ព្រះវិហារ តាមសេចក្ដីរាយការណ៍បានអោយដឹងថាបទល្មើសឈើគ្រញូងនៅតែចរាចរជួញដូរចូលទឹកដីកម្ពុជាជាហូរហែតាមច្រករបៀងសំខាន់ៗជុំវិញតំបន់ប្រាសាទព្រះវិហារជាប់ព្រំដែនថៃទោះបីមានកំលាំងសមត្ថកិច្ចឈរជើងតាមបណ្តាច្រកទាំងនោះក៍ដោយ។
សេចក្ដីរាយការណ៍បន្តថាពលករខ្មែរចាស់ក្មេងប្រមាណ៥០០នាក់បានចូលទៅស៊ីឈ្នួលកាប់ឈើគ្រញូងខុសច្បាប់ក្នុងទឹកដីថៃដដែលជាដដែលទោះបីអាជ្ញាធរដែនដីខំប្រឹងហាមឃាត់ពួកគាត់មិនអោយចូលដីថៃខុសច្បាប់ក៍ដោយ។កន្លងមកពលករខ្មែរស៊ីឈ្នួលកាប់ឈើគ្រញូងមួយចំនួនបានបាត់ខ្លួននៅថៃមិនដឹងថាស្លាប់រឺរស់នោះទេ។
ភ្នាក់ងារបានអោយដឹងនៅព្រឹកថ្ងៃទី២៤កញ្ញា២០១៥ថាលោកផាន់សាម៉ែនមេបញ្ជាការតំបន់ប្រត្តិការសឹករងស្រុកជាំក្សាន្តដែលទើបតែផ្លាស់ប្តូរភារកិច្ចទៅគ្រប់គ្រងអង្គភាពនៅទីនោះបាននិងកំពុងខិតខំដឹកនាំកំលាំងល្បាតចុះបង្ក្រាបបទល្មើសការចរាចរឈើគ្រញូងចូលទឹកដីកម្ពុជាតាមច្រកភ្នំខ្មោចឬហៅភ្នំ៤០០ក្បែរច្រកតាថាវ។ឈើគ្រញូងមួយចំនួនក៍មានពលរដ្ឋថៃខិលខូចលួចកាប់បំផ្លាញយកមកលក់អោយថៅកែខ្មែរដល់ច្រកព្រំដែនខ្មែរផងដែរ។
ប្រភពព័ត៌មានដដែលបានបង្ហើបអោយដឹងថាមេបញ្ជាការសឹករងស្រុកជាំក្សាន្ដថ្មីនេះរឹតបន្តឹងខ្លាំងយកស្នាដៃគឺមិនយកលុយពីឈ្មួញគ្រញូងឆ្លងកាត់ច្រកគាត់ឈរជើងនោះទេអោយតែចាប់បានឈើគ្រញូងយកមកគរចាក់ប្រេងដុតចោលតែម្តង។តាមដឹងគាត់ចាប់បង្ក្រាបដុតគ្រញូងបំផ្លាញចោលចំនួន៧លើករួចមកហើយដែលប្រភពឈើគ្រញូងទាំងនោះចរាចរឆ្លងកាត់ភ្នំខ្មោច។ឈើគ្រញូងមួយចំនួនឈ្មួញដឹកជញ្ជូនយកទៅលក់ដល់ខេត្តកំពង់ចាមនិងត្បូងឃ្មុំមិនបានបង់ពន្ធត្រឹមត្រូវចូលថវិការដ្ឋនោះទេហើយវាថ្លៃខ្លាំងណាស់ក្នុង១ម៉ែត្រ។
ច្រកភ្នំខ្មោចត្រូវបានប្រភពព័ត៌មានសម្ងាត់រាយការណ៍អោយដឹងថាមិនមែនត្រឹមតែមានឈើគ្រញូងឆ្លងកាត់គគ្រឹកគគ្រេងនោះទេគឺកាលពីមុនមានទាំងរថយន្តស៊េរីថ្មីទំនើបៗមានទាំងចង្កូតឆ្វេងនិងស្ដាំគ្មានពន្ធចូលស្ទើរជារៀងរាល់ថ្ងៃដោយសារខ្មោចស្រុកមានអំណាចជាអ្នកបើកដៃ។ហើយឈ្មួញរកស៊ីនាំរថយន្តចូលបានបង់លុយក្រៅផ្លូវច្បាប់ចំនួនប្រមាណ៣០០០ដុល្លារអាមេរិកក្នុង១គ្រឿងអោយមេច្រកនិមួយៗក្នុងតំបន់ព្រំដែនប្រាសាទព្រះវិហារ៕
