កំពង់ចាម: ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពង់ចាម នាព្រឹកថ្ងៃទី១១ ខែមេសា ឆ្នាំ២០២២នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានណែនាំដល់មន្ត្រីពាក់ព័ន្ធ ត្រូវប្រកាន់ខ្ជាប់នូវភាពអព្យាក្រឹតក្នុងការអនុវត្តតួនាទីការពារសន្តិសុខសម្រាប់ការបោះឆ្នោតនាពេលខាងមុខនេះ ជាពិសេសត្រូវផ្តល់ភាពសហការ ឬបង្កលក្ខណៈងាយស្រួលដល់គណបក្សនយោបាយនានា ក្នុងការឃោសនារកសំឡេងឆ្នោត ដោយគ្មានការរេីសអេីងផងដែរ ។
ក្នុងកិច្ចប្រជុំនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំសូមឲ្យមន្ទីរអង្គភាពពាក់ព័ន្ធ និងអជ្ញាធរក្រុង-ស្រុកទាំងអស់ ត្រូវរៀបចំតុបតែងលម្អដាក់ចងបដាក្នុងអត្ថន័យទទួលស្វាគមន៍ឆ្នាំថ្មី ទេពធីតាសង្ក្រាន្តព្រះនាម « កិរិណីទេវី » នៅតាមកន្លែងធ្វើការនិមួយៗ ធ្វើយ៉ាងណាឲ្យមានសោភ័ណ្ឌភាពស្រស់ស្អាត ជាពិសេសត្រូវជំរុញដល់យុវជនឲ្យមានការលេងល្បែងប្រជាប្រិយខ្មែរ នៅតាមទីវត្តអារាម ឬកន្លែងកម្សាន្តនានាទៀតផង ។
ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះដែរ ឯកឧត្តមអភិបាលខេត្ត ក៏បានណែនាំជំរុញឲ្យមានការផ្សព្វផ្សាយដល់ប្រជាពលរដ្ឋ ឲ្យទទួលវ៉ាក់សាំងការពារជម្ងឺកូវីដ-១៩ ហេីយមន្ត្រីសុខាភិបាលត្រូវផ្ដល់ភាពងាយស្រួលសម្រាប់បងប្អូនប្រជាពលរដ្ឋ ដែលអញ្ជេីញមកទទួលវ៉ាក់សាំងទាំងដូសមូលដ្ឋាន និងដូសជំរុញផងដែរ ។
ជាមួយគ្នានោះ ឯកឧត្តមអភិបាលខេត្ត ក៏បានណែនាំឲ្យមានការរៀបចំនៅតាមបណ្ដាក្រុង-ស្រុកនិមួយៗ ត្រូវមានកម្លាំងប្រចាំបញ្ញា ដេីម្បីតៀមអន្តរាគមន៍នៅពេលដែលមានហេតុការណ៍ផ្សេងៗកេីតឡេីងជាយថាហេតុ ក្រៅពីនោះចំពោះមន្ទីរអង្គភាពនិមួយៗ ត្រូវរៀបចំពិធីជួបសំណេះសំណាលជាមួយមន្ត្រីក្រោមឱវាទ តាមរយៈសិល្បៈចែករំលែក ដេីម្បីពង្រឹងសាមគ្គីភាពផ្ទៃក្នុង ឲ្យកាន់តែមានភាពស្និទ្ធស្នាលផងដែរ ៕