យានអវកាស រុករករបស់អង្គការ ណាសា នៅជុំវិញភពពុធ ដែលជាភពតូចជាង គេក្នុងចំណោមភព ទាំង៨ និងស្ថិតនៅជិតព្រះអាទិត្យជាងគេដែរនោះ ត្រូវបានក្រុមអ្នកវិទ្យាសាស្ត្រអះអាងថា នឹងបញ្ចប់បេសកកម្មជា ច្រើនឆ្នាំរបស់ខ្លួន ក្នុងរយៈពេលមួយខែទៀត ។
អង្គការណាសា បានឲ្យដឹង នៅថ្ងៃអាទិត្យ ទី២៩ ខែមីនាថា ម៉ាស៊ីនរបស់យាន Messenger បានឆាបឆេះជាលើក ដំបូង ដែលជាហេតុនាំឲ្យវាមិនអាចធ្វើប្រតិបត្តិការបានយូរទៀតនោះទេ នៅជុំវិញភពពុធ ដូច្នេះពេលវេលា ដែលវា អាចធ្លាក់ទៅលើផ្ទៃ របស់ភពខាងលើនេះ នឹងអូសបន្លាយនៅរយៈពេលមួយខែទៀតប៉ុណ្ណោះ ។
លោក ជីម ម៉ាអាដាមស៍ វិស្វករជំនាញដឹកនាំបេសកកម្មយាន Messenger បានអះអាងថា “យើងបានសម្រេចលើ យុទ្ធសាស្ត្រមួយ តាមរយៈការថ្លឹងថ្លែងចំនួន៥ដង ក្នុងរយៈពេលជាច្រើនសប្តាហ៍ ដើម្បីរក្សាយានខាងលើនេះ ឲ្យអាច ហោះហើរក្នុងរយៈកម្ពស់ពី ៥ទៅ៣៩គីឡូម៉ែត្រពីផ្ទៃភពពុធ ដែលជាកម្ពស់ទាបបំផុតមិនធ្លាប់មាន” ។
ប្រសិនបើដូចការគណនា ដោយគ្មានការប្រែប្រួលទៀតនោះ យាននឹងអាចមានជីវិតរហូតដល់ ថ្ងៃទី៣០ ខែមេសា ទើបធ្លាក់កម្ទេចខ្លួនឯង នៅលើផ្ទៃរបស់ភពពុធតែម្តង ។
គួរបញ្ជាក់ថា បេសកកម្មយាន Messenger មានទឹកប្រាក់ ៤៥០លានដុល្លារអាមេរិក ដើម្បីសិក្សាពីស្ថានភាពទូទៅ នៃភពពុធ ដែលបានបាញ់បង្ហោះចេញពីផែនដី កាលពីខែសីហាឆ្នាំ
២០០៤ ។ បន្ទាប់ពីឆ្លងកាត់ដំណើរ ដ៏វែងឆ្ងាយ ទៅកាន់តំបន់ជិតព្រះអាទិត្យបំផុតនេះ កាលពីខែមីនា ឆ្នាំ២០១១ វាបានទៅដល់ភពពុធ ជាលើកដំបូង ដោយផ្តើមធ្វើ ការគូសវាសផែនទី និងសិក្សាពីស្ថានភាពទូទៅ នៃភពដែលមានលក្ខណៈស្រដៀង នឹងព្រះច័ន្ទ របស់ផែនដីមួយនេះ៕
