ប្រធានមន្ទីរព័ត៌មានខេត្តព្រះវិហារ បានជំរុញមន្ត្រីជំនាញក្រោមឱវាទ អោយបង្កើនប្រសិទ្ធភាពការងារក្នុងវិស័យព័ត៌មាន និងត្រូវបង្កើនកិច្ចទំនាក់ទំនង សហការល្អ ក្នុងការផលិតព័ត៌មាន ប្រកបដោយការទទួលខុសត្រូវខ្ពស់

0

ខេត្តព្រះវិហារ៖ ការថ្លែងជំរុញរបស់ ប្រធានមន្ទីរព័ត៌មានខេត្តព្រះវិហារ លោកស្រី ហែម សុគុណពិសី បានធ្វើឡើងក្នុងគ្រាដែលលោកស្រីប្រធាន បានអញ្ជើញដឹកនាំកិច្ចប្រជុំបូកសរុបលទ្ធផលការងារ ប្រចាំឆ្នាំ២០២២​ និងលើកទិសដៅការងារអនុវត្តន៍បន្ដសម្រាប់ឆ្នាំ២០២៣​ និងការប្រកាសតែងតាំង​ ប្រគល់ភារកិច្ច​ និងផ្ទេរភារកិច្ច​របស់ មន្ដ្រីរាជការក្នុងរចនាសម្ព័ន្ធមន្ទីរ​ព័ត៌មានខេត្ត នាថ្ងៃទី២៧ ខែធ្នូ ឆ្នាំ២០២២នេះ នៅមន្ទីរព័ត៌មានខេត្តព្រះវិហារ ។

ប្រធានមន្ទីរព័ត៌មានខេត្តព្រះវិហារ លោកស្រី ហែម សុគុណពិសី​ បានថ្លែង កោតសរសើរ និងវាយតម្លៃខ្ពស់ចំពោះថ្នាក់ដឹកនាំមន្ទីរ​ និងមន្រ្តី នៃការិយាល័យទាំង៥​ ដែលក្នុងរយៈពេលមួយឆ្នាំកន្លងមកនេះ បានខិតខំប្រឹងប្រែងក្នុងការបំពេញការងារ តាមជំនាញរបស់ខ្លួនយ៉ាងយកចិត្តទុកដាក់ និងទទួលខុសត្រូវខ្ពស់ រហូតទទួលបាននូវការកោតសរសើរ ពីថ្នាក់ដឹកនាំមន្ទីរ អង្គភាពនានា​ ពិសេស ពីសំណាក់ថ្នាក់ដឹកនាំខេត្តព្រះវិហារ។

ប្រធានមន្ទីរព័ត៌មានខេត្តព្រះវិហារ លោកស្រី ហែម​ សុគុណពិសី បានថ្លែង ជំរុញដល់មន្ត្រីជំនាញ នៃមន្ទីរព័ត៌មានខេត្តទាំងអស់ ត្រូវបន្តយកចិត្តទុកដាក់ បង្កើនប្រសិទ្ធភាពការងាររបស់ខ្លួន ក្នុងវិស័យព័ត៌មានឲ្យបានកាន់តែប្រសើរជាងមុនថែមទៀត ត្រូវសហការ និងទំនាក់ទំនងគ្នាឲ្យបានល្អ ក្នុងការផលិតព័ត៌មាន​ ជាពិសេសត្រូវរកដំណោះស្រាយ រាល់បញ្ហាប្រឈមនានា ដែលកើតឡើងនៅរាល់សកម្មភាពការងារ។

លោកស្រីប្រធានមន្ទីរ ក៏នៅបានជំរុញបន្ថែម ដល់មន្ត្រីដែលទើបទទួលបានការតែងតាំង  ប្រគល់ភារកិច្ច និងផ្ទេរភារកិច្ចថ្មី ​ឲ្យបង្កើនការយកចិត្តទុកដាក់អនុវត្តន៍ការងារ​ ត្រូវបង្កើនចំណងសាមគ្គីភាព​ ឯកភាពផ្ទៃក្នុង​ គោរពវិន័យការងារ តួនាទី ភារកិច្ច លក្ខខណ្ឌការងារដែលបានបែងចែក ប្រកបដោយការទទួលខុសត្រូវខ្ពស់ និងត្រូវបន្តពង្រឹង ការអភិវឌ្ឍន៍សមត្ថភាពរបស់ខ្លួន ឱ្យសក្តិសមជាអ្នកបន្តវេនដ៏ល្អ។

គួរបញ្ជាក់ថា នៅក្នុងកិច្ចប្រជុំបូកសរុបលទ្ធផលការងារ ប្រចាំឆ្នាំ២០២២​ និងលើកទិសដៅការងារអនុវត្តន៍បន្ដ សម្រាប់ឆ្នាំ២០២៣​ នាពេលនេះ ក៏មានការតែងតាំង ប្រគល់ភារកិច្ច និងផ្ទេរភារកិច្ចថ្មី ដល់មន្ត្រី ៥រូប ក្នុងនោះរួមមាន៖ ១.​ កញ្ញា​ អ៊ាង​ ម៉ូនីតា​ ពីប្រធានការិយាល័យទូរទស្សន៍​ ទៅជាជាអនុប្រធានមន្ទីរព័ត៌មានខេត្ត ,២.​ លោក​ អាន​ សារិទ្ធ​ ជាអនុប្រធានការិយាល័យទីភ្នាក់ងារសារព័ត៌មានកម្ពុជា​ (AKP) ,៣.​ លោក​ អ៊ុន​ ចាន់ដារ៉ា​ ពីអនុប្រធានការិយាល័យទូរទស្សន៍​ ទៅជាប្រធានការិយាល័យទូរទស្សន៍ ,៤.​ លោក​ វណ្ណ​ យុទ្ធនា​ ជាអនុប្រធានការិយាល័យព័ត៌មាន​ និងសោតទស្សន៍ និង៥.​ លោកស្រី​ មុនី​ កុសុម៉ា​ ផ្ទេរភារកិច្ចពីអនុប្រធានការិយាល័យ ទីភ្នាក់ងារសារព័ត៌មានកម្ពុជា​ ទៅជាអនុប្រធានការិយាល័យទូរទស្សន៍ នៃមន្ទីរព័ត៌មានខេត្តព្រះវិហារ ៕ ដោយ៖ឡុង សំបូរ