រាជធានីភ្នំពេញ ៖ យុវជន២នាក់ម្នាក់បានស្លាប់បាត់បង់ជីវិតនិងម្នាក់ទៀតរបួសធ្ងន់ បន្ទាប់ពីពួកគេជិះម៉ូតូម៉ាកអាយខនមួយគ្រឿង រត់គេចពីការតាមដេញរបស់ក្មេងស្ទាវមួយក្រុមមិនដឹងថាតាមដេញវាយឬតាមប្លន់យកម៉ូតូ បណ្ដាលអោយយុវជនទាំង២នាក់នោះជិះម៉ូតូទៅបុកជញ្ជាំងផ្ទះប្រជាពលរដ្ឋចំពេញទំហឹង កាលពីវេលាម៉ោង១១ និង៤៥នាទីយប់ថ្ងៃទី៩ខែមិនាឆ្នាំ២០១៤ នៅលើកំណាត់ផ្លូវបេតុង ស្ថិតក្នុងក្រុមទី៩ភូមិឬស្សី សង្កាត់ស្ទឹងមានជ័យ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ យុវជនរងគ្រោះព្រមទាំងមិត្តភ័ក្តិ៣ទៅ៤នាក់បានចេញពីរាំលេងក្នុងក្លិបមួយកន្លែង ដោយជនរងគ្រោះបានធ្វើដំណើរជូននារីម្នាក់ត្រឡប់ទៅផ្ទះ។ ពេលជូននារីនោះដល់ផ្ទះហើយក៏ជិះមកវិញក៏មានក្រុមក្មេងស្ទាវមួយក្រុមជិះដេញ ឃើញដូចនោះជនរងគ្រោះមានការភិតភ័យក៏បានជិះម៉ូតូរត់ ក៏បានជ្រុលចង្កូតទៅបុកនិងជញ្ជាំងផ្ទះប្រជាពលរដ្ឋនៅចំណុចកើតហេតុខាងលើ បណ្ដាលអោយយុវជនម្នាក់បោកផ្ទប់និងជញ្ជាំងបាក់កស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ត្រូវបញ្ជូនយកទៅសង្គ្រោះនៅមន្ទីរពេទ្យឯកជនភ្លាមៗផងដែរ។
ចំណែកយុវជនមួយក្រុមដែលជិះម៉ូតូដេញនោះក្រោយពេលកើតហេតុក៏បានជិះម៉ូតូគេចខ្លួនបាត់ស្រមោល។ ប្រភពព័ត៌មានពីមិត្តភ័ក្តិជនរងគ្រោះបានឱ្យដឹងថា ជនរងគ្រោះដែលស្លាប់ឈ្មោះ ផុន ពិសិដ្ឋ អាយុ២១ឆ្នាំជាកម្មកររោងចក្រមួយកន្លែង មានទីលំនៅក្រោយវត្តនួនមុនី ស្ថិតក្នុងភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ចំណែកយុវជនម្នាក់ទៀតឈ្មោះ ជា រងរបួសធ្ងន់កំពុងសំរាកព្យាបាលនៅមន្ទីរពេទ្យ ពួកគេទាំង២នាក់ជិះម៉ូតូមួយគ្រឿងម៉ាកអាយខុន ពណ៌សលាយទឹកសមុទ្រ ពាក់ស្លាកលេខ ភ្នំពេញ 1U-6625 បានរងការខូចខាតផ្នែកខាងមុខទាំងស្រុង។
ក្រោយពេលកើតហេតុសមត្ថកិច្ចបានពិនិត្យនិងយកម៉ូតូរបស់ជនរងគ្រោះទៅរក្សាទុកនៅអធិការដ្ឋានខណ្ឌមានជ័យ ចំណែកសពកំពុងទំនាក់ទំនងទៅក្រុមគ្រួសារមកទទួលយកទៅធ្វើបុណ្យតាមប្រពៃណី៕
