កំពង់ឆ្នាំង៖ ដើម្បីយកជ័យជំនះក្នុងការបោះឆ្នោត ក្រុមប្រឹក្សាឃុំ សង្កាត់ អោយទទួលបានជោគជ័យជូនគណៈបក្សប្រជាជនកម្ពុជានៅឆ្នាំ២០១៨ខាងមុខនេះ នៅព្រឹកថ្ងៃទី២៣ ខែមិថុនា ឆ្នាំ២០១៥ គណៈកម្មាធិការគណៈបក្សប្រជាជនកម្ពុជាខេត្តកំពង់ឆ្នាំង បានធ្វើពិធី
សំណេះសំណាលនិងពង្រឹងមេក្រុមបក្សចំនួន៤៦៤នាក់មកពីស្រុករលាប្អៀរ និងក្រុងកំពង់ឆ្នាំង នៅក្នុងសាលានយោបាយបក្សខេត្តកំពង់ឆ្នាំង។
លោក ឡុង សាងៀម ប្រធានគណៈបក្សប្រជាជនកម្ពុជាក្រុងកំពង់ឆ្នាំង បានអានរបាយការណ៍អោយដឹងថា៖សមាជឹកមេក្រុមបក្សក្នុងក្រុងកំពង់ឆ្នាំងដែលចូលរួមក្នុងពេលនេះមកពីថ្នាក់ភូមិ១០៤នាក់ ថ្នាក់សង្កាត់៥២នាក់ ថ្នាក់ក្រុង២៤នាក់ និងមកពីគណៈកម្មាធិការសាខាបក្សសាលា និងនាយកសាលា១៣នាក់ សរុបមានចំនួន១៩៣នាក់ ដោយឡែកមេក្រុមបក្សមកពី៤ឃុំក្នុងស្រុករលាប្អៀរមានចំនួន២៧៦នាក់ សរុបរួម៤៦៤នាក់។
លោកបានបញ្ជាក់អោយដឹងទៀតថា៖ការបោះឆ្នោតជ្រើសរើសក្រុមប្រឹក្សាសង្កាត់អណត្តិទី៣ ក្នុងក្រុងកំពង់ឆ្នាំង ថ្ងៃទី៣ មិថុនា ឆ្នាំ២០១២ គណៈបក្សប្រជាជនកម្ពុជាបានទទួលការគាំទ្រចំនួន៧០,២៤% គណៈបក្សសមមរង្សីបាន២១% គណៈបក្សសិទ្ធមនុស្ស៣,៤៥% ប្រៀបធៀបលទ្ធផលនេះគណៈបក្សប្រជាជនកម្ពុជាកើន៤អសនៈប្រៀបធៀបនឹងអណត្តិទី២ គឺទទួលបាន២៣លើ២៨អសនៈ។ក្នុងឆ្នាំ២០១៥នេះ ប្រជាពលរដ្ឋនៅក្នុងក្រុងកំពង់ឆ្នាំងមានចំនួន៤០.៦៦៦នាក់ ក្នុងចំនួនខាងលើនេះ សមាជឹកគណៈបក្សប្រជាជនកម្ពុជាមានចំនួន១៧.៩២២នាក់ ស្មើនឹង៦៦,៧១%នៃចំនួនប្រជាពលរដ្ឋដែលមានអាយុ១៨ឆ្នាំឡើង មេក្រុមបក្សមាន១.២១០ក្រុមបក្ស និង៦.៦៤៨គ្រួសារបក្ស។
ឯកឧត្តម ឈួរ ច័ន្ទឌឿន ប្រធានគណៈកម្មាធិការគណៈបក្សប្រជាជនកម្ពុជាខេត្តកំពង់ឆ្នាំងបានថ្លែងអោយដឹងថា៖ដើម្បីធ្វើអោយគណៈបក្សប្រជាជន ទទួលបានជ័យជំនះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខនេះ គ្រប់សាខាបក្ស អនុសាខាបក្ស និងប្រធានក្រុមបក្សគ្រប់ជាន់ថ្នាក់ ត្រូវពង្រឹងសាមគ្គីភាពថ្ទៃក្នុងបក្សអោយបានរឹងមាំដោយខិតខំអប់រំសតិអារម្មណ៍នយោបាយអោយសមាជឹកបក្ស និងប្រជាពលរដ្ឋចូលរួមគាំទ្រគណៈបក្សប្រជាជន ព្រោះគណៈបក្សប្រជាជនកម្ពុជាគឺជារបស់ប្រជាជន ដើម្បីប្រជាជន មុនពេលបោះឆ្នោត ត្រូវអប់រំសមជិកបក្សអោយយល់ពីការគូសសន្លឹកឆ្នោត និងដល់ថ្ងៃបោះឆ្នោត ត្រនាំគ្នាដឹកជញ្ជូនសមាជិបក្សទៅបោះឆ្នោតអោយបានគ្រប់គ្នា។អាជ្ញាធរគ្រប់ថ្នាក់ត្រូវខិតខំបំរើសេវាសាធារណៈ អោយបានល្អប្រសើរ យកចិត្តទុក្ដាក់ដោះស្រាយសំណូមពរ ឬទុកកង្វល់ផ្សេងៗរបស់ប្រជាពលរដ្ឋតាមគ្រប់រូបភាព ខិតខំដោះស្រាយទំនាស់តូចៗនៅតាមមូលដ្ឋានអោយបានឆាប់រហ័សប្រកបដោយប្រសិទ្ធិភាព លុបបំបាត់ចោលអោយអស់នូវភាពអសកម្ម ដែលធ្វើអោយប្រជាពលរដ្ឋបាត់ជំនឿ និងត្រូវលើកកំពស់ការជឿជាក់ ស្រឡាញ់គាំទ្រយ៉ាងស្មោះស្ម័គពីប្រជាជនគ្រប់រូប។
ឯកឧត្តមបានបន្តថា៖គ្រប់ថ្នាក់ដឹកនាំត្រូធ្វើជាគំរូដឹកនាំអោយបាន មេល្អពិតជាដឹកនាំមានជោគជ័យ និងត្រូវតែកែលំអរខ្លួន និងដោះស្រាយអោយបានជាដាច់ខាតនូវការថ្នាំងថ្នាក់របស់ប្រជាជនចំពោះបក្ស។ បន្តយកចិត្តទុកដាក់ពង្រឹងសន្តិសុខសណ្តាប់ធ្នាប់សាធារណៈអោយបានរឹងមាំ ដើម្បីភាពសុខសាន្តរបស់ប្រជាពលរដ្ឋ តាមដានសភាពការណ៍នៅមូលដ្ឋាន និងវាយបកឧបាយកលរបស់ជនអគតិអោយបានចំបញ្ហាទាន់ពេលវេលា។ ពង្រឹងប្រសិទ្ធិភាពនៃការគ្រប់គ្រងរដ្ឋបាលដែនដីអោយបានម៉ឺងម៉ាត់តាមបែបនីតិរដ្ឋ និងអនុវត្តអោយបានម៉ឺងម៉ាត់នូវគោលនយោបាយភូមិឃុំមានសុវត្ថិភាពរបស់រាជរដ្ឋាភិបាល។ចូលរួមអោយបានអនុវត្តអោយបានតាមគោលនយោបាយកំណែរទំរង់ស៊ីជម្រៅ របស់ប្រមុខរាជរដ្ឋាភិបាល ដើម្បីរួមគ្នាអភិវឌ្ឍន៍ប្រទេសជាតិអោយមានការរីកចំរើនលើគ្រប់វិស័យ៕
