អគ្គនាយកដ្ឋានពន្ធដារ ស្វែងរកការសហការពីក្រុមហ៊ុន Internet ទាំង៤៩នៅកម្ពុជា ដើម្បីរាំងខ្ទប់ប្រតិបត្តិការតាមប្រព័ន្ធអេឡិចត្រូនិក ក្នុងករណីសហគ្រាសមិនចុះបញ្ជី

0

ភ្នំពេញ៖ អគ្គនាយកដ្ឋានពន្ធដារ បានរៀបចំកិច្ចប្រជុំពិភាក្សាជាមួយបណ្ដាក្រុមហ៊ុន ដែលផ្គត់ផ្គង់សេវាអ៊ិនធើណេតចំនួន៤៩ នៅកម្ពុជា លើការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្ម តាមប្រព័ន្ធអេឡិចត្រូនិក។ កិច្ចប្រជុំនេះធ្វើឡើងកាលពីថ្ងៃទី៧ ខែកុម្ភៈ ឆ្នាំ២០២២ ក្រោមអធិបតីភាព ឯកឧត្តម គង់ វិបុល រដ្ឋ មន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ ជាមួយតំណាងក្រុមហ៊ុនចំនួន ៤៩ ដែលប្រកបអាជីវកម្មជាអ្នកផ្គត់ផ្គង់សេវាអឺនធើណេត (Internet Service Provider – ISP) នៅកម្ពុជា។
រាជរដ្ឋាភិបាលបានចេញអនុក្រឹត្យលេខ ៦៥ អនក្រ.បក ស្តីពីការអនុវត្តអាករលើតម្លៃបន្ថែម ចំពោះពាណិជ្ជកម្ម តាមប្រព័ន្ធអេឡិចត្រូនិក ដែលមានវិសាលភាពអនុវត្តចំពោះការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្ម តាមប្រព័ន្ធអេឡិចត្រូនិក ដែលធ្វើឡើងដោយអ្នកផ្គត់ផ្គង់អនិវាសនជន នៅក្រៅកម្ពុជាមកក្នុងកម្ពុជា ដោយឡែកចំពោះសកម្មភាពពាណិជ្ជកម្ម តាមប្រព័ន្ធអេឡិចត្រូនិកក្នុងកម្ពុជា ត្រូវអនុវត្តតាមបទប្បញ្ញត្តិ ស្តីពីអាករលើតម្លៃបន្ថែមជាធរមាន។
តាមរយៈកិច្ចប្រជុំនេះ ឯកឧត្តម គង់ វិបុល បានបញ្ជាក់ថា ក្នុងរយៈពេលចុងក្រោយនេះ អាជីវកម្មតាមអនឡាញ វិស័យអនឡាញ និងអ៊ិនធើណេត មានការសន្ទុះយ៉ាងខ្លាំង និងកើនឡើងយ៉ាងគគ្រឹកគគ្រេង ខណៈសហគ្រាសមួយចំនួនបានចុះបញ្ជីពន្ធដារ និងបំពេញកាតព្វកិច្ចសារពើពន្ធ ក៏ប៉ុន្តែមានសហគ្រាសមួយចំនួនធំ ពុំទាន់បានចុះបញ្ជី និងមិនយល់ដឹងអំពីកាតព្វកិច្ចសារពើពន្ធនៅឡើយ។ ដូចនេះ ការពង្រឹងនូវការគ្រប់គ្រង សកម្មភាពពាណិជ្ជកម្មតាមប្រព័ន្ធអេឡិចត្រូនិក គឺជាការពង្រឹងការប្រកួតប្រជែងដោយស្មើភាព (Level Playing Field) និងអនុលោមភាពសារពើពន្ធ សម្រាប់វិស័យនេះ។
កិច្ចប្រជុំនេះ មានបំណងក្នុងការផ្សព្វផ្សាយ និងពង្រឹងកិច្ចសហការពីបណ្តាសហគ្រាស ជាអ្នកផ្គត់ផ្គង់សេវាអ៊ិនធើណេត (Internet Service Provider – ISP) ក្នុងព្រះរាជាណាចក្រកម្ពុជា ក្នុងចូលរួមជាមួយរាជរដ្ឋាភិបាល ដោយក្នុងករណីសហគ្រាសមិនចុះបញ្ជី និងបំពេញកាតព្វកិច្ចសារពើពន្ធ វិធានការចាំបាច់នានា ក្នុងការរាំងខ្ទប់នូវប្រតិបត្តិការតាមប្រព័ន្ធអេឡិចត្រូនិកនានា។ អគ្គនាយកដ្ឋានពន្ធដារ ស្វាគមន៍ចំពោះរាល់ធាតុចូល និងកិច្ចសហការនានា លើផ្នែកបច្ចេកទេសពាក់ព័ន្ធ ដើម្បីឲ្យការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក កាន់តែប្រសើរសំដៅធានា បាននូវការប្រមូលចំណូលពន្ធដារ កើនឡើងប្រកបដោយចីរភាព។
សូមជម្រាបថា អគ្គនាយកដ្ឋានពន្ធដារ បានសម្រេចពន្យារពេលអនុវត្តន៍ប្រមូលអាករលើតម្លៃបន្ថែម ចំពោះប្រតិបត្តិការ តាមប្រព័ន្ធអេឡិចត្រូនិករហូតដល់ថ្ងៃទី៣១ ខែមីនា ឆ្នាំ២០២២ ដើម្បីទុកពេលវេលាបន្ថែមដល់ អ្នកជាប់ពន្ធក្នុងការស្វែងយល់បន្ថែម និងត្រៀមខ្លួនឲ្យបានរួចរាល់ ខណៈការអនុវត្តន៍នឹងចាប់ពីថ្ងៃទី០១ ខែមេសា ឆ្នាំ២០២២តទៅ៕