ខេត្តព្រះវិហារ កសិករធ្វើចំការដាំល្ពៅគីង្គក់នៅតាមតំបន់ដីក្រហមមានជីវជាតិមួយចំនួនក្នុងខេត្តព្រះវិហារជាពិសេសនៅតំបន់ស្រយង់់ស្រុកគូលែនដែលមានផ្ទៃដីបង្កបង្កើនផលធ្វើចំការធំជាងគេគឺមានយីអ៊ុនខ្ពស់វិញហើយដោយសារតម្លៃហាងឆេងផ្លែល្ពៅប្រភេទលេខ១ឆ្នាំនេះទ្បើងថ្លៃដល់២០០០រៀលក្នុង១គីទ្បូក្រាមស្មើនឹង២លានរៀលក្នុង១តោនមិនធ្លាប់មានពីមុនមក។កាលពីប្រមូលផលដើមដៃនៅខែមិថុនាវាមានតម្លៃត្រឹមតែ៦០០រៀលក្នុង១គីទ្បូក្រាមប៉ុណ្ណោះ។
គួររំលឹកថាកាលពីឆ្នាំ២០១៤ប្រជាកសិករធ្វើចំការវិលជុំដាំល្ពៅគីង្គក់(ល្ពៅគ្រើមសាច់ស្អិតល្មួតល្អ)នៅខេត្តព្រះវិហារបាក់ស្បាតម្តង១រួចមកហើយដោយសារពេលនោះទិន្នផលល្អហើយសំបូរប៉ុន្តែតម្លៃរបស់វាតាមត្រឹមតែ៣០០ទៅ៤០០រៀលប៉ុណ្ណោះក្នុង១គីទ្បូក្រាមគឺចន្លោះពី៣០ម៉ឺនទៅ៤០ម៉ឺនរៀលក្នុង១តោន។ផ្លែល្ពៅគីង្គក់វាមានទម្ងន់ធ្ងន់ជាងផ្លែល្ពៅសំបករលោងធម្មតាហើយទិន្នផលរបស់វាទទួលបាន៣តោនក្នុង១ហិកតា។
ស្ត្រីកសិករម្នាក់នៅតំបន់ស្រយង់និយាយដោយភាពត្រេកអរថាល្ពៅដែលគាត់ប្រមូលផលបានឈ្មួញកណ្តាលបានចុះមកប្រមូលទិញយកទាំងអស់ដោយល្ពៅប្រភេទលេខ១លក់បានថ្លៃ២០០០រៀលក្នុង១គីទ្បូក្រាមនិងល្ពៅលេខ២លក់បាន១៥០០រៀលក្នុង១គីទ្បូក្រាម។គាត់មានផ្ទៃដីចំការចំនួន៣ហិកតាដោយឆ្នាំនេះទិន្នផលល្ពៅធ្លាក់ចុះបន្តិចមកពីអាកាសធាតុប្រែប្រួលធ្វើអោយរាំងភ្លៀងខ្វះទឹកស្រោចស្រពដំណាំ។
ស្ដ្រីកសិកររូបនេះថ្លែងថាការដែលល្ពៅប្រភេទហ្នឹងទ្បើងថ្លៃនៅឆ្នាំនេះដោយសារនៅប្រទេសថៃជួបគ្រោះរាំងស្ងួតធ្វើអោយខូចខាតដំណាំល្ពៅធ្ងន់ធ្ងរហើយខ្វះល្ពៅចូលរោងចក្រថែមទៀតនេះបើតាមការអះអាងអោយដឹងរបស់ឈ្មួញកណ្តាលដែលនាំល្ពៅរបស់ខ្មែរយើងទៅលក់នៅព្រំដែនថៃ។ដំណាំល្ពៅមានអំណោយផលល្អគឺកសិករដាំវារយះពេល៣ខែនឹងទទួលបានផល។
តាមការអោយដឹងរបស់មន្ទីរកសិកម្មខេត្តព្រះវិហារបានលើកទ្បើងថាក្នុង១ឆ្នាំៗកសិករធ្វើចំការនៅខេត្តព្រះវិហារអាចប្រមូលផលផ្លែល្ពៅគីង្គក់បានរាប់ពាន់តោនហើយវាមានតម្រូវការខ្លាំងសំរាប់នាំចេញទៅលក់អោយឈ្មួញនៅប្រទេសជិតខាង៕
