ខេត្តកំពង់ចាម៖ បន្ទាប់ពីមានភ្លៀងធ្លាក់មួយមេធំ ឯកឧត្តមក អ៊ុន ចាន់ដា អភិបាលខេត្តកំពង់ចាម រួមនឹងមន្ត្រីពាក់ព័ន្ធ និងអាជ្ញាធរសង្កាត់បឹងកុក នាព្រឹកថ្ងៃទី៨ ខែកញ្ញា ឆ្នាំ២០២១នេះ បានអញ្ជើញចុះពិនិត្យស្ថានភាពនៅតាមភូមិមួយចំនួន ក្នុងសង្កាត់បឹងកុក ក្រុងកំពង់ចាម ដើម្បីលើកគម្រោងធ្វើការអភិវឌ្ឍ ជាពិសេស គឺផ្ដោតទៅលើស្ថានភាពផ្លូវ និងប្រព័ន្ធបង្ហូរទឹក ។
តាមមន្ត្រីសាលាខេត្ត បានឲ្យដឹងថា ផ្លូវមួយចំនួន ក្នុងសង្កាត់បឹងកុក បច្ចុប្បន្នកំពុងធ្វើការស្ថាបនាជាផ្លូវក្រាលបេតុង ដែលមានប្រវែងប្រមាណជាង ១.៥០០ម៉ែត្រ និងប្រព័ន្ធលូបង្ហូរទឹកផងដែរ។ ក្នុងនោះផ្លូវក្រាលបេតុង១ខ្សែ ប្រវែងជាង១.៣០០ម៉ែត្រ ទទឹង៦ម៉ែត្រ និង១ខ្សែទៀត ប្រវែងជាង ២០០ម៉ែត្រ ទទឹង៥ម៉ែត្រ និងត្រូវស្ថាបនាលូរំដោះទឹក ប្រវែងជាង ១.០០០ម៉ែត្រ និងលូដែលត្រូវជួសជុលប្រវែងជាង ៤០០ម៉ែត្រ ដោយគម្រោងផ្លូវទាំង ២ខ្សែនេះ ប្រើប្រាស់ថវិកា ឆ្នាំ២០២២ របស់រដ្ឋបាលខេត្តកំពង់ចាម។ ទន្ទឹមនិងការអភិវឌ្ឍផ្លូវ និងលូ កំពុងស្ថាបនានេះ ឯកឧត្តម អភិបាលខេត្ត ក៏បានចុះពិនិត្យដោយផ្ទាល់ នឹងមានគម្រោងបន្តស្ថាបនាផ្លូវបេតុង បន្ថែមទៀត នៅក្នុងសង្កាត់បឹងកុកនាពេលខាងមុខនេះ ៕
