ជាទូទៅមនុស្សស្រីភាគច្រើនតែងមានការឃ្លាតឆ្ងាយពីចំណង់ផ្លូវភេទបន្ទាប់ពីឈានចូលដល់វ័យរាំងរដូវ ចាប់ពីអាយុ ៥០ឆ្នាំឡើងទៅ ខណៈដែលអ័រម៉ូនក៏មានការប្រែប្រួលខុសពីវ័យនៅមានរដូវដែរ។ ជាមួយគ្នានេះ នៅមានកត្តាបន្ទាប់បន្សំផ្សេងៗមួយចំនួនទៀត ដូចជាវិបត្តិផ្លូវចិត្ត សុខភាពមិនរឹងមាំ ក៏មានឥទ្ធិពលអូសទាញចំណង់សិចស្ត្រីឱ្យថមថយចុះផងដែរ។ ចំពោះបញ្ហានេះត្រូវបានអ្នកជំនាញបង្ហើបប្រាប់ថា អាចវិធីពង្រឹង និងបង្កើនចំណង់ផ្លូវភេទឡើងវិញបាន។
របបចំណីអាហារប្រចាំថ្ងៃ ៖ ចំណីអាហារ ដែលមានប្រូតេអ៊ីន និងសារធាតុចិញ្ចឹមខ្ពស់ដូចជាបន្លែ ត្រី សាច់ និងផ្លែឈើមួយចំនួនទៀត សុទ្ធតែមានសារសំខាន់ចំពោះការចូលរួមដោះស្រាយបញ្ហា។ នៅពេលមានរបបចំណីអាហារគ្រប់គ្រាន់ រាងកាយមានភាពមាំមួននោះចំណង់ផ្លូវភេទនឹងកើតមានដោយឯកឯង។ យ៉ាងណាក៏ដោយ លោកអ្នកក៏មិនត្រូវរំលងចោលនូវការហាត់ប្រាណ ដើម្បីជួយពង្រឹងសុខភាព ដែលយ៉ាងហោចណាស់30នាទីក្នុងមួយថ្ងៃ ។
អាហារជម្រុញសិច ៖ ចំពោះប្រភេទអាហារដែលមានលទ្ធភាពក្នុងការជួយជម្រុញថាមពលសិច ត្រូវបានគេរកឃើញជាយូរមកហើយ ដែលរាល់អាហារទាំងនោះរួមមានដូចជា ៖ នំសូកូឡា ទឹកខ្ញី អយស្ទ័រ ងាវ ផ្លែធុរ៉េន ផ្លែប៊័រ ទឹកដោះគោ ជាដើម ។
ផ្លូវចិត្ត និងភាពរីករាយ ៖ ភាពស្រស់ថ្លានៃជីវិត ដូចជាអាម្មណ៍បែបសប្បាយៗ ជាពិសេសការបង្កើតឱ្យមានបរិយាកាសបែបរ៉ូមែនទិក សុទ្ធតែអាចជួយដាស់អារម្មណ៍សិចស្ត្រីបាន។ អ្នកអាចសាកល្បងដោយការរំលឹកអនុស្សាវរីយ៍ដ៏រីករាយកាលគ្រាផ្តើមស្នេហ៍លើកដំបូង ជាមួយការទទួលទានអាហារតែពីរនាក់ជាមួយដៃគូជីវិត។ ពេលនោះអ្នកនឹងអាចដកស្រងបទពិសោធន៍បានដោយខ្លួនឯងជាក់ជាមិនខាន ។
ប្រឹក្សាជាមួយអ្នកជំនាញ ៖ ជាវិធីដ៏ល្អ លោកអ្នកចាំបាច់ទៅជួបពិគ្រោះ និងពិភាក្សាជាមួយគ្រូពេទ្យជំនាញ ដើម្បីទទួលបានដំណោះស្រាយប្រកបដោយភាពភាពជឿជាក់ ៕
