ភ្នំពេញ ៖ បុរសជនជាតិបរទេស២នាក់មានអាការៈដូចជាមនុស្សបែកថ្នាំ ត្រូវរថយន្តមិនស្គាល់អត្តសញ្ញាណមួយគ្រឿងបើកដឹកយកមកទម្លាក់ចោលនៅតាមបណ្តោយផ្លូវជាតិលេខ៣ដោយមិនដឹងមូលហេតុ។
ហេតុការណ៏នេះបានកើតឡើងកាលពីវេលាម៉ោង១១ និង ២០នាទី យប់ ថ្ងៃទី ១១ ខែវិច្ឆិកា ឆ្នាំ២០១៤ នៅចំណុចផ្លូវជាតិលេខ៣ ស្ថិតនៅក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីប្រជាពលរដ្ឋដែលបានឃើញហេតុការណ៍បានឱ្យដឹងថា នៅមុនពេលកើតហេតុពួកគាត់បានឃើញរថយន្តមិនស្គាល់ម៉ាកមួយគ្រឿង ពណ៌ខ្មៅបានបើកមកដល់ចំណុចកើតហេតុខាងលើ និងបានទម្លាក់បុរសបរទេសចំនួន២នាក់ ចុះពីលើរថយន្ត ហើយរថយន្តនោះបានបើកចេញទៅបាត់។ បុរសបរទេសទាំង២នាក់នោះមានអាការៈដូចជាមនុស្សបែកថ្នាំ ដោយម្នាក់រត់របូតខោអាវ មិនដឹងទៅទីណាចំណែកឯម្នាក់ទៀតស្រែកច្រៀងរាំ យ៉ាងសប្បាយនិងរត់ឆ្លេឆ្លារ ចុះឡើងនៅលើផ្លូវជាតិលេខ៣ ក្នុងមូលដ្ឋានខាងលើ ។
ក្រោយពេលកើតហេតុសមត្ថកិច្ចបានចុះមកពិនិត្យ កន្លែងកើតហេតុនិងបាននាំបុរសបរទេសម្នាក់ ត្រឡប់ទៅកាន់ប៉ុស្តិ៍នគរបាលរដ្ឋបាលចោមចៅបណ្តោះអាសន្នសិនព្រោះខ្លាចបុរសរូបនេះរត់ចុះរត់ឡើងលើផ្លូវជាតិ អាចបង្កឲ្យមានបញ្ហាអ្វីកើតឡើងច្រើនទៀត៕
