(ស្វាយរៀង)៖រដ្ឋបាលខេត្តស្វាយរៀងបានបង្ហាញអត្តសញ្ញាណអ្នកកើតជំងឺកូវីដ១៩ចំនួន ១០៣ នាក់ដែលក្រសួងសុខាភិបាលបានចេញសេចក្តីប្រកាសនៅថ្ងៃទី ២៣ខែឧសភាឆ្នាំ ២០២១ នេះ។
លោកបណ្ឌិតកែរ រដ្ឋាប្រធានមន្ទីរសុខាភិបាលខេត្តស្វាយរៀងបានឱ្យដឹងនៅរសៀលថ្ងៃទី២៣ ខែឧសភានេះថាខេត្តស្វាយរៀងមានអ្នកឆ្លងជំងឺកូវីដ‑១៩ក្នុង “ព្រឹត្តិការណ៍សហគមន៍ ២០កុម្ភៈ” ចំនួន៥១២នាក់ ក្នុងនោះមានស្រី២៦៥នាក់ ឯអ្នកស្លាប់មានចំនួន៥នាក់។ក្នុងចំណោមអ្នកឆ្លងចំនួន៥១២នាក់នោះមានអ្នកជាសះស្បើយចំនួន៣៥៩នាក់ ស្រីចំនួន១៤៤នាក់ ស្លាប់ចំនួន៥នាក់ ស្រី២នាក់ និងកំពុងព្យាបាលជំងឺចំនួន១៤៧នាក់ ស្រី១១៩នាក់។
លោកបណ្ឌិត បានបន្តទៀតថា អ្នកជំងឺចំនួន១៤៧នាក់នោះកំពុងព្យាបាលជំងឺនៅមន្ទីរពេទ្យបង្អែកស្វាយជ្រំចំនួន២៤នាក់ នៅមន្ទីរពេទ្យបង្អែកសាមគ្គីរំដួលចំនួន១៥នាក់ និងមណ្ឌលព្យាបាលជំងឺកូវីដ‑១៩ ក្រុបាវិតចំនួន១០៨នាក់។
លោកបានបន្តថាចំនួនអ្នកឆ្លងកូវីដ១៩កើនឡើងនេះមានការពាក់ព័ន្ធជាមួយបុរសម្នាក់ជាអ្នករកស៊ីដឹកបន្លែពីខេត្តស្វាយរៀងទៅផ្សារដើមគរ រាជធានីភ្នំពេញ ហើយបានឆ្លងជំងឺកូវីដ១៩ ដល់ប្រពន្ធធ្វើការនៅរោងចក្រយូលី១ តំបន់សេដ្ចកិច្ចពិសេសសានតុង ក្រុងបាវិត។
លោកបណ្ឌិត កែរ រដ្ឋា បានបន្តថាមូលហេតុដែលរកឃើញអ្នកជំងឺកូវីដ១៩ នេះខណៈពេលដែលបុរសជាប្តីកម្មករនោះគាត់មានបញ្ហាសុខភាព បានទៅពិនិត្យនៅមន្ទីរពេទ្យជីភូ ហើយបាន ទៅយកសំណាកនៅមណ្ឌលចត្តាឡីស័ក មីស្ទ័រសូ។ លុះដល់រកឃើញមានវិជ្ជមានទើបក្រុមការងារ បានយកប្រពន្ធគាត់ជាកម្មករធ្វើការនៅរោងចក្រ «យូលី» ទៅធ្វើតេស្តក៏មានវិជ្ជមានដូចគ្នា ហើយក្រុមការងារក៏បានបន្តស្រាវជ្រាវដល់រោងចក្រតែម្តង។
លោកបណ្ឌិត កែរ រដ្ឋា បានអំពាវនាវដល់អ្នកពាក់ព័ន្ធជាមួយបុរសដែលជាអ្នករកស៊ីដឹកបន្លែ និងប្រពន្ធដែលជាកម្មកររោងចក្រ ត្រូវប្រញាប់រួសរាន់មកធ្វើតេស្តរកជំងឺកូវីដ១៩ ឱ្យបានទាន់ពេលវេលានិងរួមគ្នាអនុវត្តវិធានការរបស់ក្រសួងសុខាភិបាលឱ្យបានខ្ជាប់ខ្ជួនជាពិសេសអនុវត្តតាមអនុសាសន៍ របស់សម្ដេចតេជោ ហ៊ុន សែន នូវវិធាន «៣ការពារ និង៣កុំ» បើមិនចាំបាច់កុំចេញក្រៅផ្ទះជាដើម៕
