ខេត្តសៀមរាប៖ អគារសិក្សា ១ខ្នង មាន៥បន្ទប់ ធ្វើអំពីថ្ម ប្រកក្បឿង និង បណ្ណាល័យចល័ត ស្ថិតនៅក្នុងសាលាបឋមសិក្សារលួស ឃុំរលួស ស្រុក ប្រាសាទបាគង ខេត្តសៀមរាប ដែលឧបត្ថម្ភដោយក្រុមហ៊ុនIWC SCHAF FHAUSEN អង្គការ ស៊ីប៉ា និង មូលនិធិ យុវជន ត្រូវបានបើកសម្ពោធដាក់ឲ្យប្រើប្រាស់ជាផ្លូវការ កាលពីរសៀលថ្ងៃទី០៧ ខែ មីនា ឆ្នាំ២០១៤ ក្រោមអធិបតីភាពរបស់ឯ.ឧ ម៉ៅ វុឌ្ឍី អភិបាលរងនៃគណៈអភិបាលខេត្តសៀមរាប ដោយមានការចូលរួម ពីសំណាក់ អស់ លោក លោក ស្រី ជាអាជ្ញាធរស្រុក ឃុំ ម្ចាស់សប្បុរសជន និង លោកគ្រូអ្នកគ្រូ សិស្សានុសិស្ស ព្រមទាំងប្រជាពលរដ្ឋផងដែរ ។
ក្នុងកិច្ចស្វាគមន៍របស់លោក ភូ សំអាត អភិបាលនៃគណៈអភិបាលស្រុកប្រាសាទបាគង បានលើកឡើងថា អគារសិក្សាដែលបានបើកសម្ពោធនាពេលនេះ ស្របទៅនឹងគោលដៅសហសវត្ស ក្នុងឆ្នាំ២០១៥ ទើបអង្គការស៊ីប៉ា បាន ផ្តល់អគារសិក្សា និង បណ្ណាល័យចល័ត បន្ថែមដល់សម្រាប់បម្រើដល់សិស្សានុសិស្សក្នុងឃុំរលួសផងដែរ ។
តាមសេចក្តីរាយការណ៍របស់លោកនាយកសាលាបឋមសិក្សារលួស បានឲ្យដឹងថា ក្នុងឆ្នាំសិក្សា២០១៣.២០១៤ មានសិស្សចូលមកសិក្សា សរុប ១ពាន់៩០នាក់ ស្រី ៥២៨នាក់ ចែកចេញជា ២៧ថ្នាក់ ថ្នាក់បឋម ២៣ថ្នាក់ និង មត្តេយ្យ សិក្សា ៤ថ្នាក់ ។ ចំពោះការសាងសង់អគារថ្មី១ខ្នង ៥បន្ទប់ និង ជួសជុលអគារ សិក្សា និងបំពាក់គ្រឿងសង្ហារឹម ព្រមទាំងពង្រីកបណ្ណាល័យ និង បំពាក់សៀវភៅ ឯកសារ ទុកក្នុងបណ្ណាល័យ របស់ អង្គការស៊ីប៉ា ដោយចំណាយអស់ ថវិកាសរុប ៨៩ពាន់៤៧៩ដុល្លា ។
បន្ទាប់ពីពីចំណាប់អារម្មណ៍របស់លោក នាយកអង្គការស៊ីប៉ា និង ចំណាប់អារម្មណ៍របស់លោកអនុប្រធានមន្ទីរ អប់រំយុវជន និង កីឡាខេត្តរួចមក មានប្រសាសន៍នោះក្នុងនាមឯ.ឧ ឃឹម ប៊ុនសុង អភិបាលនៃគណៈអភិបាលខេត្ត ឯ.ឧ ម៉ៅ វុឌ្ឍី ក៏បានសម្តែងចំពោះទឹកចិត្តសប្បុរសធម៌ របស់អង្គការស៊ីប៉ា ក្នុងការចូលរួមស្តារនឹងអភិវឌ្ឍន៍វិស័យអប់រំក្នុងខេត្ត ដែលធ្វើឲ្យប្រជាជន នៅស្រុកប្រាសាទបាគង ចារិកទុកនៅជាប្រវត្តិសាស្ត្រនៅលើទឹកដីប្រវត្តិសាស្ត្រខេត្ត សៀមរាប ។
