កំពង់ធំ៖ សកម្មភាពដឹកជញ្ជូនឈើ អាណាធិបតេយ្យបាន កើតឡើងយ៉ាងគគ្រឹកគ្រេង ចេញពីព្រៃសហគមន៍ សមត្ថកិច្ចមេព្រៃគ្មានវិធានការ បង្ក្រាបបទល្មើសដឹកជញ្ជូន ដោយខុសច្បាប់ ដែលជាហេតុធ្វើ មហាជនទូទៅ ដែលស្រឡាញ់ព្រៃឈើ បានសម្តែងការសោកស្តាយ ចំពោះព្រៃឈើដែលបានហិនហោច ដោយសារតែការមិនអើពើររបស់សមត្ថកិច្ចជំនាញ។
ឈើហ៊ុប ទាំងមូលទាំងៗត្រូវបានដឹកជញ្ជូនចេញពីព្រៃសហគមន៍ ស្ថិតនៅក្នុងភូមិ រនាម ភូមិស្រឡៅ ឃុំ ទំរីង ស្រុកសណ្តាន់ ខេត្តកំពង់ធំ ក្នុង១ថ្ងៃចាប់ពី ១០ ទៅ ១៥ រទេះ ឆ្លងកាត់ស្រុកប្រាសាទសំបូរ ចំនុចភូមិ ស្វាយ ឃុំ ស្រើង ទៅលក់នៅក្នុងឃុំ ទីពោ ស្រុកសន្ទុក ខេត្តកំពង់ធំ ដែលត្រូវបានគេដឹងថា មានការត្រូវរ៉ូវគ្នាជាមួយ នាយសង្កាត់រដ្ឋបាលព្រៃឈើ តាំងក្រសាំង ទើបបានបណ្តែតបណ្តោយ អោយមានការដឹកជញ្ជូនឈើដោយ មិនខ្លាចញញើតច្បាប់។
តាមប្រភពពត៌មាន ពីអ្នកដឹកឈើហ៊ុប បានឲ្យដឹងថា ការដឹកជញ្ជូនឈើហ៊ុប ត្រូវបានបង់ជូនសមត្ថកិច្ច គ្រប់ ស្ថាប័នដោយចរចារគ្នាតាមទូរស័ព្ទ មុនពេលដែលការដឹកជញ្ជូនចេញពីព្រៃ ជារៀងរាល់ដង នៅពេលដែល ដឹកចេញ តែងតែមានសត្ថកិច្ច ទូរស័ព្ទប្រាប់នៅពេលដែល ថ្នាក់លើចុះមកពិនិត្យ ឬអ្នកកាសែត តែនៅពេល ខ្លះក៏ត្រូវបានកាប់ឈើទំលាក់ចោល តាមផ្លូវ ហើយបរទេះរត់យករួចខ្លួន ព្រោះខ្លាចគេចាប់ទាំងរទេះ និងមនុស្ស លោកបានបន្តថាទោះ ជាមានបញ្ហាប្រឈមបែបនេះក្តី ក៏នៅតែសូរទ្រាំព្រោះឃើញគេរកបាន បើបិទ ទាល់តែបិទទាំងអស់គ្នា ។
សកម្មភាពការដឹកជញ្ជូនបទល្មើសព្រៃឈើនេះ ត្រូវបានគេជួបប្រទះឃើញ នៅរសៀលម៉ោង ០៣.២៩នាទី ថ្ងៃទី ០២ ខែ កុម្ភះ ឆ្នាំ២០១៤ តាមបណ្តោយផ្លូវក្នុងព្រៃមួយកន្លែង ដែលមានរទេះចំនួន ៧រទេះ កំពុងតែធ្វើ សកម្មភាពដឹកជញ្ជូន ខណៈពេលដែល អ្នកយកពត៌មាន បានព្យាយាម ទូរស័ព្ទសុំ អោយលោក ហូ សុធី សមត្ថកិច្ចមេព្រៃ ចាត់វិធានការ ទប់ស្កាត់ការដឹកជញ្ជូនឈើខុសច្បាប់ តែពុំត្រូវបានចុះមកបង្ក្រាបនោះទេ ជាហេតុបណ្តាលឲ្យមានការសង្ស័យថា ប្រហែលជាត្រូវថ្នាំសណ្តំ។
««ដោយ ប៊ុន រដ្ឋា
