែត និងលោកជំទាវ អង្ករ៥០ក.ក មីម៉ាម៉ា មីខ្លាឃ្មុំបីកេស ទឹកត្រីទឹកស៊ីអ៊ីវ៣យួរ ម៉ាស់ការពារមេរោគកូវីដ១៩ ចំនួន២០ម៉ាស់ និងថវិកាមួយចំនួនទៀតផងដែរ។ 
លោកយាយថោងស៊ី បានលើកម្រាមដៃដប់ សុំបួងសួងដល់វត្ថុស័ក្កសិទ្ធ ជួយថែរក្សាបីបាច់ ឯកឧត្តមហ៊ុនម៉ាណែត និងលោកជំទាវ រួមទាំងឧត្តមសេនីយ៍ទោសោម ស៊ុន និងក្រុមការងារទាំងអស់ រួមទាំងបុត្រាបុត្រី និងក្រុមគ្រួសារសុំបានសេចក្តីសុខ សេចក្តីចម្រើនជួបប្រទះតែនឹងពុទ្ធពរទាំងប្រាំប្រការគឺអាយុវណ្ណៈសុខៈពលៈនិងបដិភានៈកុំបីឃ្លៀងឃ្លាតឡើយ។
ដោយ ប៊ុន រិទ្ធី
