ភ្នំពេញ៖ សមត្ថកិច្ចបានឃាត់ជនសង្ស័យបានម្នាក់ ក្នុងចំណោមបក្ខពួក២នាក់ ខណៈដែលពួកគេធ្វើសកម្មភាព វាយគេយកទូរសព្ទ័ ពីបុរស ម្នាក់បានសម្រេចហើយយកមកបញ្ចាំនៅកាវដាយ ត្រូវបានម្ចាស់គេដេញតាម មកទាន់វាយឡើងទ្រោមខ្លួនទើបប្រគល់ឲ្យសមត្ថកិច្ច កាលពីវេលាម៉ោង ១និង ៣០ នាទីយប់ឈានចូល ថ្ងៃទី០៩ ខែមិនាឆ្នាំ ២០១៤ នៅចំណុចផ្លូវ២០៦ ស្ថិតក្នុងសង្កាត់ទួលស្វាយព្រែ២ ខណ្ឌចំការមន ។
តាមការឲ្យដឹងពីជនរងគ្រោះដែលជាម្ចាស់ទូរសព្ទ័ឈ្មោះ រំ សុវណ្ណ អាយុ ២៤ឆ្នាំ មុខរបរកម្មកររោងចក្រ ស្នាក់នៅសង្កាត់បឹងទំពុន ខណ្ឌ មានជ័យ បានឲ្យដឹងថានៅមុខពេលកើតហេតុ គេត្រូវបានជនសង្ស័យពីរនាក់ ខាងលើវាយយកទូរសព្ទ័មួយគ្រឿង ម៉ាក់LG នៅក្បែររោងចក្រ ដែលនៅខណ្ឌមានជ័យបានសម្រេច ហើយជនសង្ស័យខាងលើនេះ បានយកទូរសព្ទ័នេះមកបញ្ចាំនៅម្តុំកាវដាយ ហើយខណៈដែលជនរងគ្រោះ កំពុងដើររកផងនោះក៏ប្រទះឃើញ ក៏បានដេញចាប់ជាមួយមិត្តភក្រ័៣នាក់ទៀត ហើយក៏ចាប់បាន ជនសង្ស័យម្នាក់ វាយឡើងទ្រោមខ្លួនទើបប្រគល់ឲ្យសមត្ថកិច្ច ចំណែក ជនសង្ស័យម្នាក់ទៀតបានគេចខ្លួនបាត់ ស្រមោល។
សមត្ថកិច្ចបានឲ្យដឹងដែរថា ជនសង្ស័យខាងលើ ឈ្មោះ រ៉ា ឌី អាយុ ២៥ឆ្នាំ មុខរបររើសអេចាយ មានទីលំនៅ ផ្ទះជួល នៅសង្កាត់បឹងទំពុន ខណ្ឌ មានជ័យ ។ ក្រោយពេលកើតហេតុសមត្ថកិច្ចបាននាំខ្លួនជនសង្ស័យយកទៅប៉ុស្ដិ៍ទួលស្វាយព្រែ២ ដើម្បីសាកសួរបន្ត ទៅចាប់ខ្លួនជនសង្ស័យម្នាក់ទៀត ដែលរត់គេចខ្លួននោះ៕
