ខេត្តកែប៖ ដំណាក់កាលបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នាថ្ងៃអាទិត្យ ទី២៣ ខែកក្កដា ឆ្នាំ២០២៣ បានដំណើរការប្រព្រឹត្តទៅដោយរលូន ប្រកបដោយ សេរី ត្រឹមត្រូវ យុត្តិធម៌ តម្លាភាព មានសុវត្ថិភាពពេញលេញ និងមានប្រជាពលរដ្ឋ
ទៅចូលរួមបោះឆ្នោតចំនួន ២៥.៩២២នាក់ ស្មើនឹង ៩១,៩៣% ពុំមានការប្តឹងតវ៉ា ឬប្តឹងជំទាស់ឡើយ។
នេះបើតាមការលើកឡើងពីសំណាក់លោក គីវ សាឌុំ ប្រធានគណៈកម្មការរៀបចំការបោះឆ្នោតខេត្តកែប ក្នុងសន្និបាតបូកសរុបលទ្ធផលការងារបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ នារសៀលថ្ងៃទី៤ ខែសីហា ឆ្នាំ២០២៣ ក្រោមអធិបតីភាពឯកឧត្តម បណ្ឌិត សោម ពិសិដ្ឋ អភិបាលខេត្តកែប នៅសាលាខេត្តកែប។
លោក គីវ សាឌុំ លើកឡើងថា ភាពជោគជ័យទាំងនេះ ជាសក្ខីភាពមួយបញ្ជាក់ឱ្យឃើញនូវការសហការគាំទ្រអស់ពីកម្លាំងកាយចិត្ត និងសម្ភារ របស់ឯកឧត្តម លោក លោកស្រី ថ្នាក់ដឹកនាំអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទ អស់លោក លោកស្រី ដែលជាមន្ត្រីនៃគណៈកម្មការរៀបចំការបោះឆ្នោតតាំងពីថ្នាក់ខេត្ត រហូតដល់ថ្នាក់ការិយាល័យបោះឆ្នោត។
ថ្លែងក្នុងឱកាសនោះ ឯកឧត្តមបណ្ឌិត សោម ពិសិដ្ឋ អភិបាលខេត្តកែប មានប្រសាសន៍ថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ កាលពីថ្ងៃទី២៣ ខែកក្កដា ឆ្នាំ ២០២៣ នេះមានគណបក្សនយោបាយដែលបានចុះបញ្ជីនៅមណ្ឌលបោះឆ្នោតខេត្ត មានចំនួន១០គណបក្ស ដែលមាន១អាសនៈក្នុងរដ្ឋសភា។
ឯកឧត្តមបណ្ឌិតបន្តថា ជាលទ្ធផលនៃការបោះឆ្នោត គឺគណបក្សប្រជាជនកម្ពុជា ទទួលបានសម្លេងឆ្នោតគាំទ្រលំដាប់ទី១ ក្នុងចំណោមគណបក្សទាំង១០ នៅខេត្តកែប។ ក្នុងនោះអត្រាពលរដ្ឋចេញមកបោះឆ្នោតមានរហូតដល់ ៩១,៩៣% ដែលលទ្ធផលនេះជាតួលេខដែលខ្ពស់ជាងក្នុងចំណោមបណ្តាខេត្តនានា នៃសន្ទុះពលរដ្ឋចេញមកបោះឆ្នោត។
យ៉ាងណាឯកឧត្តមបណ្ឌិត បានសម្ដែងនូវការកោតសរសើរដោយស្មោះ និងវាយតម្លៃខ្ពស់ចំពោះគណៈកម្មការរៀបចំការបោះឆ្នោតគ្រប់លំដាប់ថ្នាក់ អាជ្ញាធរដែនដី និងភាគីពាក់ព័ន្ធទាំងអស់ ដែលបានចូលរួមអនុវត្ត និងគោរពតាមច្បាប់បោះឆ្នោត បទបញ្ជា និងនីតិវិធី និងក្រមសីលធម៌សម្រាប់ការបោះឆ្នោត នៅគ្រប់ដំណាក់កាល ធ្វើអោយការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ ប្រព្រឹត្តិទៅដោយរលូនប្រកបដោយលក្ខណៈសេរី ត្រឹមត្រូវ យុត្តិធម៌ គ្មានអំពើហិង្សា ហើយលទ្ធផលនៃការបោះឆ្នោតនេះ ក៏ត្រូវទទួលស្គាល់ពីគណបក្សនយោបាយនានា ដែលបានចុះបញ្ជីចូលរួមប្រកួតប្រជែងនេះផងដែរ៕ សេង ណារិទ្ធ
