កំពង់ឆ្នាំង៖ក្រុមការងារចំរុះថ្នាក់ខេត្តបានចុះត្រួតពិនិត្យការឈូសឆាយព្រៃលិចទឹកនៅក្នុងតំបន់២ របស់ឃុំផ្សារ ស្រុករិបូរណ៌ តាមបញ្ជាររបស់លោកអភិបាលខេត្ត ពេញមួយព្រឹកថ្ងៃទី២៣ ខែមិថុនា ឆ្នាំ២០១៥ ហើយទទួលស្គាស់ថា ពិតជាមានការឈូសឆាយព្រៃលិចទឺកមួយ
ចំនួនពិតមែន ដូចក្រុមអ្នកកាសែតបានចុះផ្សាយកាលពីថ្ងៃទី១៥ ខែមិថុនា ឆ្នាំ២០១៥ បន្ទាប់ពីមានរបាយការណ៍របស់អាជ្ញាធរឃុំ និងខណ្ឌ័រដ្ឋបាលជលផលកំពង់ឆ្នាំងចុះទៅពិនិត្យ ហើយរាយការណ៍ភូតភរលោកអភិបាលខេត្តថា ក្រុមអ្នកកាសែតផ្សាយព័ត៌មានខុសពីការពិត។
លោក ម៉ម ឈឿម ប្រធានក្រុមការងារចុះថ្នាក់ខេត្ត ជាប្រធានមន្ទីរព័ត៌មានខេត្ត និងជាអ្នកនាំពាក្យខេត្ត បាននិយាយអោយដឹងថា៖តាមចំណារបញ្ជាររបស់លោកអភិបាលខេត្ត នៅព្រឹកថ្ងៃទី២៤ ខែមិថុនា ឆ្នាំ២០១៥លោកបានដឹកនាំក្រុមការងារចុះរុះថ្នាក់ខេត្ត មានតំណាងមន្ទីរពាក់ពន្ធ័ និងអាជ្ញាធរមូលដ្ឋាន រួមជាមួយអ្នកកា សែតមួយក្រុមដែលបានចុះផ្សាយរឿងនេះផងនោះ បានឯកភាពគ្នាជិះគោយន្ត១គ្រឿង ចុះទៅពិនិត្យព្រៃលិចទឹកនៅក្នុងតំបន់២ខាងលើដែលក្រុមអ្នកកាសែតបានថតចេញផ្សាយ អោយបានឃើញជាក់ស្តែង ថាតើការចេញផ្សាយរបស់ក្រុមអ្នកកាសែត និងរបាយការណ៍របស់មន្ត្រីជំនាញនិងអាជ្ញាធរឃុំ ជូនទៅលោកអភិបាលខេត្ត អ្នកណាមួយនិយាយពិត។
នៅក្នុងពេលចុះទៅដល់ព្រៃលិចទឹកដែលត្រូវបានគេឈូសឆាយកន្លងមក មន្ត្រីជំនាញរដ្ឋបាលជលផ ល លោកមេភូមិក្បាលថ្នល់ លោកមេភូមិកំព្រង លោកមេឃុំផ្សារ និងតំណាងប្រជាពលរដ្ឋ ជាអ្នកស្នើសុំច្បាប់ពង្រាបដីស្រែចាស់ចំនួន៤៥ហិកតាដែលធ្លាប់ធ្វើ បានជជែកយ៉ាងតឹងមាត់ដាក់គ្នា ជាមួយក្រុមអ្នកកាសែត និង
ក្រុមការងារចំរុះថ្នាក់ខេត្ត វែកញែករកត្រូវរៀងៗខ្លួន ខណៈពេលបានឃើញព្រៃលិចទឹកមួយចំនួនត្រូវបានគេកាប់ឆ្ការដុតចោលពីមុនៗមកនៅសល់តែគល់ឈើ និងត្រូវបានគេឈូសឆាយរុករានទន្ត្រានយកធ្វើជាដី ស្រែ។
