ខេត្តសៀមរាប៖ លោក ព្រហ្ម ដូលីន ប្រធានសាខាកាំកុងត្រូលខេត្តសៀមរាប បាននិយាយឲ្យដឹងថា ៖ ប្រភេទចំណីអាហារវេចខ្ចប់រួច ដូចជាគ្រឿងកំប៉ុង ចំណីអាហារវរចខ្ចប់ដោយថង់ផ្លាស្ទីចជាដើម មានបញ្ហាប្រឈមជាងប្រភេទអាហារច្រកកែវនិងច្រកដប ក៏ប៉ុន្តែការថែរក្សាទុកមិនបានល្អ និង ចំណីអាហារវេចខ្ចប់រួចគ្រប់ប្រភេទ វាមានបញ្ហាបង្ករផលប៉ះពាល់ដល់សុខភាពមនុស្សដូចគ្នា ក្នុងករណីដែលទំនិញម្ហូបអាហារវេចខ្ចប់រួចទាំងនោះ ផុតកាលបរច្ឆេតនៃការប្រើប្រាស់ ។លោក ព្រហ្ម ដាលីន បានលើកឡើងយ៉ាងដូច្នេះ នៅក្នុងខណៈពេលដែលមន្ត្រីសាខាកាំកុងត្រូលខេត្ត រួមកិច្ចសហការជាមួយមន្ត្រីមន្ទីរពាណិជ្ជកម្មខេត្តសៀមរាប ចុះ
បំពេញការងារនៅផ្សារទីប្រជុំជនស្រុកក្រឡាញ់ កាលពីថ្ងៃសៅរ៍ ចុងសប្តាហ៍ទី៤ ខែកក្កដា កន្លងទៅនេះ ។ លោកបានបញ្ជាក់ថា ៖ គឺស្ថិតក្នុងគោលការណ៍ជាចម្បង សំដៅទៅលើការផ្សព្វផ្សាយអប់រំចំពោះអាជីវករ ឲ្យមានស្មារតីទទួលខុសត្រូវខ្ពស់ចំពោះសុខភាពរបស់អតិថិជន ដោយទី១ គឺការពិនិត្យមើលកាលបរិច្ឆេតនៃការប្រើប្រាស់ មិនត្រូវដាក់តាំងលក់ចំណីម្ហូបអាហារណាដែលហួសសុពលភាពនៃការប្រើប្រាស់នោះឡើយ ម្ហូបអាហារដែលច្រកកំប៉ុងទទួលរងការប៉ះទង្គិច បណ្តាលឲ្យកំពិតនោះ គឺមិនគប្បីត្រូវបានប្រើប្រាស់នោះឡើយ ។
នៅក្នុងបេសកកម្មត្រួតពិនិត្យនេះ លោក ប្រធានសាខាកាំកុងត្រូលខេត្តសៀមរាប បានវាយតម្លៃថា ៖ អាជីវករលក់ដូរគ្រឿងកំប៉ុង ចំណីម្ហូបអាហារវេចខ្ចប់រួចនៅផ្សារស្រុកក្រឡាញ់នេះ ថ្វីបើគ្រាន់តែជាទីប្រជុំជន ក៏ប៉ុន្តែពួកគាត់មានការយល់ដឹងច្រើន អំពីការត្រួតពិនិត្យ កាលបរិច្ឆតនៃការប្រើប្រាស់លើទំនិញរបស់ពួកគាត់ ក៏ប៉ុន្តែអ្វីនៅតែជាការព្រួយបារម្ភនោះ គឺទីតាំងស្តុកទុកទំនិញទាំងនោះ មិនបានសមស្របនៅឡើយ ព្រោះថា កាលបរិច្ឆេតកំណត់រយៈពេលនៃ
ការប្រើប្រាស់ទំនិញទាំងនោះ គឺវាមានល័ក្ខខ័ណអាកាសធាតុផងដែរ ដូច្នេះបើនៅក្នុងទីតាំងរក្សាទុកទំនិញទាំងនោះ ពុំសមស្របទេនោះ ទំនិញទាំងនោះនឹងអាចខូចគុណភាព មុនពេលកំណត់ នៃកាលបរិច្ឆេតប្រើប្រាស់ ហើយទំនិញទាំងនោះនឹងអាចបង្កគ្រោះថ្នាក់សុខភាពដល់អ្នកបរិភោគ ៕
