(កំពង់ធំ)÷ នៅរសៀលថ្ងៃទី ១៧ ខែមីនា ឆ្នាំ ២០២៣នៅទីបញ្ជាការតំបន់ប្រតិបត្តិការសឹករងកំពង់ធំ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំកិច្ចប្រជុំ ប្រគល់ភារកិច្ច ជូនថ្នាក់ដឹកនាំគ្រប់លំដាប់ថ្នាក់ និងស្ថាប័នពាក់ព័ន្ធ ដើម្បីទទួលខុសត្រូវក្នុងការរៀបចំពិធីសម្ពោធដាក់ឲ្យប្រើប្រាស់ជាផ្លូវការ នៅអគារមួយខ្នង ដែលជាជំនួយឧបត្ថម្ភរបស់គណៈបញ្ជាការយោធាទីក្រុងហូជីមិញ នៃកងទ័ពប្រជាជនវៀតណាម ដែលនិងត្រូវសម្ពោធដាក់ឲ្យប្រើប្រាស់ជាផ្លូវការនៅពេលខាងមុខនេះ ។
លោកវរសេនីយ៍ត្រី សេង សូត្រ បានរាយការណ៍ថា អគារមួយខ្នងដែលទេីបសាងស់ថ្មីនេះ មានទំហំ២០០ ម៉ែត្រការ៉េ ដែលមានតម្លៃជាទឹកប្រាក់ ៤៥.០០០ ដុល្លារសហរដ្ឋអាមេរិក ត្រូវបានសាងសង់ឡើងនៅផ្នែកសឹករងតាំងគោក នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលជាស្រុកទើបបង្កើតថ្មី ក្រោមជំនួយឧបត្ថម្ភរបស់គណៈបញ្ជាការយោធាទីក្រុងហូជីមិញ នៃកងទ័ពប្រជាជនវៀតណាម ហើយអគារនេះបានសាងសង់រួចរាល់ នៅថ្ងៃទី២៥ ខែកុម្ភៈ ឆ្នាំ ២០២៣។
ឧត្តមសេនីយ៍ទោ សោម ស៊ុន បានបញ្ជាក់ថា តំបន់ប្រតិបត្តិការសឹករងកំពង់ធំ មានចំនួន ១១ អង្គភាពចំណុះ ដែលមានចំនួន២វរសេនាតូច និង ៩ផ្នែកសឹករងក្រុង-ស្រុក ហេីយត្រូវបានគណៈបញ្ជាការយោធាទីក្រុងហូជីមិញ នៃកងទ័ពប្រជាជនវៀតណាម ដែលជាអង្គភាពសហប្រតិបត្តិការ បានជួយសាងសង់អគារក្នុងមួយអង្គភាពចំនួនមួយខ្នង ដែលមានទំហំដូចគ្នាជាមួយនឹងផ្នែកសឹករងតាំងគោក បានសាងសង់ចំនួន ១១ខ្នង គ្រប់កងឯកភាពទាំងអស់រួចមកហើយ។
នៅក្នុងកិច្ចប្រជុំដើម្បីត្រៀមរៀបចំពិធីសម្ពោធអគារថ្មី ដាក់ឲ្យប្រើប្រាស់ជាផ្លូវការនៅពេលខាងមុខ ក្រោមអធិបតីភាពភាគីមិត្ត ដែលជាម្ចាស់ជំនួយនៅពេលខាងមុខ ឲ្យទទួលបានជោជ័យ ឧត្ដមសេនីយ៍ទោសោម ស៊ុន បានបែងចែកភារកិច្ចទទួលខុសត្រូវ ជូនថ្នាក់ដឹកនាំម្នាក់ៗ និងអង្គភាពផ្នែកសឹករងតាំងគោក ក្នុងការរៀបចំពិធីសម្ពោធអគារថ្មីនេះ ឱ្យបានដំណើរការល្អ ។
នៅក្នុងឱកាសនេះផងដែរ ឧត្តមសេនីយ៍ទោសោម ស៊ុន បានថ្លែងអំណរគុណដ៏ជ្រាលជ្រៅជាទីបំផុតចំពោះគណៈបញ្ជាការយោធាទីក្រុងហូជីមិញ នៃកងទ័ពប្រជាជនវៀតណាម ដែលបានជួយឧបត្ថម្ភក្នុងការសាងសង់អគារ ស្នាក់នៅនិងធ្វើការងារ នៅទីបញ្ជាការដ្ឋានតំបន់ប្រតិបត្តិការសឹករងកំពង់ធំ និងអង្គភាពចំណុះសរុបបានចំនួន ១៣ខ្នងរួចមកហើយ និងសូមជូនពរឱ្យចំណងសាមគ្គីភាព មិត្តភាព សហប្រតិបត្តិការល្អ រវាងកងយោធពលខេមរភូមិន្ទ និងកងទ័ពប្រជាជនវៀតណាម ដើម្បីសន្តិភាព និងការអភិវឌ្ឍ ៕