ព្រះវិហារ៖ឈើមូលប្រភេទធ្នង់ ផ្ចឹក និង សុក្រម ប្រវែង១ម៉ែត្រជាង ២០០ដុំ ដែលក្រុមឈ្មួញបានឃោសនាឱ្យប្រជាពលរដ្ឋនៅភូមិ ត្មាតប៉ើយ និងភូមិ ក្រឡាពាស លួចចូលទៅកាប់នៅក្នុងដែនជម្រកសត្វព្រៃគូលែនព្រហ្មទេព ត្រូវបានលោក អ៊ា សុខា នាយកដែនជម្រកសត្វព្រៃ គូលែនព្រហ្មទេពធ្វើការចាប់បង្ក្រាបអូសយកមករក្សាទុកនៅទីស្នាក់ការស្ពានតាកឹង ។ ប្រតិបត្តិការនេះបានធ្វើឡើងកាលពីយប់ថ្ងៃទី ០៨ ខែ កុម្ភះ ឆ្នាំ ២០១៤ នេះ លោក អ៊ា សុខា នាយកដែនជម្រកសត្វព្រៃគូលែនព្រហ្មទេព បានឱ្យដឹងថា ក្រោយពីទទួលបានព័ត៌មាន ឈ្មួញមួយក្រុមបានដឹកឈើមកលាក់ទុកនៅក្រោយផ្ទះប្រជាពលរដ្ឋនៅភូមិត្មាតប៉ើយ ឃុំព្រីងធំ ស្រុកជាំក្សាន្ត ខេត្តព្រះវិហារ ។
លោកបានបញ្ជាឱ្យមន្ត្រីក្រោមឱវាទ ចុះទៅពិនិត្យឃើញគំនរឈើដែលឈ្មួញបានលាក់ទុកនៅខាងក្រោយផ្ទះប្រជាពលរដ្ឋ រូបលោក និងមន្ត្រីក្រោមឱវាទ បានចុះទៅដេកយាមឈើនោះ ពេញមួយយប់ លុះព្រឹកឡើងថ្ងៃទី ០៩ ខែ កុម្ភះនេះទើបត្រូវបានចាប់បង្ក្រាបតែម្តង ឈើទាំងអស់នោះជាប្រភេទឈើធ្នង់ ផ្ចឹក និងសុក្រម មានមុខកាត់ ២០សង់ទីម៉ែត្រ ទៅ ៣០ សង់ទីម៉ែត្រ មានប្រវែង១ម៉ែត្រ ត្រូវបានដឹកជញ្ជូនយកមករក្សាទុក នៅទីស្នាក់ការជំរក សត្វព្រៃស្ពានតាកឹង ដើម្បីទុកដោះស្រាយតាមនិតិវិធី។
រីឯម្ចាស់ឈើមានឈ្មោះ ណាន់ ថាប្រមួលទិញឱ្យក្រុមហ៊ុន។លោក អ៊ា សុខា បានទទួលស្គាល់ថា ការចាប់បង្ក្រាបពួកឈ្មួញនៅមានចន្លោះប្រហោង ដោយសារពួកឈ្មួញមានល្បិចកល់ខ្ពស់ យកប្រជាពលរដ្ឋធ្វើជាខែល ក្នុងការបិទបាំងនូវអំពើល្មើសច្បាប់របស់ពួកគេ ។
ទោះបីជាយ៉ាងណាក៏ដោយ សមត្ថកិច្ចរវបស់លោក និង បន្តសហការណ៍ជាមួយគ្រប់ស្ថាប័នពាក់ព័ន្ធ ដើម្បីវែករកមុខឱ្យឃើញអ្នកនៅពីក្រោយខ្នង នៃអំពើល្មើសច្បាប់នេះ ។ នៅភូមិ ក្រឡាពាសឃុំព្រីងធំមានមេឈ្មួញដ៏ធំ ម្នាក់ឈ្មោះទូច កំពុងប្រមួលទិញឈើតាប់ប្រភេទឈើធ្នង់ ឈើនាងនួន ដឹកតាមគោយន្តច្នៃយកទៅលក់ឱ្យក្រុមហ៊ុនដ៏ធំ មួយនៅស្រុកជាំក្សាន្ត ការដឹកជញ្ជូនឈើប្រណិតចេញពីភូមិ ក្រឡាពាសកាត់ស្រុកជាំក្សាន្តទាំងថ្ងៃរបស់មេឈ្មួញឈ្មោះ ទូច មិន ត្រូវបានសមត្ថកិច្ចជំនាញណាមួយចេញមុខ សួរនាំឡើយ។
ការដឹកជញ្ជូនឈើទាំងថ្ងៃរបស់មេឈ្មូញដុះស្លែឈ្មោះ ទូច ខាងលើ គេបានដាក់ការសង្ស័យថា សមត្ថកិច្ចជំនាញទទួលបាន លាភសក្ការៈ យ៉ាងច្រើន សន្ធឹកសន្ធាប់ ពីមេឈ្មួញម្នាក់នេះ លោក ម៉ក បញ្ញា នាយផ្នែករដ្ឋបាលព្រៃឈើជាំក្សាន្តបានឆ្លើយថាមិនបានដឹងទេរឿងមេឈ្មួញឈ្មោះ ទូច ឈរចាំទិញឈើនៅភូមិ ក្រឡាពាសនោះ ។ ដោយ ឈឿង ចាន់
