យោងតាមមេដឹកនាំប្រឆាំង និងសារព័ត៌មានក្នុងស្រុកថា មនុស្សយ៉ាងតិច៨នាក់បានត្រូវស្លាប់ ហើយ៣០៨នាក់ទៀតត្រូវរបួស ក្នុងការប៉ះទង្គិចគ្នារវាងប៉ូលិស និងពួកបាតុករបន្ទាប់ពិបាតុកម្មរយៈពេល២សប្តាហ៍មកហើយនៅទីក្រុង អ៊ិស្លាម៉ាបាដ រដ្ឋធានីប៉ាគីស្ថាន មក ។ ប្រមុខរបស់គណបក្ស PAKISTAN AWAMI TEHRIK (PAT) លោក តាហៀ អ៊ុល កាឌីដែលជាអ្នករៀបចំបាតុកម្មអះអាងថា មនុស្ស៧នាក់នៃគណបក្សរបស់លោកបានត្រូវស្លាប់ ហើយ៧៥នាក់ទៀតត្រូវរបួស ។
ចំណែកអ្នករៀបចំបាតុកម្មម្នាក់ទៀតជាប្រធានគណបក្ស PAKISTAN TEHRIK -I- INSAF (PTI) ថ្លែងថា មនុស្សរបស់គណបក្សលោកម្នាក់ក៏ត្រូវស្លាប់ដែរ ហើយជាច្រើនសិបនាក់ទៀតត្រូវរបួសពេលមានការប៉ះទង្គិចគ្នា ។ រីឯរដ្ឋមន្ត្រីការពារជាតិប៉ាគីស្ថាន លោក KHAWJA ASIF បានបដិសេធការអះអាងទាំងនោះរបស់បណ្តាមេដឹកនាំប្រឆាំង ហើយបញ្ជាក់ថា ពុំមានមនុស្សណាម្នាក់ស្លាប់ក្នុងក្នុងការប៉ះទង្គិចគ្នាឡើយ ។
យោងតាមអ្នកទទួលខុសត្រូវនៃមន្ទីរពេទ្យធំ២នៅ ទីក្រុងអ៊ិស្លាម៉ាបាដ ថា នារីយ៉ាងតិច៥៧នាក់ កុមារ១២នាក់ប៉ូលិស៣៤នាក់ និងភ្នាក់ងារសុខាភិបាល៤នាក់ ស្ថិតក្នុងចំណោមអ្នករបួស ។ រដ្ឋមន្ត្រីមហាផ្ទៃលោក នីសា អាលីខាន់ គូសបញ្ជាក់ថា ប៉ូលិសបានប្រើប្រាស់កម្លាំងក្រោយពីបាតុករ១ក្រុមប៉ុនប៉ងលុកចូល ក្នុងវិមានប្រធានាធិបតី ។ បាតុករបានលុកចូលក្នុងទីធ្លាសភា ក្រោយកម្ទេចរបងដែក ក៏ប៉ុន្តែបានដកថយចេញវិញក្រោយពីកងកម្លាំងសន្តិសុខបញ្ជាឱ្យចាកចេញ ៕
