កំពង់ឆ្នាំង៖យុវនារីជាសិស្សថ្នាក់ទី១០ម្នាក់បានរងរបួសធ្ងន់ធ្ងរ ដោយសាររថយន្ត២គ្រឿងបុកនាងកំពុងជិះម៉ូតូ អូសជាប់ក្រោមរថយន្តជាង២០ម៉ែត្រ ករណីគ្រោះថ្នាក់នេះបានកើតឡើងវេលាម៉ោង ៨និង៤០នាទី ព្រឹកថ្ងៃទី២៤ ខែមេសា ឆ្នាំ២០១៥ នៅលើផ្លូវជាតិលេខ៥ ស្ថិតក្នុងភូមិសាលាផ្លូវវាយ ឃុំស្វាយជ្រុំ ស្រុករលារប្អៀរ។
សមត្ថកិច្ចនគរបាលចរាចរណ៏ផ្លូវគោកខេត្តបាននិយាយអោយដឹងថា៖យុវសិស្សរងគ្រោះមានឈ្មោះ ឌឹម មុនីកែវ អាយុ១៦ឆ្នាំ ជាសិស្សរៀនថ្នាក់ទី១០វិទ្យាល័យព្រះស៊ីសុវត្តិ ក្រុងភ្នំពេញ រស់នៅក្នុងភូមិជ័យជំនះ ខ័ណ្ឌដូនពេញ ក្រុងភ្នំពេញ ជិះម៉ូតូម៉ាកហ្វីណូ ពណ៌សខ្មៅពាក់ស្លាកលេខ ភ្នំពេញ 1BD-2022។ចំណែករថយន្តបង្ក ទី១ម៉ាក ឡុចស៊ីសធន់តូច ពណ៌ស្ករ ពាក់ស្លាកលេខ ភ្នំពេញ 2Z-3934 បើកបរដោយឈ្មោះ ឆាយ រំភើយ អាយុ ៤៤ឆ្នាំរស់នៅភូមិកុយដាំរាំ ឃុំដាំរាំ ស្រុកបាណន់ ខេត្តបាត់ដំបង។ រថយន្តបង្កទី២ម៉ាក ហាយឡិនឌ័រ ពាក់ស្លាកលេខ ភ្នំពេញ 2Z- 3442 បើកបរដោយឈ្មោះ វ៉ែន ឌឿន អាយុ២៩ឆ្នាំ រស់នៅភូមិផ្សារព្រុំ ឃុំស្ទឹងកាច់ ស្រុសាលាក្រៅ ខេត្តប៉ៃលិន ។
សមត្ថកិច្ចបានអោយដឹងថា៖មុនពេលកើតហេតុយុវសិស្សរងគ្រោះបានបើកម៉ូតូ១គ្រឿងម្នាក់ឯងជាមួយនិងម៉ូតូ៣គ្រឿងទៀតត្រូវជាបងប្អូនធ្វើដំណើរពីភ្នំពេញទៅខេត្តពោធិសាត់។លុះមកដល់កន្លែងកើតហេតុ រថយន្តឡុចស៊ីស ដែលបានបើកក្នុងទិសបញ្ច្រាស់គ្នា បានបើកជែងរថយន្តធំមួយគ្រឿងទៀតក្នុងទិសស្របគ្នា ក្នុងពេលម៉ូតូជនរងគ្រោះក៍បានបើកមកដល់ទន្ទឹមគ្នានេះដែរ ហើយបានកៀរម៉ូតូដួលមនុស្សចូលក្រោមឡាន ខណៈនោះដែររថយន្តហាយឡេនឌ័រមួយគ្រឿងទៀតបានបុកគូថរថយន្តឡិចស៊ីស អូសជនរងគ្រោះចម្ងាយប្រមាណជាង២០ម៉ែត្រ ទើបរថយន្តឈប់បណ្តាលអោយជនរងគ្រោះបោកត្រឡប់ត្រឡិន និងរបួសយ៉ាងធ្ងន់ធ្ងរ។
ក្រោយពេលកើតហេតុ ក្រុមគ្រួសារជនរងគ្រោះ៣ម៉ូតូទៀតបានរត់តាមឃាត់រថយន្តឡិចស៊ីសដើម្បីជួយសង្គ្រោះជនរងគ្រោះនៅក្រោមរថយន្ត បន្ទាប់មកជនរងគ្រោះត្រូវបានក្រុមគ្រួសារដឹកបញ្ជូនមកសង្គ្រោះបន្ទាន់នៅមន្ទីរពេទ្យខេត្តកំពង់ឆ្នាំង។
ដោយឡែករថយន្តបង្កទាំង២គ្រឿង និងអ្នកបើកបររថយន្តទាំង២នាក់ ត្រូវបានសមត្ថកិច្ចស្រុករលាប្អៀរ សហការជាមួយសមត្ថកិច្ចនគរបាលចរាចរណ៍ខេត្តនាំយកមក កាន់ស្នងការនគរបាលខេត្ត ដើម្បីកសាងសំណុំរឿងតាមផ្លូវច្បាប់។
ករណីគ្រោះថ្នាក់ចរាចរណ៍ខាងលើនេះ ត្រូវបានសមត្ថកិច្ចសន្និដ្ឋានថា បណ្តាលមកពីរថយន្តឡិចស៊ីសបើកជែងក្នុងស្ថានភាពគ្រោះថ្នាក់ រំលោភលើចំណែកផ្លូវម៉ូតូរបស់ជនរងគ្រោះ ចំណែករថយន្តហាយឡេនឌ័របើកបរលឿនពេកជួបហេតុការណ៍ជាន់ហ្វ្រាំងមិនជាប់ ទើបបង្កអោយមានគ្រោះថ្នាក់បែបនេះ៕
