ភ្នំពេញ ៖ ចោរប្លន់ប្រដាប់អាវុធ ២នាក់ បានជិះម៉ូតូ ១គ្រឿងដេញតាមធ្វើសកម្មភាពបាញ់ប្លន់បុរសម្នាក់ យកម៉ូតូឌ្រីមC125 ស៊េរី០១៤បានសម្រេចហើយជិះរត់គេចបាត់ដោយសុវត្ថិភាពហើយបាញ់ ជនរងគ្រោះត្រូវមួយគ្រាប់បណ្តាលឲ្យរងរបួសធ្ងន់ធ្ងរត្រូវបានដឹកយកទៅមន្ទីរពេទ្យភ្លាមៗ ។ ហេតុការណ៍ប្លន់ប្រដាប់អាវុធនេះបានកើតឡើងកាលពីវេលាម៉ោង២០និង២០នាទីយប់ថ្ងៃទី១២ ខែកុម្ភៈឆ្នាំ២០១៤ ស្ថិតក្នុងចំណុចផ្លូវ៩៦BT ចំណុចមុខផ្ទះ2A ក្នុងសង្កាត់បឹងទំពន់ ខណ្ឌមានជ័យ នៅក្បែររបងវត្ថដំបូកខ្ពស់។ តាមប្រភពព័ត៌មានបានឲ្យដឹងថា មុនពេលកើតហេតុ
ជនសង្ស័យមានគ្នា ២នាក់ ជិះម៉ូតូម៉ាកនិច ១គ្រឿងតាមជនរងគ្រោះតាំងពីផ្លូវ៣៧១ និងបាញ់គំរាម ១គ្រាប់លុះជិះដេញរហូតមកដល់ចំណុចក្បែររបងវត្តដំបូកខ្ពស់ ក៏ក្រុមចោរប្លន់នោះបាញ់ជនរងគ្រោះចំនួន ៤ ទៅ ៥ គ្រាប់ ត្រូវចំជនរងគ្រោះ ១គ្រាប់ ដួលពីលើម៉ូតូទើបក្រុមចោរនោះ
ក៏បានលើកម៉ូតូជនរងគ្រោះជិះគេចខ្លួនបាត់ស្រមោល ហើយចំណែកជនរងគ្រោះខាងលើត្រូវបានគេដឹងយកទៅមន្ទីរពេទ្យខ្មែរសូវៀតភ្លាមៗដើម្បីសង្គ្រោះបន្ទាន់។ ក្រោយកើតហេតុប្រហែលជា១០នាទីកម្លាំងសមត្ថកិច្ចខណ្ឌមានបានចុះមកដល់កន្លែងកើតហេតុបានឃើញសំបកគ្រាប់
របស់ជនល្មើសគឺម៉ាកK54 ដែលបានធ្វើសកម្មភាពបាញ់ប្លន់ជនរងគ្រោះខាងលើនេះ។សមត្ថកិច្ចបានអោយដឹងទៀតថាជនរងគ្រោះខាងលើឈ្មោះ បេ រស្មី អាយុ២៧ឆ្នាំមានទីលំនៅក្នុងសង្កាត់ទួលទំពូង ខណ្ឌចំការមន។ ចំពោះករណីប្លន់ប្រដាប់អាវុធខាងលើនេះ ត្រូវបាន
ប្រជាពលរដ្ឋដែលស្នាក់នៅក្បែរកន្លែងកើតហេតុបានអោយដឹងដែរថា គាត់សំណូមពរអោយសមត្ថកិច្ចមេត្តាត្រួតពិនិត្យនៅចំណុចកើតហេតុខាងលើនេះផងព្រោះថា ម្ដុំកន្លែងនេះជាកន្លែងស្ងាត់ស្រួលណាស់ដល់ក្រុមចោរធ្វើសកម្មភាពគ្រាប់បែបយ៉ាង ដោយសារផ្លូវងងឹតផងដែរដូច្នេះក្នុងនាមគាត់ជាប្រជាពលរដ្ឋគាត់ពិតជាមានការភ័យខ្លាចចំពោះសុវត្តិភាពខ្លួនឯង៕ 
