ភ្នំពេញ ៖ រថយន្តមួយគ្រឿងប្រភេទយីឌុបបានដឹកដីយកមកចាក់កន្លែងដីឡូត៍មួយកន្លែងនៅខាងកើតស្ពានហាររួចភ្លេចទម្លាក់បែនហើយបើកចេញទៅក៏បណ្តាលឲ្យទាក់នឹងខ្សែភ្លើងដាច់ធ្លាក់រាយប៉ាយពេញផ្លូវនិងបាក់បង្គោល១ដើមរាបដល់ដីបង្កការភ្ញាក់ផ្អើលដល់ប្រជាពលរដ្ឋធ្វើដំណើរ
តាមផ្លូវឃើញដូច្នោះក៏បានរាយការណ៍ដល់សមត្ថកិច្ច។
ហេតុការណ៍នេះបានកើតឡើងនៅវេលាម៉ោង១និង៤៥នាទីរសៀល ថ្ងៃទី១៦ ខែមីនា ឆ្នាំ២០១៤ នៅចំណុចខាងកើតស្ពានហារ ផ្លូវព្រៃស ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ប្រភពពីសមត្ថកិច្ចនគរបាលប៉ុស្តិ៍រដ្ឋបាលព្រៃសបានឲ្យដឹងថា រថយន្តបង្កហេតុនោះមានម៉ាកKIA ពណ៌ស ពាក់ស្លាកលេខភ្នំពេញ 3B-1130 បើកបរដោយឈ្មោះ នី ម៉ៅ ភេទប្រុស អាយុ២៥ឆ្នាំ មានស្រុកកំណើតនៅភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល។
ប្រភពដដែលបន្តថា មុនពេលកើតហេតុអ្នកបើកបរដឹកដីចេញពីភូមិអន្លង់គងឆ្ពោះទៅចាក់ដីនៅកន្លែងមួយនៅខាងកើតស្ពានហារ ពេលចាក់ដីហើយទំនងជាអ្នកបើកបរនោះគាត់ភ្លេចទម្លាក់បែនចុះវិញក៏បើករថយន្តចេញទៅក៏ទាក់នឹងខ្សែភ្លើងបណ្តាលឲ្យដាច់ធ្លាក់រាយប៉ាយពេញផ្លូវនឹងបាក់បង្គោល១ដើមផងដែររាបដល់ដី។
ប្រភពបន្តថា ពេលបាក់បង្គោលភ្លើងនិងដាច់ខ្សែភ្លើងធ្លាក់រាយប៉ាយដូច្នេះហើយអ្នកបើកបររថយន្តអត់ឈប់ទេគេព្យាយាមបើករត់ទៅដឹកដីធ្វើព្រងើយ ខំតែបានប្រជាពលរដ្ឋគាត់ចំណាំលេខរថយន្តគាត់ក៏បានរាយការណ៏ដល់កម្លាំងយើងទើបកម្លាំងយើងទៅឃាត់រថយន្តនោះនៅកន្លែងរណ្តៅដីតែម្តង។
សមត្ថកិច្ចនគរបាលចរាចរខណ្ឌក៏បានចុះដល់កន្លែងកើតហេតុឃាត់រថយន្តនោះនាំមករក្សាទុកនៅសាលាខណ្ឌដង្កោ ដើម្បីប្រគល់ភារកិច្ចនេះដោះស្រាយជាមួយខាងអគ្គិសនីចេញសំណងថ្លៃការខូចខាត ។
ដោយឡែកអភិបាលរងខណ្ឌដង្កោលោក ប្រាជ្ញ សីហា ក៏បានឲ្យដឹងដែរថា ចំពោះបញ្ហានេះភាគីខាងរថយន្តបង្កគេយល់ព្រមចេញថ្លៃការខូចខាតនិងជុសជុលឲ្យវិញ ដូច្នេះខាងអគ្គិសនីក៏គេមិនប្តឹងផ្តល់អ្វីដែរ ៕
