រាជធានីភ្នំពេញ ៖ បុរសម្នាក់បានរងរបួសធ្ងន់ធ្ងរបែកមុខបែកមាត់ ខណៈជិះម៉ូតូទៅបុកពីក្រោយរថយន្តហ្វូស្សូ (FUSO) ធុនធំចំពេញទំហឹង ដែលកំពុងស៊ីញ៉ូចតនៅក្បែរចិញ្ចើមផ្លូវ ដែលហេតុការណ៍នេះបានកើតឡើងនៅម៉ោង ១០និង៥០នាទីយប់ថ្ងៃទី០៦ខែមេសាឆ្នាំ២០១៤ ចំណុច
ក្បែរស្ថានីយ៍ប្រេងឥន្ទនៈតូតាល់ តាមបណ្ដោយផ្លូវ២៧១ ស្ថិតនៅសង្កាត់ទួលទំពូង២ ខណ្ឌចំការមន។
ប្រភពព័ត៌មានពីកន្លែងកើតហេតុឱ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកហ្វូស្សូ ពណ៌លឿងក្រម៉ៅ គ្មានស្លាកលេខ កំពុងតែចតនៅក្បែរចិញ្ចើមផ្លូវ២៧១ ត្រង់ចំណុចមុខស្ថានីយប្រេងឥន្ទនៈតូតាល់ ដោយមានបើកភ្លើងស៊ីញ៉ូ ស្របពេលនោះក៏មានបុរសម្នាក់ ជិះម៉ូតូមួយគ្រឿងម៉ាកគុប ពណ៌ទឹកប៊ិច អត់មានស្លាកលេខ ក្នុងស្ថានភាពស្រវឹង បានជិះទៅបុកគូថរថយន្ត ហ្វូស្សូ ពីក្រោយចំពេញទំហឹង ធ្វើឱ្យម៉ូតូគៀបជាប់នៅក្រោមរថយន្ត ចំណែកឯអ្នកបើកបុកទៅនិងកាងរថយន្តបណ្តាលឱ្យបែកមុខបែកមាត់ហូរឈាម។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ភ្លាម និងបានហៅរថយន្តសាមុយរបស់មន្ទីរពេទ្យខ្មែរ-សូវៀតដឹកជនរងគ្រោះទៅព្យាបាលរបួស ប៉ុន្តែជនរងគ្រោះមិនចង់ទៅដោយសារគ្មានប្រាក់ ហើយសមត្ថកិច្ចក៏បានពន្យល់ប្រាប់ហេតុផលទើបជនរគ្រោះព្រមទៅមន្ទីរពេទ្យដើម្បីព្យាបាលរបួស។
ក្រោយពេលកើតហេតុ សមត្ថកិច្ចបានធ្វើការវាស់វែងយករថយន្តនិងម៉ូតូយកទៅរក្សាទុកនៅការិយាល័យចរាចរជើងគោកស្នងការនគរបាលរាជធានីភ្នំពេញដើម្បីធ្វើការដោះស្រាយ៕
