ភ្នំពេញ ៖ យុវជនម្នាក់ត្រូវបានរងរបួសបែកក្បាលនឹងហូរឈាមតាមត្រចៀក ដោយសារយុវជនម្នាក់នេះជិះម៉ូតូ សេ ១២៥ មួយគ្រឿង ហើយត្រូវបុរសម្នាក់បើកបររថយន្តហាយឡែនឌ័រមួយគ្រឿង ក្នុងល្បឿនលឿនជ្រុលបុក ម៉ូតូពីក្រោយយ៉ាងពេញទំហឹង កាលពីវេលាម៉ោង១២ នឹង ៤០នាទីឈានចូលថ្ងៃទី ១០ខែកុម្ភៈ ឆ្នាំ ២០១៤ ស្ថិតចំណុចមុខខារ៉ាអូខេ រ៉ក តាមបណ្តោយផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន ។
យោងតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ យុវជនរងគ្រោះជិះម៉ូតូ សេ ១២៥ ពណ៌ខ្មៅ ពាក់ស្លាកលេខភ្នំពេញ 1BW 1977 ជិះធ្វើដំណើរតាមផ្លូវព្រះមុនីវង្ស ទិសដៅត្បូងទៅជើង យ៉ាងលឿន លុះដល់ចំណុចខាងលើនេះក៏ត្រូវបុរសម្នាក់បើកបររថយន្ត
ហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ 2K 7603 ក្នុងល្បឿនលឿនទិសដៅស្របជាមួយម៉ូតូ ហើយបានរេចង្កូតជ្រុលល្បឿនបុកម៉ូតូសេ ១២៥ ពីក្រោយយ៉ាងពេញ ទំហឹង នឹងកិនម៉ូតូរងការខូចខាតទាំងស្រុងរួចរថយន្តបង្កហេតុ បានបន្ថែមល្បឿនបើក គេចខ្លួន តែបានយុវជនម្នាក់ត្រូវជាមិត្តភ័ក្រជនរងគ្រោះបានជិះម៉ូតូគុបជ្រុង ពណ៌ទឹកប៊ិច មួយគ្រឿងដេញតាម រថយន្តនឹងបានយកម៉ូតូទៅបាំងនៅមុខរថយន្តបង្ក ទើបរថយន្តជ្រុលល្បឿនបុកមួយតង់ទៀតរងការខូចខាត ទាំងម៉ូតូនឹងរថយន្ត ។
ក្រោយកើតហេតុសមត្ថកិច្ចមូលដ្ឋានបានចុះមកសម្របសម្រួលរវាងភាគីទាំង ២ ដោយតម្រូវឲ្យម្ចាស់ រថយន្តសងថ្លៃព្យាបាលរបួស នឹង ជួសជុលម៉ូតុឲ្យទៅជនរងគ្រោះដើម្បីបញ្ចប់រឿងភ្លាមៗ។
