សមត្ថកិច្ចចម្រុះខេត្តឧត្តរមានជ័យ ចុះបង្ក្រាបរោងសិប្បកម្មកែច្នៃឈើគ្មានច្បាប់មួយកន្លែង រឹបអូសឈើច្រើនប្រភេទបានជាង ៤ម៉ែត្រគូបត្រីគុណ រួមទាំងឧបករណ៍កែច្នៃឈើជាច្រើនប្រភេទ មានតម្លៃច្រើនពាន់ដុល្លារ

0

ខេត្តឧត្តរមានជ័យ៖ រោងសិប្បកម្មកែច្នៃឈើមួយកន្លែង ឈើជាច្រើនប្រភេទមានចំនួនជាង ៤ម៉ែត្រគូបត្រីគុណ រួមទាំងម៉ាស៊ីនអារ ម៉ាស៊ីនជ្រៀកឈើ និងឧបករណ៍កែច្នៃឈើជាច្រើនប្រភេទទៀត មានតម្លៃច្រើនពាន់ដុល្លារ បានរងការបង្ក្រាប និងរឹបអូសពីកម្លាំងសមត្ថកិច្ចចម្រុះខេត្តឧត្តរមានជ័យ កាលពីថ្ងៃទី២៥មករាឆ្នាំ២០២២ ស្ថិតនៅក្នុងភូមិស្រះជ្រៃ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

មន្ត្រីសមត្ថកិច្ចនៅក្នុងការបង្ក្រាបរោងសិប្បកម្មនោះ បាននិយាយថា រោងសិប្បកម្មកែច្នៃឈើមួយកន្លែងនេះ គ្មានច្បាប់អនុញ្ញាតពីរដ្ឋបាលព្រៃឈើនោះទេ និងក្រោយពីបានដឹងរឿងនេះ កម្លាំងសមត្ថកិច្ចចម្រុះខេត្ត បានចុះអនុវត្តវិធានការច្បាប់ ដោយធ្វើការចាប់ បង្ក្រាប និងរឹបអូសបាន ម៉ាស៊ីនអារ ១គ្រឿង ម៉ាស៊ីនជ្រៀកឈើ ១គ្រឿង ផ្លែរណា ៣ ធុងសាំង ៤ ម៉ាស៊ីនម៉ៃតាប់ ១គ្រឿង ម៉ាស៊ីនភ្លើង ១គ្រឿង ម៉ាស៊ីនផ្សារខ្យល់ ១គ្រឿង ម៉ូទ័រឆាត ១គ្រឿង និងឈើ ៦ប្រភេទ គឺឈើគគី ឈើស្ដៅ ឈើស្រឡៅ ឈើកកោះ ឈើក្រញូងស្វា និងឈើក្រញូង មានចំនួនសរុប ៤ម៉ែត្រគូប ៩០០,៣២ ស្មើនឹងជាង ៤ម៉ែត្រគូបត្រីគុណ។

ក្រោយការបង្ក្រាប វត្ថុតាងឈើប្រណិត រួមទាំងឧបករណ៍កែច្នៃឈើទាំងអស់ ត្រូវបានបញ្ជូនយកមករក្សាទុក នៅទីបញ្ជាការអាវុធហត្ថស្រុកត្រពាំងប្រាសាទ និងនៅថ្ងៃទី២៦មករានេះ កម្លាំងអាវុធហត្ថ បានធ្វើកំណត់ហេតុផ្ទរប្រគល់ទៅប្រគល់ឲ្យ មន្ត្រីសង្កាត់រដ្ឋបាលព្រៃឈើត្រពាំងប្រាសាទ ដើម្បីចាត់ការតាមនីតិវិធីច្បាប់ ស្តីពីព្រៃឈើ៕