ខេត្តបាត់ដំបង ÷ ព្រះសង្ឃក្លែងក្លាយមួយអង្គ ត្រូវបានកម្លាំងសមត្ថកិច្ចស្រុកថ្មគោលឃាត់ខ្លួនយកមកសាកសួរ ក៏ប្រទះឃើញថ្នាំញៀនមួយកញ្ចប់ ក្រោយពីពលរដ្ឋរាយការណ៍ថា និមន្តបិណ្ឌបាតយកតែបច្ច័យ តែមិនព្រមយកចង្ហាន់។
ការឃាត់ខ្លួននេះបានធ្វើឡើង កាលពី ថ្ងៃទី២ ខែមិថុនា ឆ្នាំ២០២២ វេលាម៉ោង ៩និង២០នាទី ព្រឹក នៅចំណុចក្រុមទី២ ភូមិហៃសាន ឃុំជ្រៃ ស្រុកថ្មគោល ខេត្តបាត់ដំបង ដោយ អនុវត្តន៍តាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ទើបលោកវរសេនីយ៍ទោ សេង លុច អធិការនគរបាលស្រុកថ្មគោល បានដឹកនាំកម្លាំងផ្នែកប្រឆាំងគ្រឿងញៀន រួមជាមួយកម្លាំងប៉ុស្តិនគរបាលរដ្ឋបាល ជ្រៃនៃអធិការដ្ឋាននគរបាល ស្រុកថ្មគោល អនុវត្តនាំ(ព្រះសង្ឃក្លែងក្លាយ)កំពុងនិមន្តបិណ្ឌបាតតាមផ្លូវក្នុងមូលដ្ឋានខាងលេីមកធ្វេីការសាកសួរនៅអធិការដ្ឋាននគរបាលស្រុក។ 
ព្រះសង្ឃអង្គនេះមានព្រះនាម លឹម ចាន់វិបុល មានព្រះជន៣០ព្រះវស្សាមុននេះរស់នៅភូមិត្រពាំងច្រនៀង ឃុំស្រែជាខាងជេីង ស្រុកដងទង់ ខេត្តកំពត ហេីយពេលពិនិត្យសមត្ថកិច្ចរកឃេីញថ្នាំញៀនមួយថង់រក្សាទុកនៅក្នុងកញ្ចប់បារីមានទម្ងន់០,៥៧ក្រាម ហេីយទីបំផុតព្រះសង្ឃអង្គនេះបានសារភាពថា ការគ្រងស្បង់ចីវរជាព្រះសង្ឃនេះគឺជាព្រះសង្ឃក្លែងក្លាយទេ។ 
គួររំលឹកថា មូលហេតុដែលឈានដល់ការកាក់ដំណេីរព្រះសង្ឃ(ក្លែងក្លាយ)ដេីម្បីសាកសួរនេះគឺសមត្ថកិច្ចនគរបាលស្រុកទទួលព័ត៌មានពីពលរដ្ឋថា ប៉ុន្មានថ្ងៃនេះសង្កេតឃេីញព្រះសង្ឃមួយអង្គនិមន្តបិណ្ឌបាតនៅមូលដ្ឋានខាងលេី តែមួយអង្គឯង ហេីយចម្លែកដោយសារព្រះសង្ឃអង្គនេះបិណ្ឌបាតសុំយកតែ បច្ច័យ(ប្រាក់)រីឯចង្ហាន់ មិនទទួលយកទេ ទិដ្ឋភាពរបស់ព្រះសង្ឃអង្គនេះប្រជាពលរដ្ឋនៅមូលដ្ឋានមិនដែលបានឃេីញពីមុនមកដោយ ទទួលបានព័ត៌មាននេះទេីបសមត្ថកិច្ចនគរបាលស្វែងរកជួបព្រះសង្ឃអង្គនេះដេីម្បីសាកសួរ។ 
លោកវរសេនីយ៍ទោ សេង លុច អធិការនគរបាលស្រុកថ្មគោល បានឱ្យដឹងថា ពេលសាកសួរព្រះសង្ឃអង្គនេះបានសារភាពថា លោកជាព្រះសង្ឃក្លែងក្លាយទេ មុននឹងមកដល់ខេត្តបាត់ដំបង បានទៅលួចយកស្បង់ចីវរ បាត និងថង់យាម របស់ព្រះសង្ឃនៅវត្តមួយនាខេត្តបន្ទាយមានជ័យ ហេីយពេលលួចបានក៏ផ្តេីមគ្រងស្បង់ចីវរនេះ ក្លែងជាព្រះសង្ឃដេីរបិណ្ឌបាតនៅតាមភូមិនាឃុំជ្រៃ ស្រុកថ្មគោល រហូតដល់សមត្ថកិច្ចទទួលព័ត៌មាននេះនិងនាំមកធ្វេីការសាកសួរ។
នៅពេលនេះសមត្ថកិច្ចនគរបាលបានទាក់ទងជាមួយ ខាងមន្រ្តីធម្មការស្រុកថ្មគោលដេីម្បីមានចំណាត់ការ ខាងផ្នែកសាសនា មុនពេលសមត្ថកិច្ចចាត់វិធានការបន្តតាមនីតិវិធី ច្បាប់៕ អត្ថបទ : ព្រាប.ស
