ខេត្តបន្ទាយមានជ័យ៖ នៅព្រឹកថ្ងៃទី២៤ខែកក្កដា ឆ្នាំ២០១៥ នៅសាលប្រជុំសាលាខេត្តបន្ទាយមានជ័យធនាគារជាតិនៃកម្ពុជាបានធ្វើការផ្សព្វផ្សាយសេចក្តីថ្លែងការណ៍រួមរវាងក្រសួងសេដ្ឋកិច្ចនិងហិរញ្ញវត្ថុផ្តល់កម្ចីមានការប្រាក់ខ្ពស់។ពិធីនេះមានការចូលរួមលោកជាចាន់តូ ទេសាភិបាលធនាគារជាតិនៃកម្ពុជា លោកគោស៊ុំសារឿតអភិបាលខេត្តបន្ទាយមានជ័យនិសិត្សសមិត្តកិច្ចនិងមន្ត្រីជាច្រើននាក់ទៀត។លោកជាចាន់តូបានថ្លែងក្នុងសិក្ខាសាលាដ៏មានតម្លៃនេះថាការផ្សព្វផ្សានេះបានរៀបចំឡើងតាមស្មារតីណែនាំដ៏ខ្ពង់ខ្ពស់ របស់សម្តេចតេជោហ៊ុនសែននាយករដ្ឋមន្ត្រីនិងបន្ទាប់ពីក្រសួងសេដ្ឋកិច្ចនិងហិរញ្ញវត្ថុនិងធនាគារជាតិនៃកម្ពុជាបានចេញសេចក្តីថ្លែងការណ៍រួមកាលពីថ្ងៃទី២ ខែកុម្ភៈ ឆ្នាំ២០១៥ ដើម្បីផ្សព្វផ្សាយនិង
ជម្រាបជូនដល់សាធារណជននិងអាជ្ញាធរមានសមត្ថកិច្ចនៅក្នុងមូលដ្ឋាន គ្រឹះស្ថានហិរញ្ញវត្ថុឲ្យបានដឹងច្បាស់ថា បច្ចុប្បន្នមានអង្គការមិនមែនរដ្ឋាភិបាលសមាគមន៍សប្បុរសធម៌ ឬជាសប្បុរសជនមួយចំនួនដែលបានធ្វើការឲ្យខ្ចីប្រាក់តាមជនបទនិងទីប្រជុំជន ហើយតែងតែគេចចាត់។លោក ជាចាន់តូបញ្ជាក់ទៀតថាគិតត្រឹមខែធ្នូឆ្នាំ២០១៤ គ្រឹះស្ថានមីក្រូហិរញ្ញវត្ថុសរុបមានចំនួន៣៩ ក្នុងនោះគ្រឹះស្ថានចំនួន ៧ ត្រូវបានអនុញ្ញាតឲ្យទទួលប្រាក់បញ្ញើពីសាធារណជននិងប្រតិបត្តិការឥណទានជនបទ ដែលចុះបញ្ជីនៅធនាគារជាតិនៃកម្ពុជា មានចំនួន ៣៨។ ឥណទានផ្តល់ដោយ
គ្រឹះស្ថានមីក្រូហិរញ្ញវត្ថុមានទឹកប្រាក់សរុប ២ពាន់លានដុល្លារអាមេរិកដែលត្រូវបានផ្តល់ដល់អតិថិជន ១,៨០ លាននាក់ក្នុងនោះស្ត្រីមានចំនួន៨១%។ ទន្ទឹមនោះ ប្រាក់បញ្ញើសរុបមានចំនួនប្រមាណ ៩០០លានដុល្លារអាមេរិក ដែលទទួលបានពីអតិថិជនជាង១លាននាក់។ បន្ថែមពីនេះគ្រឹះស្ថានមីក្រូហិរញ្ញវត្ថុ បានកំពុងធ្វើប្រតិបត្តិការទូទាំង ២៥ ខេត្ត-ក្រុង ដោយមានបណ្តាញតំបន់ប្រតិបត្តិការ នៅថ្នាក់ស្រុកចំនួន ២.៣៣៨ ថ្នាក់ឃុំចំនួន ១៦.១៧៣ និងថ្នាក់ភូមិចំនួន ១០០.៣៤២។លោកបានបន្ថែមថា ក្រៅពីសេវាឥណទាន គ្រឹះស្ថានមីក្រូហិរញ្ញវត្ថុ ក៏មានសេវាមួយចំនួនទៀតដូចជា សេវាប្រាក់សន្សំ សេវាផ្ទេរប្រាក់ សេវាម៉ាស៊ីនដកប្រាក់ស្វ័យប្រវត្តិនិងសេវាធានារ៉ាប់រងខ្នាតតូចជាដើម។ សេវាទាំងអស់នេះត្រូវបានផ្តល់ឲ្យអតិថិជនក្នុង
គោលបំណងជួយសម្រួល និងបង្កើនស្ថានភាពហិរញ្ញវត្ថុគ្រួសារក៏ដូចជាអាជីវកម្មរបស់គាត់ឲ្យកាន់តែប្រសើរឡើង។ បច្ចុប្បន្នក្នុងចំណោមគ្រឹះស្ថាន មីក្រូហិរញ្ញវត្ថុទាំង៣៩ គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើចំនួន ៤ បានផ្តល់សេវាកម្មម៉ាស៊ីនដកប្រាក់ស្វ័យប្រវត្តិសរុបចំនួន ១៨៩ ម៉ាស៊ីន ក្នុងនោះគ្រឹះស្ថាន ប្រាសាក់មាន ៨១ ម៉ាស៊ីន គ្រឹះស្ថានហត្ថាកសិករមាន ៧២ ម៉ាស៊ីន គ្រឹះស្ថានអេអឹមខេមាន ២៥ ម៉ាស៊ីន និងគ្រឹះស្ថានស្ថាបនាមាន ១១ ម៉ាស៊ីន។លោកជាចាន់តូបានថ្លែងទៀតថាទោះបីជាអត្រាការប្រាក់របស់ គ្រឹះស្ថានមីក្រូហិរញ្ញវត្ថុមានការថយចុះជាបន្តបន្ទាប់ក៏ដោយ ក៏ធនាគារជាតិនៃកម្ពុជា នៅមានការបារម្ភពី អត្រាការប្រាក់ខ្ពស់ ដែលបណ្តាលឲ្យកូនបំណុលជំពាក់បំណុលរើខ្លួនមិនរួច ហិនហោចទ្រព្យសម្បត្តិនិងចំណាកស្រុក។មូលហេតុចម្បង នៃអត្រាការប្រាក់កម្ចី នៅតែមានកម្រិតខ្ពស់នេះគឺបណ្តាលមកពីសកម្មភាពប្រតិបត្តិការរបស់អង្គការ មិនមែនរដ្ឋាភិបាល សមាគម និងឈ្មួញឲ្យខ្ចីចងការប្រាក់ក្រៅប្រព័ន្ធដែលមិនស្ថិតក្រោមការត្រួតពិនិត្យ និងមិនចុះបញ្ជី នៅធនាគារជាតិនៃកម្ពុជា ត្រូវបានបង្កើតឡើង ក្នុងគោលបំណង ដើម្បីស្វែងរកប្រាក់ចំណេញ តាមរយៈការធ្វើប្រតិបត្តិការ មីក្រូ
ឥណទានជនបទ។អង្គការមិនមែនរដ្ឋាភិបាល សមាគម និងឈ្មួញឲ្យខ្ចីចងការប្រាក់ ក្រៅប្រព័ន្ធទាំងនោះបានចាត់ទុកខ្លួនឯង ជាគ្រឹះស្ថានមីក្រូហិរញ្ញវត្ថុស្របច្បាប់និងបានកំណត់យកអត្រាការប្រាក់កម្ចីខ្ពស់និងការគណនារបៀបសង ជារបៀបកេងចំណេញ ពីប្រជាពលរដ្ឋជាមួយនឹងការផ្តល់ភាពងាយស្រួលក្នុងការទទួលបានប្រាក់កម្ចីនិងមិនបានវិភាគលទ្ធភាពសងរបស់អតិថិជនឲ្យបានត្រឹមត្រូវ។ភាពងាយស្រួលនេះបានលើកទឹកចិត្តឱ្យប្រជាពលរដ្ឋទទួលបានប្រាក់កម្ចីពីប្រភពច្រើន ហើយជាលទ្ធផល នឹងធ្វើឱ្យពួកគាត់ជាប់បន្ទុកបំណុលវ័ន្ត.ក និងគ្មានលទ្ធភាពសងបំណុលវិញ ហើយទ្រព្យបញ្ចាំរួមមានដីធ្លី ផ្ទះសម្បែង ដីស្រែរបស់ពួកគាត់ត្រូវបានសមាគម ឈ្មួញ ឬអង្គការស្វែងរកប្រាក់ចំណេញទាំងនោះរឹបអូស។លោកបានថ្លែងទៀតថាដើម្បីទប់ស្កាត់បញ្ហាដែលបានកើតឡើងនេះក៏ដូចជាក្នុងគោលបំណងដើម្បីជួយការពារប្រជាពលរដ្ឋឲ្យចៀសផុតពីការ កេងប្រវ័ញ្ចពីសំណាក់អង្គការមិនមែនរដ្ឋាភិបាល សមាគម និងឈ្មួញឲ្យខ្ចីចងការប្រាក់ មិនស្របច្បាប់ទាំងនោះក្រសួងសេដ្ឋកិច្ចនិងហិរញ្ញវត្ថុនិងធនាគារជាតិនៃកម្ពុជា បានចេញសេចក្តីថ្លែងការណ៍រួមមួយ កាលពីថ្ងៃទី២ ខែកុម្ភៈ ឆ្នាំ២០១៥ ដើម្បីបំភ្លឺ
មតិសាធារណៈជ្រាបថា គ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណ ពុំមែនជារបស់រដ្ឋទេព្រមទាំងថ្កោលទោសចំពោះអង្គការ មិនមែនរដ្ឋាភិបាល សមាគម និងឈ្មួញឱ្យខ្ចីចងការប្រាក់ទាំងនោះឱ្យបញ្ឈប់ជាបន្ទាន់នូវសកម្មភាពកេងប្រវ័ញ្ចនេះ។ ក្នុងករណីដែលចង់បន្តសកម្មភាពឱ្យខ្ចីប្រាក់ អង្គការមិនមែនរដ្ឋាភិបាល សមាគម ឬបុគ្គលទាំងនោះ ត្រូវតែធ្វើឡើងក្នុងក្របខណ្ឌច្បាប់ ដោយត្រូវចូលខ្លួនមកសុំចុះបញ្ជី ឬអាជ្ញាប័ណ្ណពីធនាគារជាតិនៃកម្ពុជា។ ធនាគារជាតិនៃកម្ពុជា នឹងពិនិត្យគុណវុឌ្ឍិច្បាស់លាស់ ត្រឹមត្រូវ ព្រមទាំងចុះត្រួតពិនិត្យ ដល់ទីកន្លែងជាមុន ដើម្បីជាមូលដ្ឋានក្នុងការសម្រេចផ្តល់ឬមិនផ្តល់អាជ្ញាប័ណ្ណ ឬចុះបញ្ជី នៅធនាគារជាតិនៃកម្ពុជា៕