ក្រោយពីបានចុះត្រួតពិនិត្យពេញមួយព្រឹកមក លោក ម៉ម ឈឿម ប្រធានក្រុមការងារចំរុះថ្នាក់ខេត្តបានបុកសរុបវាយតម្លៃថា៖ លោកទទួលស្គាស់ថា ពិតជាមានបទល្មើសឈូសឆាយដីព្រៃលិចទឹកនៅក្នុងតំបន់២ឃុំផ្សារស្រុកបរិបូរណ៌មួយចំនួនពិតប្រាកដមែន ដែលខុសពីការស្នើសុំច្បាប់ និងការអនុញ្ញាតអោយពង្រាបតែដីស្រែចាស់ដែលធ្លាប់ធ្វើពីមុនមករបស់លោកអភិបាលខេត្ត។ករណីនេះលោកនិងធ្វើរបាយការណ៍ជូនលោកអភិបាលខេត្ត និងស្នើសុំអោយអាជ្ញាធរឃុំ និងជំនាញរដ្ឋបាលជលផលទប់ស្កាត់បញ្ឈប់ជាបន្ទាន់នូវបទល្មើសខាងលើនេះ តែលោកមិនឃាត់ការឈូសឆាយពង្រាបដីស្រែចាស់ៗរបស់ប្រជាពលរដ្ឋនោះឡើយ។
លោក តាត សីហាក់ មន្ត្រីខណ្ឌ័រដ្ឋបានជលផលខេត្តបានលើកឡើងថា៖ដីតំបន់២ ប្រជាពលរដ្ឋមានសិទ្ធអាស្រ័យផលធ្វើស្រែចំការ ប៉ុន្តែការឈូសឆាយទន្ទ្រានយកដីព្រៃលិចទឹកគឺជាអំពើខុសច្បាប់ដែលត្រូវទប់ស្កាត់និងបង្ក្រាប គឺមិនអនុញ្ញាតអោយកើតមានទៀតឡើយ។លោក ប៊ិន សុផាន មេឃុំផ្សារ លោក អែម រ៉ិន មេភូមិក្បាល និងលោក នួន សុផាន់ មេភូមិកំព្រង ឃុំផ្សារ បានឯកភាពនូវការលើកឡើងរបស់លោកប្រធានក្រុមការ ងារចុះរុះថ្នាក់ខេត្ត និងមន្ត្រីជំនាញ តែលោកស្នើសុំអោយប្រជាពលរដ្ឋបានឈូសពង្រាបដីស្រែបន្តទៀតតាមច្បាប់ស្នើសុំ ពួកលោកនិងទប់ស្កាត់មិនអោយមានការឈូសឆាយដីព្រៃលិចទឹកដូចខាងលើទៀតឡើយ។
ប្រភព័ត៌មានពីអ្នកយកព័ត៌មានយើងនៅស្រុកបរិបូរណ៌បានអោយដឹងថា៖មានមន្ត្រីជលផលខិលខូចម្នាក់ ឃុបឃិតជាមួយមេការរត់ការឈូសឆាយដីម្នាក់ បានបំផុសប្រជាពលរដ្ឋរាប់រយនាក់ប្តិតមេដៃតវ៉ាបរិហារកេរ្តិ៍ថា៖ក្រុមអ្នកកាសែតរារាំងមិនអោយប្រជាពលរដ្ឋឈូសឆាយពង្រាបដីស្រែ ករណីនេះក្រុមអ្នកកាសែតសំណូមពរដល់សមត្ថកិច្ចវែកមុខជនខិលខូច(ស៊ីលុយឆ្អែតមកលាបមាត់អ្នកកាសែត)ខាងលើនេះ និងបក្ខពួកអោយឃើញដើម្បីចាត់ការតាមផ្លូវច្បាប់ទើបគេរៀងចាល៕
