កាលពីវេលាម៉ោង ៨ និង៥៥នាទីព្រឹក ថ្ងៃទី២៤ ខែមេសា ឆ្នាំ២០១៥ នារីម្នាក់បានរងរបួសធ្ងន់ ខណៈកំពុងជិះម៉ូតូត្រូវបានរថយន្ត១គ្រឿងបើកមកកៀរឲ្យដួល និងអូសជាង១០ម៉ែត្រ រីឯរថយន្តហាយឡេនឌឺ១គ្រឿងទៀតបើកពីក្រោយចាប់ហ្វ្រាំងមិនទាន់បុករថយន្តលុចស៊ីសបន្តកន្ទុយគ្នា ហេតុការណ៍នេះកើតឡើងនៅលើកំណាត់ផ្លូវជាតិលេខ៥ ស្ថិតក្នុងភូមិសាលាផ្លូវវាយ ឃុំស្វាយជ្រុំ ស្រុករលាប្អៀរ។
នគរបាលស្រុករលាប្អៀរបានឲ្យដឹងថា មុនពេលកើតហេតុមានម៉ូតូចំនួន៤គ្រឿងធ្វើដំណើរពីភ្នំពេញទៅខេត្តពោធិ៍សាត់ តាមបណ្តោយផ្លូវជាតិលេខ៥ ក្នុងនោះម៉ូតូនារីរងគ្រោះម៉ាក ហ្វីណូ ពាក់ស្លាកលេខ ភ្នំពេញ 1BD. 2022 បានជិះមុខគេ លុះដល់ចំណុចកើតហេតុ ក៏មានរថយន្តម៉ាកឡុចស៊ីសRX300 ពាក់ស្លាកលេខ ភ្នំពេញ 2Z. 3934 បើកបរដោយបុរសឈ្មោះ ឆាយ រំភើយ អាយុ៤១ឆ្នាំ បានវ៉ារថយន្តមួយគ្រឿងក្នុងដំណើរស្របទិសគ្នា ហើយក៏ជ្រុលទៅកៀរនឹងម៉ូតូរបស់នារីរងគ្រោះបណ្តាលឲ្យដួលចូលក្រោមរថយន្ត និងអូសនារីរងគ្រោះជាង១០ម៉ែត្រ។ ខណៈនោះរថយន្តម៉ាកហាយឡនឌឺ ១គ្រឿងទៀត ពណ៌ខ្មៅ ស្លាកលេខ ភ្នំពេញ 2Z. 3442 បើកមកពីក្រោយចាប់ហ្វ្រាំងមិនទាន់ក៏បុកគូថរថយន្តឡុចស៊ីសកំពិតផ្នែកខាងមុខ។
ក្រោយកើតហេតុនារីរងគ្រោះបានបញ្ជូនទៅសង្គ្រោះនៅមន្ទីពេទ្យ ចំណែកមធ្យោបាយធ្វើដំណើរទាំង៣គ្រឿងត្រូវបាននាំមករក្សាទុកនៅការិយាល័យចរាចរណ៏ផ្លូវគោករបស់ស្នងការដ្ឋាននគរបាលខេត្ត ដើម្បីរង់ចាំការដោះស្រាយតាមនិតិវិធី ។
