កំពង់ចាម: ថ្ងៃចុងក្រោយនៃការ ធ្វើយុទ្ធនាការឃោសនាស្វែងរកសំឡេងឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលជាថ្ងៃត្រូវបិទការឃោសនារបស់គណបក្សនយោបាយជាទូទៅ នាព្រឹកថ្ងៃទី៣ ខែមិថុនា ឆ្នាំ២០២២នេះ ឯកឧត្តម ឧបនាយករដ្ឋមន្ត្រី យឹម ឆៃលី សមាជិកអចិន្ដ្រៃយ៍ នៃគណៈកម្មាធិការកណ្តោល គណបក្សបក្សប្រជាជនកម្ពុជា និងជាប្រធានក្រុមកាងារថ្នាក់កណ្ដាល ចុះជួយខេត្តកំពង់ចាម រួមជាមួយឯកឧត្តម លោកជំទាវ ក្រុមការងារថ្នាក់កណ្តាល-ខេត្ត-ក្រុង បានដឹកនាំសមាជិក សមាជិកា តំណាងមេគ្រួសារ គណបក្សបក្សប្រជាជនកម្ពុជា ខេត្តកំពង់ចាម ប្រមាណជិត១ម៉ឺននាក់ បានចូលរួមប្រារព្ធពិធីបិទយុទ្ធនាការ ឃោសនា ស្វែងរកសំឡេងឆ្នោត នៅក្នុងក្រុងកំពង់ចាម ក្នុងនោះក៏មានការប្រារព្ធពិធីបិទការឃោសនានៅតាមបណ្ដាស្រុក ដែលមានការចូលរួមពីសមាជិក សមាជិការ គណបក្សប្រជាជនកម្ពុជា រាប់ពាន់នាក់ផងដែរ។
ក្នុងពិធីនោះដែរ ឯកឧត្ដម អ៊ុន ចាន់ដា សមាជិកគណៈកម្មធិការកណ្តាលគណបក្សប្រជាជនកម្ពុជា -ប្រធានគណៈកម្មាធិការគណបក្សខេត្ត និងជាប្រធានក្រុមការងារចុះមូលដ្ឋានក្រុងកំពង់ចាម បានធ្វើសេចក្ដីរាយការណ៍អំពីភាពជោគជ័យនូវលទ្ធផលបោះឆ្នោតសាកល្បង និងបានណែនាំឲ្យសកម្មជន និងយុវជនបក្សចុះទៅតាមខ្នងផ្ទះប្រជាពលរដ្ឋ ដើម្បីសួរសុខទុក្ខ និងបង្រៀនពីការគូសសន្លឹកឆ្នោតផងដែរ ។
នាឱកាសនោះដែរ ឯកឧត្តម ឧបនាយករដ្ឋមន្ត្រី យឹម ឆៃលី បានធ្វើការប្រកាសបិទយុទ្ធនាការឃោសនា ស្វែងរកសំឡេងឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ព្រមទាំងបានថ្លែងនូវគោលនយោបាយសំខាន់ៗ របស់គណបក្សប្រជាជនកម្ពុជា ដោយប្រកាន់ភ្ជាប់នូវចក្ខុវិស័យរបស់ខ្លួនជាយូរអង្វែង ដោយប្រមូលកម្លាំងគ្រប់និន្នាការ នយោបាយរួបរួមគ្នា កសាងប្រទេសជាតិឲ្យកាន់តែមានការរីកចម្រើនឡើង សំបូររុងរឿងស្ថិតស្ថេរគង់វង្ស ឲ្យប្រទេសយើងដែលស្ថិតក្នុងឯករាជ្យជាតិ អធិតេយ្យ បូរភាព អព្យាក្រឹត្យ វឌ្ឍនៈភាព និងទទួលបាននូវសុភមង្គលជាតិខ្មែរតែមួយ។
គួរបញ្ជាក់ផងដែរថា ចំពោះគណបក្សនយោបាយ ដែលបានចុះឈ្មោះក្នុងបញ្ជី គ.ជ.ប ដើម្បីធ្វើការប្រកួតប្រជែងស្វែងរកសំឡេងឆ្នោតគាំទ្រជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នេះ ក្នុងខេត្តកំពង់ចាម គឺមានចំនួន១៣ គណបក្ស ចំពោះយុទ្ធនាការឃោសនាស្វែងរកសំឡេងឆ្នោត គឺមានតែគណបក្សប្រជាជនកម្ពុជាតែមួយគត់ ដែលបានធ្វើពិធីដង្ហែរក្បួនមានលក្ខណៈទ្រង់ទ្រាយធំជាងគេ ដោយឡែកគណបក្សនយោបាយផ្សេងៗទៀត មិនមានសកម្មភាពអ្វីធំដុំគួរឲ្យកត់សម្គាល់នោះឡេីយ ៕