កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានក្រេីនរំឮកដល់គណៈកម្មការអាចារ្យវត្ត និងគណៈសង្ឈទាំងអស់ ត្រូវមានសាមគ្គីភាពផ្ទៃក្នុង ដេីម្បីឲ្យបងប្អូនប្រជាពលរដ្ឋ មានជុំនឿទុកចិត្ត ក្នុងការចូលរួម អភិវឌ្ឍន៍កសាងសមិទ្ធផលថ្មីៗ បន្តទៀត ។ ការថ្លែងបែបនេះក្នុងពិធីសម្ពោធក្លោងទ្វារ និងសមិទ្ធផលនានា នៅវត្តបុទមរ័ត្នមានជ័យ ស្ថិតក្នុងភូមិច្រកភ្នុំ ឃុំគោករវៀង ស្រុកជើងព្រៃ នាព្រឹកថ្ងៃទី១២ ខែកុម្ភៈ ឆ្នាំ២០២២ ។
ថ្លែងក្នុងពិធីសំណេះសំណាលនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលេីកឡើងថា កត្តាដែលនាំឲ្យវិស័យព្រះពុទ្ធសាសនាមានការរីកចម្រើនទៅបាន គឺអាស្រ័យទៅលេីកត្តា ៤យ៉ាង ទី១- គឺកត្តាសុខសន្តិភាព សណ្តាប់ធ្នាប់សាធារណៈ ពីព្រោះថាមានសន្តិភាពទេីបយេីងមានឱកាសធ្វើបុណ្យជួបជុំគ្នាទៅបាន ។ ទី២- កត្តាហេដ្ឋារចនាសម្ពន្ធ័គ្រប់គ្រាន់ ពីព្រោះថាមានផ្លូវស្រួលសម្រាប់ធ្វើដំណើរ ទេីបយេីងនាំគ្នាទៅវត្តអារាមក៏បានស្រួលដែរ ។ ទី៣- កត្តាជីវភាព ពីព្រោះថាការធ្វើបុណ្យដាក់ទានតិចឬច្រេីន អាស្រ័យទៅលើជីវភាពរស់នៅរបស់ប្រជាពលរដ្ឋ ។ ទី៤- កត្តាជុំនឿ ពីព្រោះថា មានជុំនឿទុកចិត្តលើគណៈកម្មការអាចារ្យវត្ត និងគណៈសង្ឈ ទេីបប្រជាពលរដ្ឋយើង ចូលបុណ្យដេីម្បីកសាងសមិទ្ធផលផ្សេងៗ ។ ដូច្នេះហើយទើប ឯកឧត្តមអភិបាលខេត្ត បានក្រេីនរំឮកដល់ គណៈកម្មការអាចារ្យវត្ត និងគណៈសង្ឈ ត្រូវមានសាមគ្គីភាពផ្ទៃក្នុង ដេីម្បីឲ្យបងប្អូនប្រជាពលរដ្ឋ មានជុំនឿទុកចិត្ត ក្នុងការចូលរួម អភិវឌ្ឍន៍កសាងសមិទ្ធផលថ្មីៗ បន្តទៀត ។
ក្នុងឱកាសនោះដែរ ឯកឧត្ដមអភិបាលខេត្ត បានលើកឡើងថា កំណើតរស់រានមានជីវិតរបស់យើងគឺមាន៣ ទី១-កំណើតកេីតឬប្រសូតចេញពីផ្ទៃអ្នកម្តាយ ។ ទី២-កំណើតរស់រានមានជីវិតតាមរយៈការជួយសង្គ្រោះរំដោះប្រជាពលរដ្ឋយើងចេញពីការកាប់សម្លាប់ក្នុងរបបប៉ុលពត ។ និងទី៣- កំណេីតរស់រានមានជីវិតតាមរយៈការចាក់វ៉ាក់សាំងបង្ការជំងឺកូវីដ-១៩ ដែលជាយុទ្ធសាស្ត្រកន្លឹះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការបញ្ជាទិញវ៉ាក់សាំងសម្រាប់ចាក់ការពារអាយុជីវិតប្រជាពលរដ្ឋយើង ។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានអំពាវនាវដល់បងប្អូនប្រជាពលរដ្ឋ ឲ្យបន្តការប្រុងប្រយ័ត្នខ្ពស់ចំពោះការឆ្លងរីករាលដាលនៃជំងឺកូវីដ-១៩ បម្លែងថ្មី ជាពិសេសប្រភេទអូមីក្រុង ដោយត្រូវអនុវត្តតាមវិធានការសុខាភិបាល ព្រមជាមួយការចាក់វ៉ាក់សាំងឲ្យបានគ្រប់ៗគ្នា ផងដែរ ៕