ឯកឧត្តមបានបន្តទៀតថា ដើម្បីអភិវឌ្ឍន៍ប្រទេសជាតិ គឺកត្តាចាំបាច់នូវធនធានមនុស្ស និង បែបផែនផលិតកម្មមួយ ហើយការអប់រំជាកត្តាគន្លឹះដ៏សម្ខាន់ ក្នុងការកសាងធនធានមនុស្ស ដើម្បីចូលរួមវិនិយោគខ្លាំងក្លា គឺត្រូវការ ពេលវេលាយូរអង្វែង មានការទទួលខុសត្រូវខ្ពស់ លើការបណ្តុះបណ្តាលក្មួយៗកុមារ និង យុវជន ទាំងស្មារតី កាយសម្បទា សញ្ចេតនា និងបំណិនជីវិត សម្រាប់អភិវឌ្ឍន៍ប្រទេស ហើយក៏ជាសរសរស្តម្ភដ៏រឹងមាំ ក្នុងការអភិវឌ្ឍន៍ប្រទេសជាតិ ។ ឯ.ឧ ម៉ៅ វុឌ្ឍី ក៏បានគូសបញ្ជាក់ថា ក្រោមកិច្ចដឹកនាំដ៏ឈ្លាសវៃប្រកបទៅដោយគតិបណ្ឌិតដ៏ខ្ពង់ខ្ពស់ របស់ សម្តេចតេជោ ហ៊ុន សែន នាយករដ្ឋមន្ត្រី បានបង្ខិតនូវអគារសិក្សាពីថ្នាក់បឋមសិក្សា រហូតដល់វិទ្យាល័យ ឲ្យនៅជិតកូន ចៅប្រជាជននៅគ្រប់មូលដ្ឋាន នៅគ្រប់ភូមិមានថ្នាក់បឋមសិក្សា គ្រប់ឃុំមានអនុវិទ្យាល័យ និង ក្រុង ស្រុកមានវិទ្យាល័យ ព្រមទាំងសាលាបណ្តុះបណ្តាលវិជ្ជាជីវៈ ទៀតផង ។
ដើម្បីឆ្លើយតបត្រូវការនេះ រាជរដ្ឋាភិបាល និង អង្គការដៃគូ បានផ្តោតទៅលើការសាងសង់ និង ផ្តល់អាហាររូបករណ៍ដល់កុមារក្រីក្រ និង ការបណ្តុះបណ្តាលសមត្ថភាពដល់អ្នកគ្រប់គ្រង ក្នុងការកាត់បន្ថយភាពក្រីក្ររបស់ប្រជាពលរដ្ឋ សំដៅបង្កើនល្បឿន នូវគោលដៅអប់រំសម្រាប់ទាំងអស់គ្នា ឈានទៅ សម្រេចនូវគោលដៅសហសវត្សទាំង៩ចំណុច នាពេលអនាគត់ ។
ឯ.ឧ ម៉ៅ វុឌ្ឍី ក៏បានផ្តាំផ្ញើ ដល់អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និង ប្រជាពលរដ្ឋទូទាំងឃុំរលួស ត្រូវចូលរួមថែរក្សានូវសមទ្ធិផលថ្មី នៃចំណងដៃឆ្នាំថ្មី ប្រពៃណីជាតិនាថ្ងៃខាងមុខ ដើម្បីឲ្យសមទ្ធិផលនេះបានគង់វង្ស ប្រើប្រាស់បានយូរអង្វែងសម្រាប់ទៅថ្ងៃអនាគត និង សូមឲ្យក្មួយៗសិស្សានុសិស្សស្តាប់នូវដំបូន្មានរបស់លោកគ្រូអ្នកគ្រូ និង គោរពឲ្យបានបញ្ជាវិន័យសាលា ព្រមទាំងគោរព ឲ្យបាននូវច្បាប់ចរាចរណ៍ផ្លូវគោក និង ចូលរួមអនុវត្តគោលនយោបាយភូមិ ឃុំមានសុវត្ថិភាព ដើម្បីធានានូវសុវត្ថិភាព ជូនដល់ប្រជាជន និង ភ្ញៀវទេសចរណ៍ជាតិ អន្តរជាតិផងដែរ ។
បន្ទាប់ពីការបំពាក់គ្រឿងឥស្សរិយយសស្ថាបនាជាតិ ជូនដល់សប្បុរសជន និង ការជូនអំណោយជាសម្ភារៈសិក្សា ជានិមិត្តរូបដល់សិស្សានុសិស្សរួចមក គណៈអធិបតី និង សប្បុរសជន បានអញ្ជើញកាត់ខ្សែបូរជានិម្មិតរូប បើកសម្ពោធ ដាក់ឲ្យប្រើប្រាស់ជាផ្លូវការ នូវអគារសិក្សា និង បណ្ណាល័យចល័ត ចាប់ពីថ្ងៃនេះតទៅផងដែរ ៕
