​រដ្ឋាភិបាល​ក្រុង​គៀវ​សន្យា​មិន​បោះបង់​តំបន់​គ្រីមៀ

​នៅ​ថ្ងៃ​សៅរ៍​នេះ រដ្ឋាភិបាល​ក្រុង​គៀវ​បានប្រកាសថា មិន​បោះបង់​តំបន់​គ្រី​មេ​ចោលទេ គ្រីមេ​នៅតែ​ស្ថិត​ក្នុង​ដែនដី​អ៊ុយ​ក្រែនជា​ដរាប​។ រដ្ឋាភិបាល​

ក្រុង​គៀវ​បាន​បន្ថែមថា នឹង​ចរចា​តាម បែបផែន​សន្តិភាព ជាមួយ​រុស្ស៊ី ដើម្បី​ដោះស្រាយ​វិបត្តិ​ក្នុងប្រទេស​។​ ​ការប្រកាស​មិន​បោះបង់​ចោល​តំបន់ គ្រី​មេ​ពី​សំណាក់​រដ្ឋាភិបាល​ក្រុង​គៀវ ស​បង្ហាញថា អាជ្ញាធរ​អ៊ុយ​ក្រែន​ថ្មី​មិន​បណ្តែតបណ្តោយ​តំបន់​គ្រីមេ ក្លាយ​ជា​កម្មសិទ្ធិ​របស់​រុស្ស៊ី​វិញ​ឡើយ​។ ទន្ទឹមនេះដែរ អាជ្ញាធរ​អ៊ុយ​ក្រែន​ថ្មី​ក៏​ចង់​បន្ទន់​ជំហរ​ចរចា​ជាមួយ​ក្រុង​ម៉ូស្គូ ផងដែរ​។ 
​នៅ​ថ្ងៃ​សៅរ៍​នេះ កងការពារ​ព្រំដែន​អ៊ុយ​ក្រែន​បាន​ប្រាប់ថា ទាហាន​រុស្ស៊ី​បាន​បណ្តេញ​កងកម្លាំង​ខ្លួន​មួយចំនួន រួម​ទាំង​ក្រុម​គ្រួសារ​ពួកគេ​ផង​ដែរ អោយ​ចាកចេញ​ពី​ប៉ុស្តិ៍​យាម​ការពារ នៅ​ភាគ​ខាងកើត​ឧបទ្វីប​គ្រីមេ​។ ដោយឡែក រុស្ស៊ី​បដិសេធថា កងទ័ព​ខ្លួន​មិន​ធ្វើ​សកម្មភាព​នៅ​តំបន់​ស្វ័យ​ត​គ្រី​មេ​នោះ​ទេ​។ រដ្ឋាភិបាល​ក្រុង​ម៉ូស្គូ​ធ្លាប់​បញ្ជាក់​រួចហើយ​ថា មិន​លូកដៃ​ចូល​ក្នុង​វិបត្តិ​គ្រី​មេទេ​។ រុស្ស៊ី​នៅតែ​ចោទ​អាជ្ញាធរ​អ៊ុយ​ក្រែន​ថ្មី ថា​បាន​ធ្វើ​អ្វីៗ​តាមតែ​ការចង់បាន​របស់​ក្រុម​ជ្រុលនិយម​។ ​ក្នុង​ដំណោះស្រាយ​វិបត្តិ​អ៊ុ​យក្រែន នៅ​ថ្ងៃ​សៅរ៍​នេះ រដ្ឋមន្ត្រីការបរទេស​រុស្ស៊ី ស៊ែរ​ហ្កី ឡា​វ្រ៉ូ​វ បានប្រកាស​បើកចំហ​កិច្ច​ចរចា​ជាមួយ​ប្រទេស​មហាអំណាច​ជា​ដៃគូ​នានា ក្នុង​លក្ខណៈ​ស្មោះត្រង់ និង​ស្មើគ្នា​ទៅវិញទៅមក​។ 
​ដោយឡែក​ ​រដ្ឋមន្ត្រីការបរទេស​រុស្ស៊ី​បាន​សុំ​អោយ​អង្គការ​សន្តិសុខ​និង សហប្រតិបត្តិការ​អឺរ៉ុប បើក​ការស៊ើបអង្កេត​លើ​ការស្លាប់​របស់​មនុស្ស​ជាង​១០​នាក់ កាលពី​ខែ​កុម្ភៈ​មុននេះ ដែល​បាន​ស្លាប់​ក្នុង​ការវាយប្រហារ​របស់​ក្រុម​ទាហាន​បាញ់​ស៊ីប មួយក្រុម​។ រដ្ឋមន្ត្រីការបរទេស​រុស្ស៊ី​សំណូមពរ​បែប​នេះ ក្រោយ​លេចលឺ​ដំណឹង​ថា តំណាង​ការទូត​ប្រទេស​អេ​ស្តូ​នី បាន​ប្រាប់​តំណាង​ការទូត​អឺរ៉ុប​ថា ក្រុមប្រឆាំង​អ៊ុ​យក្រែន អាច​នឹង​ជាប់​ពាក់ព័ន្ធ​ក្នុង​ការវាយប្រហារ​នេះ​។​  
​ក្នុងពេល​កំពុង​ស្ថិត​ក្រោម​ទណ្ឌកម្មសេដ្ឋកិច្ច​របស់​សហរដ្ឋអាមេរិក​និង សហភាព​អឺរ៉ុប ថ្មីៗ​នេះ​ ​ក្រុង​ម៉ូស្គូ​បាន​គំរាម​តប​វិញ​ថា នឹង​ដាក់​ទណ្ឌកម្ម​អាជ្ញាធរ​ក្រុង​គៀវ តាមរយៈ​ការផ្តាច់​ការនាំ​ចេញ​ឧស្ម័ន​រុស្ស៊ី​អោយ​អ៊ុ​យក្រែន ប្រសិន​អ៊ុយ​ក្រែន​មិន​អាច​ដោះបំណុល​ប៉ុន្មាន​ពាន់​លាន​ដុល្លារ​អោយ បាន​រួច​ឆាប់ៗ​នោះទេ​។ គួរ​រំលឹក​ដែរ​ថា កាលពី​ឆ្នាំ​២០០៩ រុស្ស៊ី​ធ្លាប់បាន​បិទ​បំពង់​ឧស្ម័ន​រួចមកហើយ​ ​ធ្វើអោយ​ការផ្គត់ផ្គង់ ឧស្ម័ន​នៅ​តាម​បណ្តា​ប្រទេស​អឺរុប​មួយចំនួន ជួប​ការរាំងស្ទះ​៕ 

crimea