កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី១៩ ខែកញ្ញា ឆ្នាំ២០២២នេះ បានអញ្ជើញកាន់បិណ្ឌវេនទី៩ នៅវត្តភ្នំព្រះវិហារ ស្ថិតក្នុងភូមិបឹងវែង ឃុំតាំងក្រសាំង ស្រុកបាធាយ ដោយមានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងមន្ត្រីរាជការ អាជ្ញាធរមូលដ្ឋាន និងពុទ្ធបរិស័ទជិតឆ្ងាយផងដែរ។
ក្នុងឱកាសនោះដែរ ឯកឧត្តមអភិបាលខេត្ត និងមន្ត្រីរាជការ បានប្រគេនទ័យទានជាច្រើនមុខ មានដូចជា អង្គរ ១០០គីឡូក្រាម, មី ១កេសធំ, ទឹកដោះគោខាប់ ១កេសធំ, ត្រីខ ១កេស, ទឹកត្រី ៥យួរ, ទឹកស៊ីអ៊ីវ ៥យួរ , ទឹកសុទ្ធ ៥កេស, តែ ៥គីឡូ, ស្ករស ៥គីឡូ , បាយ ម្ហូប និងផ្លែឈើ និងបច្ច័យសម្រាប់កសាងជាង ៥លានរៀល។ ដោយឡែក ព្រះសង្ឃ ៧អង្គ ក្ប្រគេនទេយ្យវត្ថុ ចំនួន ១ បច្ច័យ ១០ម៉ឺនរៀល ចង្ហាន់ ១ស្រាក់ និងផ្លែឈើ ១កន្ត្រក ។
បន្ទាប់ពីឯកឧត្តមអភិបាលខេត្ត និងមន្ត្រីរាជការ បានវេរនូវទេយ្យទាន និងគ្រឿងបរិក្ខាទាំងឡាយ ប្រគេនព្រះសង្ឃ ទៅតាមគន្លងប្រពៃណីព្រះពុទ្ធសាសនា រួចមក ព្រះគ្រូចៅអធិការវត្តភ្នំព្រះវិហារ បានថ្លែងនូវថេរដីកា អំណរគុណ ចំពោះ ថ្នាក់ដឹកនាំខេត្ត ព្រមទាំង សហការីទាំងអស់ និងសូមឧទ្ទិសបួងសួងទៅដល់ឌួងវិញ្ញានក្ខ័ន្ត បុព្វការីជន ក៏ដូចជាអ្នកមានគុណ មាន ៖ មាតា បិតា ជីដូនជីតា ញ្ញាតិការទាំង ៧សណ្ដាន ដែលបានចែកដ្ឋាន ទៅកាន់បរលោកខាងមុខ សូមមកទទួលយកនូវមគ្គផលទាំងអស់នេះ ហើយសូមបែរបកក្រោយ ឲ្យពរសព្វសាធុការ ដល់ថ្នាក់ដឹកនាំ មន្ត្រីរាជការទាំងអស់ សូមប្រកបតែពរជ័យ សេរីសួស្ដី សេចក្ដីសុខចំរើន គ្រប់ក្រុមគ្រួសារ ក្នុងបច្ចុប្បន្ន និងអនាគតជាតិ កុំបីឃ្លាងឃ្លាតឡើយ ។
សូមបញ្ជាក់ផងដែរថា ស្ថិតក្នុងឱកាសដ៏ប្រសើរនោះ អភិបាលខេត្តកំពង់ចាម ឯកឧត្តម អ៊ុន ចាន់ដា បានទូលប្រគេន តបទៅនឹងសំណូមពររបស់ ព្រះចៅអធិការវត្តភ្នំព្រះវិហារ ដែលបានសំណូមពរឲ្យជួយស្ថាបនាផ្លូវចូលវត្ត ប្រវែងប្រមាណជា ៦,០០០ ម៉ែត្រ ថា « ផ្លូវនោះគឺមានគម្រោងសាងសង់ហើយ ជាសមត្ថកិច្ចអន្តរក្រសួង ដែលមានក្រសួងកសិកម្ម ជាអនាបក្ស នៃការស្ថាបនាផ្លូវនេះ ជូនលោកយាយ លោកតា » ដោយគម្រោងផ្លូវនោះ ប្រជាពលរដ្ឋ និងទទួលបានសមិទ្ធផលនេះ នៅមុនពិធីបុណ្យចូលឆ្នាំខ្មែរ ឆ្នាំ២០២៣ ខាងមុខ ៕