ខ្សែបម្រើរបស់ក្លិបមេឃខៀវ Manchester City កីឡាករ Yaya Toure (យ៉ាយ៉ា តូរ៉េ) កំពុងតែប្រឈមមុខនឹងការដាក់ពិន័យដោយសារតែរូបគេបានយកជើងទៅទាត់ខ្សែប្រយុទ្ធរបស់ក្លិបចាបលឿង Norwich City (ន័រវិក ស៊ីធី) គឺកីឡាករ រីកគី វ៉ាន់ វ៉ូសស្វីនខេល (Ricky van Wolfswinkel) អំឡុងពេលក្រុមទាំងពីរប្រកួតស្មើគ្នា ០ទល់នឹង០ កាលពីយប់ថ្ងៃសៅរ៍ ។ និយាយក្រោយពីការប្រកួត លោក ម៉ានូអ៊ែល ប៉េឡេគ្រីនី (Manuel Pellegrini) បានលើកឡើងថា គាត់ពិតជាមិនបានដឹងពីហេតុការណ៍នេះទេ ប៉ុន្តែទោះបីជាយ៉ាងណាក៏ដោយ គេហទំព័រ Daily Star បាន
បញ្ជាក់ថា សហព័ន្ធបាលទាត់អង់គ្លេសនឹងរង់ចាំទទួលព័ត៌មានពីលោកអជ្ញាកណ្តាល John Moss (ចន មូស) ថាតើគាត់ពិតជាបានឃើញហេតុការណ៍នោះឬក៏អត់ ។ បើសិនជារឿងហេតុនេះត្រូវបានគេរកឃើញថា Toure ពិតជាមានកំហុសមែននោះ មានន័យថា កីឡាករអន្តរជាតិកូឌីវ័រ រូបនេះនឹងត្រូវរងការពិន័យមិនឲ្យចូលលេងចំនួន៣ប្រកួត ៕