សៀមរាប: យុវជនជាក្មេងទំនើងទាំង៣នាក់នេះត្រូវបានកម្លាំងនគរបាលដែលកំពុងតែជិះម៉ូតូល្បាតនៅត្រង់ចំណុចក្នុងបុរីសៀងណាំស្ថិតនៅក្នុង ភូមិខ្នារ សង្កាត់ជ្រាវ ក្រុង និង ខេត្តសៀមរាប ។ធ្វើការចាប់ឃាត់ខ្លួនកាលពីវេលាម៉ោង ៩ យប់ថ្ងៃទី ១១ ខែ កុម្ភះ ឆ្នាំ២០១៤ កន្លងទៅនេះយកមកកាន់អធិការដ្ឋាននគរបាលក្រុងសៀមរាបព្រមទាំងវត្ថុតាងរួមមាន កំបិត ១ ដើម ពូថៅ ១ ដើម និង ម៉ូតូ ម៉ាកវេវអេស សេរីឆ្នាំ២០០៧ មួយ គ្រឿង ដើម្បីយកមកធ្វើការសួរនាំ។ លោកវរសេនីយ៍ត្រី ទិត្យ ណារ៉ុង អធិការនគរបាលក្រុងសៀមរាប បានមានប្រសាសន៍ឲ្យដឹងថា ដោយអនុវត្តតាមបទបញ្ជាលោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ក៏ដូចជាដើម្បីធ្វើឲ្យការអនុវត្ត
គោលនយោបាយភូមិ ឃុំ មានសុវត្ថិភាពឲ្យទទួលបាននូវលិទ្ធផលកាន់តែមានប្រសិទ្ធភាពខ្ពស់ផងនោះ ទើបជារៀងរាល់ថ្ងៃកម្លាំងនគរបាលក្រុងសៀមរាបតែងតែបានចុះប្រតិបត្តិការណ៍លើការ ការពារថែរក្សាសន្តិសុខ សុវត្ថិភាពនិងសណ្តាប់ធ្នាប់សង្គមជូនភ្ញៀវទេសចរណ៍ក៏ដូចជាបងប្អូនប្រជាពលរដ្ឋជាប្រចាំដើម្បីយើងធានាបាននូវសន្តិសុខ សុវត្ថិភាពនិងសណ្តាប់ធ្នាប់ពិសេសគឺក្នុងរស់នៅរបស់ប្រជាពលរដ្ឋឲ្យកាន់
តែមានសេចក្តីសុខផងដែរ។ដោយលោកវរសេនីយ៍ត្រី ទិត្យ ណារ៉ុង អធិការនគរបាលក្រុងសៀមរាប បានបន្តឲ្យដឹងទៀតថាជាក់ស្តែងក្មេងទំនើងទាំង៣នាក់នេះបន្ទាប់ពីសមត្ថកិច្ចបានធ្វើការសួរនាំរួចមកពួកគេបានឆ្លើយសារភាពថានៅក្នុងអំឡុងថ្ងៃខែកើតហេតុខាងលើពួកគេបំរុង
និងធ្វើសកម្មភាពដេញកាប់គ្នាជាមួយនិងក្មេងទំនើងមួយក្រុមទៀតតែមិនទាន់បានធ្វើសកម្មភាពផងក៏ត្រូវបានកម្លាំងសមត្ថកិច្ចដែលកំពុងតែជិះម៉ូតូល្បាតនៅត្រង់ចំណុចកើតមកតែម្តង ។ បច្ចុប្បន្នក្មេងទំនើងទាំង៣នាក់នេះត្រូវបានសមត្ថកិច្ចធ្វើការអប់រំនិងធ្វើកិច្ចសន្យាដោយហៅអាណាព្យាបាលមកយកទៅអប់រំបន្តឲ្យឈប់ប្រព្រឹត្តនៅគ្រប់សកម្មភាពដែលខុសពីច្បាប់ដែលបានកំណត់ ៕
ដោយ លោក ខេង ខេមរា 
